Read Pahari, Kullu 1 तीमुथियुस 6 Bible Online

1 तीमुथियुस 6 - Pahari, Kullu bible

1 तीमुथियुस 6

¹सैभ विश्वसी ज़ो दास सी, तिन्हां बै हर तैरहा न आपणै मालका रा आदर केरना चेहिऐ ताकि दुज़ै लोक परमेश्वरै होर आसरी निन्दा नी केरलै।

²होर ज़ुणिरै मालक विश्वासी सी इन्हां ते भाई होंणै री बजहा न तुच्छ नी ज़ाणलै, बल्कि तिन्हरी होर बी सेवा केरलै किबैकि एथा न फायदा च़कणू आल़ै विश्वासी होर प्रेमी सी। इन्हां गैला रा उपदेश देंदा रौह होर तिन्हां बै मनणै री तैंईंयैं बोला।

³अगर कोई दुज़ा झ़ूठी शिक्षा देआ सा होर खरी गैला बै मतलब आसरै प्रभु यीशु मसीह री गैला बै होर तेई उपदेशा बै नी मनदा ज़ो भक्ति रै मुताबक सा।

⁴ता सौ घमण्डी सा होर किछ़ नी ज़ाणदा। ऐण्ढै मांहणु बेकारा रै मुद्दे होर गैला रै बारै न बैंहस केरना होर लड़ाई केरना चाहा सा, री ज़ुणियै लाइया, जलन होर झ़गड़ै होर निन्दा री गैला होर बुरै-बुरै शक होआ सी,

⁵तिन्हां मांहणु न बेकार झ़गड़ै पैदा होआ सी। ज़ुणी री बुद्धि बिगड़ी सा होर सच़ाई न दूर हुए सी ज़ो ऐ समझ़ा कि परमेश्वरा रै बारै न शिक्षा देणा ढैबुऐ कमोणै रा दुआर सा।

⁶पर परमेश्वरा बै ज़ो शोभला लागा सा सौ केरना होर ज़ो सौ आसाबै देआ सा तेथा न सन्तुष्ट होंणा आसरी तैंईंयैं बेहतर सा।

⁷किबैकि आसै न ता दुनिया न किछ़ आंणु सा होर न किछ़ नैंई सकदै।

⁸होर अगर आसा हागै खाँणै होर लाणै बै सा ता इन्हां न सन्तुष्ट होंणा चेहिऐ।

⁹पर ज़ुणा लोका धनी होंणा चाहा सी, ते सैभी तैरहा रै पाप होर जानवरा सांही फन्दै न फसा सी ते मूर्ख होर नुकसान देणु आल़ी इच्छा न ढौकिया सी ज़ो तिन्हां बै बर्वाद होर नाश केरा सी।

¹⁰किबैकि ढैबुऐ रा लोभ सैभी किस्मै री बुराई री जड़ सा, ज़ुणिबै प्राप्त केरनै री कोशिश केरदै केतरै लोकै विश्वसा न भटकिया कई किस्मै रै दु:खा न डूबै।

¹¹पर तू तिमुथियुस परमेश्वरा रा जन, तू इन्हां गैला न भग होर धर्म, भक्ति, बशाह, झ़ुरी, धीरज़ होर नम्रता रा पिछ़ा केर।

¹²एक शोभलै सैनिका सांही ज़ो एक लड़ाई न लड़ाई बै कैधी नैंई छ़ौड़दा, तौभै भी परमेश्वरा पैंधै बशाह केरना होर तेइरा पालन केरना कैधी नैंई छ़ौड़ना चेहिऐ।

¹³हांऊँ तौभै परमेश्वरा रै सामनै ज़ो सैभी बै ज़िन्दा रखा सा होर मसीह यीशु बै ज़ुणियै पुन्तियुस पिलातुसा रै सामनै आपणी गुआही न दृढ़ता सैंघै सच़ बोलू, ऐ हुक्म देआ सा,

¹⁴कि तू आसरै प्रभु यीशु मसीह रै दबारा वापस ऐणै तक ऐई हुक्मा बै निष्कलंक होर निर्दोष रख।

¹⁵ज़ो तेई ठीक बौगता पैंधै रिहाणी, ज़ो परमधन्य, एकै अधिपति होर राज़ै रा राज़ा सा होर प्रभु रा प्रभु सा।

¹⁶होर अमरता सिर्फ़ तेइरी सा होर अगम्य ज्योति न रौहा सा होर न सौ कौसी मांहणुऐ हेरू होर न कैधी हेरी सकदै। तेइरी महिमा होर शक्ति जुगा-जुगा तैंईंयैं रौहणा। आमीन।

¹⁷एसा दुनिया रै धनवाना बै हुक्म दै कि ते घमण्डी नी हो होर थोड़ै रोज़ा रै धना पैंधै आशा नी रखलै, पर परमेश्वरा पैंधै आशा रखलै, ज़ो आसरै सुखै री तैंईंयैं सैभ किछ़ बहुतायता न देआ सा।

¹⁸तिन्हां बै बोहू शोभला कोम केरनै री तैंईंयैं होर होरी री तैंईंयैं ज़ो किछ़ भी जरूरत सा खुलै दिला सैंघै लगातार मज़त केरनै री तैंईंयैं हुक्म देआ,

¹⁹ऐण्ढा केरिया तिन्हां आपणै शोभलै कोम आपु री तैंईंयैं खजानै सांही कठै केरनै, ज़ो स्वर्गा न आपणै भविष्य री तैंईंयैं एक मजबूत नीमा सांही होंणा होर तिन्हां हमेशा री तैंईंयैं सच़ी ज़िन्दगी प्राप्त केरनी।

²⁰हे तीमुथियुस, ज़ो परमेश्वरै तौभै धिनु तेथा री रखवाली केर होर बेकार होर मूर्ख कहाणी न ज़ो परमेश्वरा री सच़ी शिक्षा रा बरोध केरा सा ज़ुणिबै ते ज्ञान बोला सी दूर रौह।

²¹किछ़ लोकै ऐ झ़ूठा ज्ञाना ग्रहण केरू होर ऐण्ढा केरिया, ते ऐबै मसीह रै बारै न सच़ी शिक्षा पैंधै बशाह नैंई केरदै। हांऊँ प्रार्थना केरा सा कि परमेश्वरा रा अनुग्रह तुसा पैंधै हो।