Read Pahari, Kullu 1 तीमुथियुस 5 Bible Online

1 तीमुथियुस 5 - Pahari, Kullu bible

1 तीमुथियुस 5

¹आपु न बड़ै उम्रा रै मांहणु बै मत डाँटदा पर तेइबै आपणा बापू ज़ाणिया सही केरा होर ज़ुआना बै ज़ो उम्रा न तौ न होछ़ै सी आपणा भाई ज़ाणिया उपदेश देआ,

²खापरी बेटड़ी बै ज़ो उम्रा न तौ न बड़ी सा आपणी आमा ज़ाणिया बर्ताव केर होर ज़ुआन बेटड़ी बै पूरी पवित्रता सैंघै आपणी बैहण ज़ाणिया समझ़ा।

³तिन्हां विधवा रा आदर केरा ज़ुणी हागै तिन्हरी हेर-शुण केरनै री तैंईंयैं कोई भी नैंई ऑथि।

⁴अगर कौसी विधवै रै शोहरू या नातीपोतै होलै ता ते परमेश्वरा बै आपणी भक्ति रिहाऐ होर ज़ैण्ढै ते आपणै टबरा सैंघै बर्ताव केरा सी होर तिन्हरी हेर-शुण केरिया आपणै आमा-बापू होर दादा-दादी बै तिन्हरा हक दै किबैकि ऐही परमेश्वरा बै शोभला लागा सा।

⁵ज़ुणी विधवा हागै तेसरी हेर-शुण केरनु आल़ा कोई नी ऑथि सौ परमेश्वरा पैंधै ही आशा रखा सा होर रात ध्याड़ आपणी मज़ती री तैंईंयैं परमेश्वरा सैंघै प्रार्थना केरा सा।

⁶पर ज़ो विधवा भोगविलासा न पौड़ा सा सौ ज़िन्दै ज़ीउऐ मूँई सा।

⁷इन्हां गैला री शिक्षा विश्वासी बै देआ केरा ताकि कोई भी तिन्हां पैंधै दोष न लाऐ।

⁸पर अगर कोई आपणै रिश्तेदारा री, होर खास केरिया आपणै घरानै रा ख्याल नी केरदा ता सौ बशाह न मुकरूआ सा होर अविश्वासी न बी बुरा बणू सा।

⁹तेसा विधवा रा नाँ लिखिला ज़ो शौठ बौर्षा न कम नी होली होर एकी लाड़ै री लाड़ी रौहीदी होली,

¹⁰होर तेसै हमेशा भलै कोमा केरेदै हो, होर आपणै बच़ै रा पालन पोषण शोभली तैरहा केरूदा हो, सफ़र केरनै आल़ै विश्वासी रा आपणै घौरा न स्वागत केरुदा हो, एक दासी सांही दुज़ै विश्वासी री सेवा केरीदी हो, होर तेसै तिन्हां लोका री मज़त केरीदी होली ज़ो परेशानी न ती, होर हर एक भलै कोमा न मन लाऊदा हो।

¹¹पर तिन्हां ज़ुआन विधवै रै नाँ गिणती न हेरी लिखदा किबैकि ज़ैबै ते मसीह रा बरोध केरिया सुख विलासा न पौड़ा सी ता दबारा ब्याह केरना चाहा सी,

¹²होर दोषी ठहरा सी किबैकि तिन्हैं आपणा पैहला वायदा चोड़ू सा।

¹³होर एथा सैंघै-सैंघै ते घौरा-घौरा फिरिया आलसी होंणा सीखा सी, होर सिर्फ़ आलसी नी, पर दुज़ै लोका बारै न गप-शप केरदी रौहा सी होर दुज़ै रै कोमा न हौथ भी पा सी होर ज़ो गैला बोलणा नी चेहिऐ ते गैला भी बोला सी।

¹⁴तैबै हांऊँ ऐ उपदेश देआ सा कि ज़ुआन विधवा ब्याह केरली होर बच़ै पैदा केरली होर घौर सम्भाल़ली होर कौसी बैरी बै बदनाम केरनै रा मौका नी दै।

¹⁵हांऊँ ऐ तैबै बोला सा कि किछ़ ज़ुआन विधवै पैहलै ही परमेश्वरा बै मनणा छ़ौड़ू सा, होर ते सौ केरदी लागी सी ज़ो शैतान तिन्हां बै करवा सा।

¹⁶अगर कौसी विश्वासिनी रै टबरा न विधवा होली ता सौऐ तिन्हरी सेवा केरली कि मण्डली पैंधै बोझ़ नी होला ताकि मण्डली तिन्हरी मज़त केरी सकली ज़ो सैच़ियै विधवा सी।

¹⁷मण्डली रै स्याणै ज़ो आपणा कोम शोभली तैरहा केरा सी, खास केरिया ते ज़ो परमेश्वरा रा वचन शुनाणै होर सिखाणै न मेहनत केरा सी, तिन्हां बै दुगणै आदरै रै लायक समझ़ा।

¹⁸किबैकि पवित्र शास्त्र बोला सा कि, “दौल़णू आल़ै बौल्दा रा मुँह कैधी नी बोनणा,” किबैकि पवित्र शास्त्रा न एक होर ज़ैगा लिखूदा सा, “मज़दूर आपणी मज़दूरी रा हकदार सा।” ता आसै जाँणा सी कि मण्डली बै आपणै स्याणै री मज़त केरनी चेहिऐ।

¹⁹कोई दोष कौसी मण्डली रै स्याणै पैंधै लाइला ता बगैर दूई या त्रा गुआही रै मत शुणदा।

²⁰पाप केरनु आल़ै बै सैभी विश्वासी रै सामनै समझ़ा ताकि होरा लोका भी डौरलै।

²¹परमेश्वर होर मसीह यीशु होर चुनैदै स्वर्गदूता बै मौज़ूद ज़ाणिया, हांऊँ तौभै आपणा हुक्म मनणै रा आदेश देआ सा! सैभी सैंघै एक बराबर बर्ताव केरा, कौसी सैंघै पक्षपात मता केरदै।

²²ज़ैबै तैंईंयैं एक मांहणु मसीह रै प्रति बफादार साबित नैंई होला, तैबै तक तेई मांहणु पैंधै आपणा हौथ रखिया छ़ेकै एक स्याणै रै रूपा न नियुक्त मता केरदै होर अगर तू केरा सा ता, तौ भी तेइरै पापा रा भागी होंणा; आपणै आपु बै पवित्र बणाईया रख।

²³सिर्फ़ पाणी पीणा बन्द केरा, आपणै पेटा री परेशानी होर बार-बार बीमार होंणै री बजहा न थोड़ा-थोड़ा अँगूरा रा रस भी इस्तेमाल केर।

²⁴हांऊँ तुसाबै स्याणै री छ़ेकै नियुक्ति केरनै री तैंईंयैं नाँह केरा सा किबैकि किछ़ लोका खुलेआम पाप केरा सी। होर ऐ भी कि न्याय होंणै न पैहलै ते विश्वासी रै सामनै स्पष्ट रूपा न दोषी सी। हालांकि दुज़ै लोका रा पाप स्पष्ट नैंई ऑथि होर न्याय रै रोज़ा न ही स्पष्ट होंणै।

²⁵तैण्ढाऐ ज़ैबै लोका शोभलै कोम केरा सी ता इन्हां बै होरी विश्वासी रै ज़रियै स्पष्ट रूपा न हेरिया सी। होर औखै तक कि अगर ते तिन्हां बै एकी बारी स्पष्ट रूपा न नैंई हेरदै ता आखरी न तिन्हां पछ़ियाणना।