Read Pahari, Kullu 2 तीमुथियुस 4 Bible Online

2 तीमुथियुस 4 - Pahari, Kullu bible

2 तीमुथियुस 4

¹ज़ैबै मसीह यीशु राजा रै रूपा न राज़ केरदै ऐणा, तेई तिन्हां दुई लोका रा न्याय केरना, ज़ो ज़िन्दै सी होर ज़ो मूँऐंदै सी। तैबै, परमेश्वर होर मसीह यीशु बै मौजूद ज़ाणिया हांऊँ तौ न बड़ी नम्रता सैंघै अर्ज़ा केरा सा।

²कि तू परमेश्वरा रै वचना बै प्रचार केर होर हर बौगत त्यार रौह। सैभी किस्मै री सहनशीलता होर शिक्षा सैंघै डाँट होर समझ़ा।

³किबैकि ऐण्ढा बौगत ऐणा कि लोकै रै खरा उपदेश नी सौहिणा पर आपणी पसन्दै री गैला शुणनै होर तिन्हां सन्तुष्टि पाणै री तैंईंयैं ढेर सारै उपदेशक कठा केरनै।

⁴होर आपणै कोन सच़ाई न फेरिया बेकारा री कहाणी धिराबै लाणै।

⁵पर तू सैभी गैला न होशियार रौह, दु:ख सौह, खुशी रै समादा रै प्रचारा रा कोम केर होर सौ सैभ कोम ज़ो परमेश्वरै तौभै धिनै सी तिन्हां बै पूरा केर।

⁶किबैकि मेरी ज़िन्दगी होर परमेश्वरा री तैंईंयैं कोम पैहलै ही खत्म होंदै लागै सी किबैकि हांऊँ जाँणा सा कि मूँ छ़ेकै ही मौरणा।

⁷एक शोभलै सैनिका सांही ज़ो एक लड़ाई न लड़ाई बै कैधी नैंई छ़ौड़दा, मैं भी मसीह री तैंईंयैं कड़ी मेहनत केरनी कैधी नैंई छौड़ी। मैं सौ कोम पूरा केरु सा ज़ो मसीह यीशुऐ मुँभै केरनै बै धिना ती। मैं इमानदारी सैंघै खुशी रै समादा रा प्रचार केरू सा।

⁸भविष्य न मेरी तैंईंयैं धर्मा रा सौ मुकट रखू सा, ज़ुण प्रभु, ज़ो धर्मी होर न्यायी सा मुँभै तेई ध्याड़ै न देणा होर सिर्फ़ मुँभै केल्है नी बल्कि तिन्हां सैभी बै भी ज़ो तेइरै प्रगट होंणै बै प्रिय जाँणा सी।

⁹मूँ हागै छ़ेकै ऐणै री कोशिश केर।

¹⁰किबैकि देमासै ऐसा दुनिया बै प्रिय ज़ाणिया हांऊँ छ़ौड़ू सा होर थिस्सलुनीक शैहरा बै नौठा सा होर क्रेसकेंस गलातिया प्रदेशा बै होर तीतुस दलमतिया प्रदेशा बै नौठा सा।

¹¹सिर्फ़ लूका मूँ सैंघै सा, ज़ैबै तू ऐला मरकुसा बै भी सैंघै आंण किबैकि सेवा केरनै री तैंईंयैं सौ मेरै बड़ै कोमा रा सा।

¹²तुखिकुस मैं इफिसुसा शैहरा बै भेज़ू सा।

¹³ज़ैबै तू ऐला, ता सौ कोट आंण ज़ो मैं करपुसा रै घौरा त्रोआस शैहरा न छ़ौड़ू ती। मेरी पौथियां भी आंण, खास केरिया ज़ो बौकरी रै च़बड़ै न बणी री सा।

¹⁴सिकन्दर लौहारै मूँ सैंघै बोहू बुराई केरी सा। प्रभु तेइरै बुरै कोमै रै मुताबक तेइबै बदला देणा।

¹⁵तू भी तेईन होशियार रौह किबैकि तेइयै मसीह रै बारै न आसरी शिक्षा रा बड़ा बरोध केरू।

¹⁶पैहली बार मुँभै औखै रोम शैहरा न न्यायधीशा रै सामनै खड़ा होंणा पौड़ू ताकि तिन्हां लोका बै जवाब देई जाई सकला, ज़ुणियै मुँभै गलत कोम केरनै रा इल्ज़ाम लाऊ ती, कोई भी मेरै पक्षा न गुआही देणै नी आऊ। एथा रै बजाय, तिन्हैं सैभियै हांऊँ छ़ौड़ू, हांऊँ प्रार्थना केरा सा कि परमेश्वर तिन्हां बै मुँभै छ़ौड़नै री तैंईंयैं माफ केरै।

¹⁷पर प्रभु मेरा सहायक रौहू होर सामर्थ धिनी ताकि मेरै द्वारा खुशी रै समादा रा पूरा-पूरा प्रचार होला होर सैभ होरी ज़ाति ज़ो अदालता न सा शुणली; होर तेइयै हांऊँ ता शेरै रै मुँहा न छ़ुड़ाउआ सा।

¹⁸होर प्रभु हांऊँ हर एकी बुरै कोमा न छुड़ाणा होर आपणै स्वर्ग राज्य न उद्धार केरिया पजाणा। तेइरी महिमा ज़ुग-ज़ुग होंदी रौहली। आमीन।

¹⁹प्रिसका होर अक्विला बै होर उनेसिफुरूसै रै घरानै बै मेरा नमस्कार।

²⁰इरास्तुस कुरिन्थियुस शैहरा न रौहू होर त्रुफिमुस मैं मिलैतुस शैहरा न बीमार छ़ौड़ू सा।

²¹हिऊँदा न पैहलै ऐणै री कोशिश केर। यूबूलुस होर पूदेंस, लीनुस होर कलौदिया होर सैभी विश्वासी भाई रा तौभै नमस्कार।

²²हांऊँ प्रार्थना केरा सा कि प्रभु तुसा सैंघै रौहै होर तिन्हरा अनुग्रह भी तुसा पैंधै होंदा रौहला।