Read Pahari, Kullu 1 तीमुथियुस 4 Bible Online

1 तीमुथियुस 4 - Pahari, Kullu bible

1 तीमुथियुस 4

¹पर पवित्र आत्मा स्पष्ट रूपा न बोला सा कि, आखरी बौगता न किछ़ लोका मसीह शिक्षा पैंधै बशाह केरना बन्द केरना। तिन्हां बुरी आत्मा ग्रहण केरनी ज़ो तिन्हां बै भरमा सा होर झ़ूठी शिक्षा पैंधै बशाह केरना ज़ो बुरी आत्मा न एज़ा सा।

²झ़ूठी शिक्षा देणु आल़ै धोखै बाज सी। तिन्हां ऐ नी ज़ाणना कि ते सही केरदै लागै सी या गलत, तैण्ढाऐ ज़ैबै कोई गर्म लोहै सैंघै फुकिया सा ता शरीर ऐबै किछ़ भी महसूस नैंई केरी सकदा।

³ऐण्ढै लोका ऐ सीखा सी कि ब्याह केरना होर कई किस्मा री खाँणै री च़ीज़ा खाँणा गलत सा। पर परमेश्वरै ते खाँणै री च़ीज़ा तिन्हां विश्वासी री तैंईंयैं बणाई ज़ो धन्यवादा री प्रार्थना न बाद खाँणै री तैंईंयैं सच़ी शिक्षा बै जाँणा सी।

⁴किबैकि परमेश्वरै बणाईदी सारी च़ीज़ा शोभली सी होर कोई बी च़ीज़ अस्वीकार केरनै लायक नी ऑथि पर ऐ कि धन्यवादा सैंघै खाइली।

⁵किबैकि ऐ परमेश्वरै रै वचन होर प्रार्थना सैंघै च़ोखै होआ सा।

⁶अगर तू सैभी भाई, बैहणा बै इन्हां गैला री याद दिलांदा रौहला ता मसीह यीशु रा शोभला सेवक ठहराईणा होर बशाह होर तेई शोभलै उपदेशै री गैला न, ज़ो तू मनदा आऊ सा तेरा पालन पोषण होंदा रौहणा।

⁷पर बेकार होर मूर्ख कहाणी न अलग रौह; होर तुसै ईश्वरीय ज़िन्दगी ज़ीणै री तैंईंयैं आपणै आपा बै लगातार त्यार केरा।

⁸किबैकि कसरत केरना तुसरै शरीरा री तैंईंयैं शोभला सा पर भक्ति सैभी गैला री तैंईंयैं फायदैमँद सा किबैकि ऐई बौगतै रै होर ऐणु आल़ी ज़िन्दगी री भी प्रतिज्ञा एथै री तैंईंयैं सा।

⁹होर ऐ गैल सच़ी सा होर हर तैरहा न मनणै लायक सा।

¹⁰किबैकि आसै मेहनत होर कोशिश एथै री तैंईंयैं केरा सी कि, आसरी आशा तेई ज़िन्दै परमेश्वरा पैंधै सा, ज़ो सैभी मांहणु रा होर खास केरिया विश्वासी रा उद्धार केरनु आल़ा सा।

¹¹विश्वासी बै इन्हां गैला बै सीखा होर हुक्म दै कि ते तिन्हां गैला रा पालन केरै।

¹²कोई तेरी जवानी बै तुच्छ नी समझ़ला, पर वचन, चाल-चलन, झ़ुरी, बशाह होर पवित्रता न विश्वासी री तैंईंयैं आदर्श बण।

¹³ज़ैबै तैंईंयैं हांऊँ न एनु, तैबै तैंईंयैं पवित्र शास्त्र पौढ़नै, उपदेश देणै होर सिखाणै न लागी रौह।

¹⁴तेई वरदाना बै मत बिसरदै, ज़ो तौभै भविष्यवाणी रै द्वारा मिलू ती ज़ैबै मण्डली रै स्याणै आपणा हौथ तौ पैंधै रखू ती।

¹⁵तिन्हां गैला बै ध्याना सैंघै सोच़दा रौह होर इन्हां पैंधै आपणा ध्यान लाँदा रौह, ताकि सैभ लोका हेरी सकलै कि तू बशाह न बढ़दा लागा सा।

¹⁶तू कैण्ढै ज़ीआ सा होर कि सीखा सा तिन्हरै बारै न साबधान रौह। इन्हां गैला पैंधै स्थिर रौह किबैकि अगर ऐण्ढा केरदा रौहला ता तौ आपणै होर आपणै शुणनू आल़ै री तैंईंयैं उद्धारा री बजहा होंणा।