Read Pahari, Kullu तीतुस 2 Bible Online

तीतुस 2 - Pahari, Kullu bible

तीतुस 2

¹पर ज़ैण्ढै कि तेरी तैंईंयैं तीतुस तौभै विश्वासी बै सौऐ सिखाणा चेहिऐ ज़ो सच़ी शिक्षा रै लायक सा।

²खापरै मर्दा, बै होशियार, गम्भीर होर संयमी होर तिन्हरा बशाह होर झ़ुरी होर धिरज पक्का हो।

³ऐण्ढी तैरहा खापरी बेटड़ी रा बर्ताव ऐण्ढा हो कि ते ज़ो किछ़ भी केरली तेथा न परमेश्वरा रा आदर हो, ते दोष लाणु आल़ी होर पियक्कड़ नैंई; पर शौभली गैला सिखाणु आल़ी हो।

⁴ताकि ते जुआन बेटड़ी बै सलाह देंदी रौहली, कि आपणै लाड़ै होर बाल-बच्चै सैंघै झ़ुरी रखली।

⁵होर संयमी, पतिव्रता, घौरा रा कोम काज़ केरनु आल़ी, खरी होर आपणै-आपणै लाड़ै रै अधीन रौहणु आल़ी हो, ताकि परमेश्वरै रै वचनै री निन्दा नैंई लोड़ी हुई।

⁶ऐण्ढी तैरहा तू ज़ुआन मर्दा बै भी समझ़ा कि ते सँयमी हो।

⁷सैभी गैला न आपणै आपु बै खरै कोमै रा नमूना बणा; तेरी शिक्षा शोभली होर गम्भीर

⁸होर ऐण्ढै खरा हुआ लोड़ी, कि कोई बुरा नैंई बोली सकला; ज़ुणी सैंघै कोई बरोधी आसा पैंधै दोष लाणै रा मौका नी पाईआ शर्मिन्दा होला।

⁹विश्वासी ज़ो नोकर सी तिन्हां बै सिखा कि ते सैभ किछ़ केरै ज़ो तिन्हरै मालक तिन्हां बै केरनै बै बोलै। तिन्हां बै हर च़ीजा न खुश केरनै कोशिश केरा होर तिन्हां सैंघै बैंहस न केरै।

¹⁰च़ोरी च़लाकी मता केरा; पर सैभी तैरहा न पूरै विश्वासी निकलै, कि ते सैभी गैला न आसरै उद्धारकर्ता परमेश्वरै री शिक्षा री शौभा बढ़ाऐ।

¹¹परमेश्वरै सैभी लोका बै बच़ाणै री तैंईंयैं एक बौत रिहाईया आपणा अनुग्रह रिहाऊ।

¹²ऐई अनुग्रह रै ज़रियै परमेश्वर आसाबै याद दिला सा, कि आसै अभक्ति होर दुनिया री अभिलाषा न मन फेरिया ऐई ज़ुगा न संयमी होर धर्मा सैंघै भक्ति री ज़िन्दगी बितालै।

¹³होर तेसा धन्य आशा री मतलब आपणै महान परमेश्वर होर उद्धारकर्ता यीशु मसीह री महिमा रै प्रगट होंणै रा इंतज़ार केरदै रौहा सी।

¹⁴ज़ुणियै कि आसरी तैंईंयैं आपणा बलिदान केरु, कि आसाबै सैभी प्रकारै रै पापा न छुटकारा, होर च़ोखै केरिया आपणी तैंईंयैं एक ज़ाति बणाले ज़ो खरै कोम केरनै री बोहू इच्छा रखा सी।

¹⁵पूरै अधिकारा सैंघै इन्हां गैला बोलीत् होर समझाई होर सिखाँदै रौहित् कोई तुसै तुच्छ नी लोड़ी बुझ़ै।