Read Pahari, Kullu 1 तीमुथियुस 3 Bible Online

1 तीमुथियुस 3 - Pahari, Kullu bible

1 तीमुथियुस 3

¹ऐ गैल सच़ सा कि ज़ुण अध्यक्ष होंणा चाहा सा ता सौ भलै कोमै री इच्छा केरा सा।

²तैबै ऐ ज़रूरी सा कि एक अगुवा हागै ऐ गुण होंणै चेहिऐ; सौ निर्दोष एकी लाड़ी रा लाड़ा, सँयमी, सुशील, आदरा रै लायक, पाहुणच़ारै केरनु आल़ा होर परमेश्वरा रा वचन सिखाणै न निपुण हो।

³पियक्कड़ या मारपीट केरनु आल़ा नी लोड़ी वरन् कोमल लोड़ी होर न झ़गड़ालू होर न ढैबुऐ रा लोभी हो।

⁴आपणै घौरा रा शोभला इंतज़ाम केरा हो होर बाल-बच्चे बै सारी गम्भीरता न अधीन रखणू आल़ा हो।

⁵ज़ैबै कोई आपणै घौरा रा ही शोभला इंतज़ाम केरना नी ज़ाणदा ता तेई परमेश्वरै री मण्डली री कि रखवाली केरनी?

⁶फिरी ऐ सा कि सौ नोंऊँआं विश्वासी नी हो, ऐण्ढा नी लोड़ी हुआ कि सौ घमण्ड केरिया शैताना सांही सज़ा पाला।

⁷होर अविश्वासी मौंझ़ै तेइरा शोभला नाँ हो ऐण्ढा नी लोड़ी हुआ कि निन्दित होईया शैतानै रै फन्दै न फसला।

⁸तैण्ढाऐ सेवका बै भी गम्भीर होर ईमानदार होंणा चेहिऐ। पियक्कड़ होर नीच कमाई रै लोभी नी लोड़ी।

⁹पर विश्वासै रै भेदा बै शोभलै विचारा न सुरक्षित रखलै।

¹⁰होर ऐ भी ते पैहलै परखणै, होर अगर निर्दोष निकतै ता सेवका रा कोम केरलै।

¹¹एसा रीतियै सेवका री बेटड़ी बै भी आदरा रा लायक होंणा चेहिऐ। दोष लाणु आल़ी नी लोड़ी पर सँयमी होर सैभी गैला न विश्वासयोग्य होली।

¹²सेवक एकै लाड़ी रै लाड़ै हो होर बाल-बच्चे होर आपणै घौरा रा शोभला इंतज़ाम केरना जाँणा सी।

¹³किबैकि ज़ो सेवका रा कोम शोभली तैरहा केरी सका सी, ते आपणी तैंईंयैं शोभला औह्दा होर तिन्हां यीशु मसीह न आपणै बशाह रै बारै न लोका बै बशाह सैंघै दसणै लायक होंणा।

¹⁴हांऊँ तौ हागै छ़ेकै ऐणै री आशा रखिया भी इन्हां गैला तौभै एथै री तैंईंयैं लिखा सा,

¹⁵कि अगर मेरै ऐणै न देर हुई ता तू ज़ाण कि परमेश्वरा रै घरानै न ज़ो ज़िन्दै परमेश्वरै री मण्डली सा होर ज़ो सच़ाई रा थोम्बा होर मनियाद सा, तेथा न कैण्ढा बर्ताव केरना चेहिऐ।

¹⁶होर ऐथा न कोई शक नी कि, परमेश्वरै ज़ो शिक्षा प्रगट केरी सा सौ पूरी तैरहा सच़ सा मतलब, सौ ज़ो शरीरा न प्रगट हुआ, पवित्र आत्मा न धर्मी ठहरू, स्वर्गदूता न हेरूआ, होरी ज़ाति न तेइरै बारै न च़ेले रै ज़रियै खुशी रा समाद प्रचार हुआ, दुनिया न तेई पैंधै बशाह केरूआ, होर परमेश्वरै सौ स्वर्गा न नेऊ।