Read Pahari, Kullu तीतुस 1 Bible Online

तीतुस 1 - Pahari, Kullu bible

तीतुस 1

¹हांऊँ पौलुस ऐ चिट्ठी लिखदा लागा सा ज़ो परमेश्वरा रा दास होर यीशु मसीह रा एक प्रेरित सा, हांऊँ परमेश्वरा रै चुनेदै लोका रै बशाह बै मजबूत केरनै होर तिन्हां बै यीशु मसीह री सच़ाई बै जाणनै री तैंईंयैं मज़त केरनै री तैंईंयैं चुनु सा ताकि ते ऐण्ढी ज़िन्दगी ज़ीलै ज़ुणी सैंघै परमेश्वरा रा आदर हो।

²नतीज़ै रै तौरा पैंधै, ते हमेशा री तैंईंयैं परमेश्वरा सैंघै रौहणै री आश केरा सी किबैकि परमेश्वर ज़ो कैधी झूठ नैंई बोलदा, तेइयै दुनिया बनाणै न पैहलै वायदा केरू ती कि तेइरै लोका हमेशा री तैंईंयैं ज़िन्दै रौहणा।

³पर ऐबै ठीक बौगता पैंधै परमेश्वरै ऐ खुशी रा समाद आसाबै प्रगट केरू, होर आसै ऐ सैभी बै प्रचार केरा सी। परमेश्वर आसरै उद्धार केरनु आल़ै तेइरी तैंईंयैं मुँभै कोम केरनै बै हुक्म देंदेआ ऐ ज़िम्मैबारी धिनी सा।

⁴हांऊँ ऐ चिट्ठी तीतुसा बै लिखा सा। तुसै मेरै बेटै सांही सी किबैकि तुसै मसीह न बशाह केरा सी ज़ैण्ढै हांऊँ केरा सा। हांऊँ प्रार्थना केरा सा कि पिता परमेश्वर होर आसरै प्रभु यीशु मसीह री तरफा न तुसाबै अनुग्रह, दया होर शान्ति मिलदी लोड़ी रौही।

⁵मैं तैबै तू क्रेता टापू न छ़ौड़ू ती, ताकि तू आसरै कोमा बै पूरा केरी सकलै तौखलै हर शैहरा न स्याणै बै नियुक्त केरी सकै, ज़ैण्ढै कि मैं तौभै केरनै बै बोलू ती।

⁶ज़ो निर्दोष होर एकी लाड़ी रा लाड़ा होलै, ज़ुणिरै शोहरू बिश्वासी होलै, होर ज़ुणीन लुचपन होर हुक्म नी मनणै रा दोष नैंई होला।

⁷किबैकि अगुवा बै परमेश्वरै रा भण्डारी होंणै री तैंईंयैं निर्दोष हुआ लोड़ी; न हठी, न झ़िक केरनु आल़ा, न पीणू आल़ा, न मारनू आल़ा, होर न नीच कमाई रा लोभी।

⁸पर पाहुणच़ारी केरनु आल़ा, भलाई बै चाहणु आल़ा, सँयमी, न्याय केरनु आल़ा, पवित्र होर आपणै आपु बै बशा न केरनु आल़ा।

⁹तेइबै इमानदारी सैंघै तेई सन्देशा रा पालन केरना चेहिऐ ज़ो विश्वासयोग्य सा होर ज़ो ऐई वचना न सहमत सा होर ज़ो लोकै तेइबै सिखाऊ सा। तेई आपणी खरी शिक्षा न दुज़ै री मज़त केरनी होर सच़ी शिक्षा रा बरोध केरनु आल़ै बै सही केरना।

¹⁰हांऊँ ऐ बोला सा किबैकि बोहू सारै लोका खरी शिक्षा रै खिलाफ़ विद्रोह केरना ज़ो बकवास सिखा सी, होर ज़ो होरी बै धोखा देआ सी। खास केरिया ऐ किछ़ यहूदी री तैंईंयैं सच़ सा ज़ो विश्वासी बणै सी।

¹¹इन्हां लोका बै सिखाणै रा हुक्म मता देआ, ऐ लोका नीच कमाई री तैंईंयैं गलत गैला सिखाईया घौरै रै घौर बिगाड़ै सी।

¹²क्रेती टापू रा एक मांहणु सा ज़ुणिबै ते बुद्धिमान मना सी, तेई बोलू, “क्रेतै टापू रै लोक हमेशा झूठ बोला सी। ते जंगली पशु सांही बर्ताव केरा सी। ते आलसी होआ सी होर हमेशा बोहू खाँणा खा सी।”

¹³ऐ गैला क्रेतै लोका रै बारै न ऐबै भी सच़ सा, तैबै तिन्हां बै सखती सैंघै च़िताऊणी देआ, कि ते मसीह यीशु रै बारै सच़ी शिक्षा पैंधै बशाह केरलै।

¹⁴होर यहूदिया री बेकारै री कहाणी होर तिन्हां मांहणु रै हुक्मा पैंधै मन मता लांदै, ज़ो सच़ाई न भट्टकी जा सी।

¹⁵च़ोखै मांहणु री तैंईंयैं सैभ चिजा च़ोखी सी, होर अविश्वासी री तैंईंयैं किछ़ भी च़ोखा नैंई ऑथि पर तिन्हरी बुद्धि होर विचार दुऐ छ़ोतले सी।

¹⁶ऐ झ़ूठी शिक्षा देणु आल़ै बोला सी, कि आसै परमेश्वरा बै जाँणा सी, पर आपणै कोमा न तेइरा इन्कार केरा सी, किबैकि ते बुरै होर हुक्म नी मनणु आल़ै सी: होर कोई शोभलै कोमा रै लायक नी ऑथि।