Read Pahari, Kullu 2 तीमुथियुस 3 Bible Online

2 तीमुथियुस 3 - Pahari, Kullu bible

2 तीमुथियुस 3

¹हे तिमोथी हांऊँ ऐ चाहा सा कि तू ज़ाण मसीह वापस ऐणै न पैहलै आखरी रोज़ा न मुश्किल बौगत ऐणा।

²किबैकि लोक मतलबी, लोभी, डींगमार, घमण्डी, निन्दा केरनु आल़ै, आमा-बापू रा हुक्म नैंई मनणु आल़ै, दया नैंई केरनु आल़ै, अपवित्र,

³प्रेमरहित, क्षमारहित, दोष लाणु आल़ै, असँयमी, कठोर, भलै रै बैरी,

⁴विश्वासघाती, हठी, घमण्डी होर परमेश्वरै रै नी बल्कि सुख विलासा बै झ़ुरी केरनु आल़ै होंणै।

⁵तिन्हां भक्ति रा रूप धारण ता केरना पर तैथा री शक्ति नी मनणी, ऐण्ढै मांहणु न दूर रौह।

⁶इन्हां न किछ़ लोका घौरा न च़ुपचाप घुसा सी होर तिन्हां कमज़ोर बेटड़ी बै वशा न केरा सी ज़ो पापा न डूबी सी होर हर किस्मै री इच्छै रै वशा न सी।

⁷होर हमेशा नोंऊँई गैला बै सिखदी ता रौहा सी पर मसीह रै बारै न सच़ाई री शिक्षा री पछ़ियाणा तैंईंयैं कैधी नी पुजदै।

⁸ऐ झ़ूठी शिक्षा देणु आल़ै मसीह रै बारै न सच़ाई रै सन्देशा रा प्रचार होंणै न रोकणै री कोशिश केरा सी, ज़ैण्ढा कि यन्नेस होर यम्ब्रेसै मूसा रा बरोध केरू ती। तिन्हां हागै दुष्ट दिमाग सा होर ते असली न मसीह पैंधै बशाह नैंई रखदै।

⁹पर तिन्हरी मुर्खता तिन्हां बै थोड़ी देरी री तैंईंयैं मज़त केरनी, किबैकि ज़ैण्ढै लोकै पछ़ियाणै कि यन्नेस होर यम्ब्रेसै मूर्ख ती, सैभी लोकै पछ़ियाणनै कि ते मूर्ख सी।

¹⁰पर तू पूरी तैरहा जाँणा सा कि हांऊँ कि सिखा सा, होर कैण्ढै रौहा सा, ज़िन्दगी न मेरा उदेश्य कि सा, होर हांऊँ कि बशाह केरा सा। तू जाँणा सा हांऊँ सैभी किस्मा रै लोका री तैंईंयैं धीरजवान होर झ़ुरी केरनु आल़ा रौहू सा, मैं परेशानी सौही,

¹¹लोकै हांऊँ सताऊ ज़ुणी सैंघै मुँभै बड़ी तकलीफ हुई होर तू ऐण्ढै खतरनाक च़ीजा रै बारै न जाँणा सा ज़ो लोकै मुँभै अन्ताकिया होर इकुनियुम होर लुस्त्रा रै शैहरा न केरी होर मैं तौखै कैण्ढै सताव सौहै।

¹²पर ज़ेतरै मसीह यीशु न भक्ति सैंघै ज़िन्दगी बिताणा चाहा सी तिन्हां सैभी सताइणा,

¹³पर दुष्ट होर तिन्हां धोखेवाज लोका होर भी बुरै कोम केरनै। तिन्हां लोका बै धोखा देणा होर तिन्हां आपु होरी रै ज़रियै धोखा खाँणा।

¹⁴पर तू इन्हां गैला पैंधै ज़ो तैं सिखी ती होर तैं बशाह केरू ती, ऐ ज़ाणिया मजबूत रौह कि, तैं ते कुणी लोका न सिखी ती,

¹⁵वचपना न ही तू पवित्र शास्त्रा बै जाँणा सा कि मसीह न बशाह केरनै होर उद्धार पाणै री तैंईंयैं बुद्धि देणै लायक सा।

¹⁶पूरा पवित्र शास्त्र परमेश्वरै री प्रेरणा सैंघै बणाउआ सा होर उपदेश, समझ़ाणै होर सुधारणै होर धर्मै री शिक्षै री तैंईंयैं फायदैमँद सा,

¹⁷ताकि परमेश्वरा रा जन हर किस्मा रै भलै कोम केरनै री तैंईंयैं लायक होर त्यार होला।