Read Pahari, Kullu 2 तीमुथियुस 2 Bible Online

2 तीमुथियुस 2 - Pahari, Kullu bible

2 तीमुथियुस 2

¹तैबै ओ मेरै बेटै तिमोथी, तू तेई अनुग्रह न ज़ो मसीह यीशु तौभै देआ सा, बलवन्त होई जा।

²होर ज़ो गैला तैं बोहू लोका रै सामनै मूँ न शुणी सी, तिन्हां बै विश्वासी मांहणु बै दै, ज़ो होरी मांहणु बै बी सिखाणै रै काबिल हो।

³मसीह यीशु रै शोभलै योद्धा सांही मूँ सैंघै दु:ख सौह।

⁴ज़ैबै एक योद्धा सैना न सेवा केरा सा, ता दुज़ा कोम नैंई केरदा किबैकि सौ आपणै बड़ै अधिकारी बै खुश केरना चाहा सा।

⁵अखाड़ै न अगर कोई विधि रै मुताबक नी लड़दा ता तेइबै मुकट नी मिलदा।

⁶ज़ो किसान मेहनत केरा सा, फसला रा पैहला हिस्सा तेइबै मिलणा चेहिऐ।

⁷ज़ो गैला हांऊँ बोला सा तेथा पैंधै ध्यान दै होर प्रभु तौभै इन्हां सैभी गैला री समझ़ देणी।

⁸लगातार याद रखा कि यीशु मसीह कुण सा, ज़ो दाऊदै रै खानदाना न हुआ होर मूँऐंदै न ज़िन्दा हुआ होर ऐ खुशी रा समाद सा ज़ो हांऊँ लोका बै प्रचार केरा सा।

⁹ज़ुणी री तैंईंयैं हांऊँ एक अपराधी सांही दु:ख सौहा सा, औखै तैंईंयैं कि कैद भी सा, पर कोई भी दुज़ै बै परमेश्वरा रा वचन प्रचार केरनै न रोकी नी सकदा।

¹⁰तैबै हांऊँ तिन्हां लोका रै फायदै री तैंईंयैं सैभ दुःख सौहा सा ज़ो परमेश्वरै चुनै सी ताकि ते भी मसीह न बशाह केरी सकलै होर मुक्ति पालै, होर ज़ो महिमा हमेशा री तैंईंयैं रौहा सा तेथा बै पालै।

¹¹ऐ गैल सच़ सा कि, अगर आसै मसीह सैंघै मूँऐ सी; ता तेई सैंघै ज़िन्दै बी होंणा।

¹²अगर आसै धीरज़ा सैंघै सौहंदै रौहलै ता, तेई सैंघै राज़ भी केरना, अगर आसै तेइरा नाँह केरलै ता तेई बी आसरा नाँह केरना।

¹³अगर आसै मसीह री तैंईंयैं विश्वासघाती भी होलै ता सौ विश्वासयोग्य बणी रौहा सा किबैकि सौ आपु आपणा नाँह नी केरी सकदा।

¹⁴इन्हां गैला री तिन्हां बै याद दिला होर परमेश्वरा री मौज़ुदगी ज़ाणिया च़िताऊणी दै कि बेकारा री गैला पैंधै बैंहस नैंई केरै, ज़ुणिन किछ़ फायदा नी होंदा बल्कि शुणनू आल़ै रा बशाह बिगड़ा सी।

¹⁵आपणै आपु बै परमेश्वरा रा ग्रहण योग्य होर ऐण्ढा कोम केरनु आल़ा ठहराणै री कोशिश केर, ज़ो शर्मिंदा नैंई होर ज़ो सच़ाई रै सन्देशा बै सही तरीकै न सिखाणु आल़ा हो।

¹⁶पर बुरी होर बेकारा री गैला री चर्चा न बच़िया रौह, किबैकि ऐण्ढै लोका होर बी अभक्ति न बढ़दै जाँणा

¹⁷होर तिन्हरै वचना लोका रै बशाह बै चौकेदै घावा सांही फैलिया नुकसान पजाणा, हुमिनयुस होर फिलेतुस तिन्हां मौंझ़ै न सी।

¹⁸तिन्हैं सच़ाई न बशाह केरना बन्द केरू सा। ते बोला सी कि परमेश्वरै पैहलै न ही मूँऐंदै विश्वासी हमेशा री ज़िन्दगी न च़कै सी। ऐ बोलिया तिन्हैं किछ़ विश्वासी बै तिन्हरै बशाह न दूर केरू सा।

¹⁹तैबै भी परमेश्वरा रै लोक एक पक्की मनियादी सांही सी ज़ो हिलदी नैंई। होर ऐई मनियादी पैंधै ऐ शब्द लिखदै सी, “परमेश्वर जाँणा सा की तेइरै लोका कुणा सी” होर भी “ज़ो परमेश्वरा री आराधना केरा सी तिन्हां बै बुराई केरना बन्द केरना चेहिऐ।”

²⁰बड़ै घौरा न सुनै होर च़ाँदी रै केल्है नी बल्कि काठ होर माटै रै बी भाँडै होआ सी। किछ़ भाँडै रा खास मौके पैंधै इस्तेमाल होआ सा होर दुज़ै भाँडै रा आम उदेश्य न इस्तेमाल होआ सा।

²¹ऐण्ढी तैरहा एक विश्वासी ज़ो आपु बै इन्हां सैभी गैला न दूर डाह सा तेई एक कीमती भाँडै सांही होंणा ज़ो एक खास मौके पैंधै इस्तेमाल होआ सा, ज़ुणिरी ज़िन्दगी पवित्र होंणी होर तेइरै मालका री तैंईंयैं कोम ऐणा, होर भलै कोमा री तैंईंयैं त्यार होंणा।

²²ज़ुआनी री इच्छा ज़गाणु आल़ी च़ीजा न दूर रौहा, एथा रै बजाय धार्मिक ज़िन्दगी, बशाह, झ़ुरी होर शान्ति पिछ़ा केर। सच़ै दिला सैंघै परमेश्वरा री आराधना केरनु लोका री संगती रा आनन्द लेआ।

²³पर मूर्खता होर अज्ञानै री बैंहसा न अलग रौह किबैकि तू जाँणा सा कि तेथा न झ़गड़ै होआ सी।

²⁴होर प्रभु रै दासा बै झ़गड़ालू नी होंणा चेहिऐ पर तेइबै सैभी रै प्रति दयालू होंणा चेहिऐ, परमेश्वरा रै वचन बै स्पष्ट रूपा न सिखाणु लायक हो, होर बरोध केरनु आल़ै लोका सैंघै धीरज डाहणा चेहिऐ।

²⁵होर बरोधी बै नम्रता सैंघै समझ़ाऐ, शायद परमेश्वर तिन्हां बै मन फेरनै रा मौका देला कि ते भी मसीह रै बारै न सच़ाई बै पछ़ियाणलै,

²⁶होर ताकि ते आपणी समझ़ा न एज़ी सकलै होर शैताना रै फन्दै न बची सकलै, ज़ुणियै आपणी इच्छा पूरी केरनै री तैंईंयैं धोखा धिनु सा।