Read Pahari, Kullu फिलेमोन 1 Bible Online

फिलेमोन 1 - Pahari, Kullu bible

फिलेमोन 1

¹हांऊँ पौलुस ऐ चिट्ठी लिखदा लागा सा। हांऊँ कैदा न सा किबैकि हांऊँ यीशु मसीह रै बारै न प्रचार केरा सा। हांऊँ होर आसरा सैंघी विश्वासी तीमुथियुस तौभै नमस्कार केरा सी। फिलेमोन आसरै प्यारे सैंघी होर आसा सैंघै कोम केरनु आल़ै हांऊँ तौभै लिखदा लागा सा।

²हांऊँ आसरी विश्वासी बैहण अफफिया, होर विश्वासी भाई अर्खिप्पुसा बै भी लिखदा लागा सा ज़ो एक सैनिका सांही प्रभु री सेवा केरा सा, होर मण्डली बै ज़ो तुसरै घौरा कठा होआ सा।

³हांऊँ प्रार्थना केरा सा कि परमेश्वर आसरा पिता होर आसरै प्रभु यीशु मसीह तुसाबै अनुग्रह होर शान्ति दै।

⁴ज़ैबै भी हांऊँ प्रार्थना केरा सा हांऊँ तुसरी तैंईंयैं परमेश्वरा रा धन्यवाद केरा सा होर आपणी प्रार्थना न भी तौभै याद केरा सा।

⁵किबैकि हांऊँ प्रभु यीशु ना तुसरा बशाह होर सैभी पवित्र लोका री तैंईंयैं झ़ुरी रै बारै न शुणा सा।

⁶हांऊँ प्रार्थना केरा सा कि ज़ो संगती तु विश्वासी सैंघै रखा सा सौ बढ़ै, ताकि तुसै पूरी तैरहा तिन्हां गैला बै समझी सकलै ज़ो परमेश्वरै आसाबै धिनी सा। होर ऐ मसीह री महिमा री तैंईंयैं हो।

⁷किबैकि हे सैंघी मुँभै तेरी झ़ुरी न बड़ा आनन्द होर शांति मिली, तैबै कि तेरै द्वारा पवित्र लोका रै मन होरै-भरै हुऐ सी।

⁸तैबै अगर मुँभै मसीह न बड़ी हिम्मत सा कि ज़ो गैल ठीक सा, तेइरा हुक्म तौभै देनू।

⁹तैबै भी मुँभै खापरै पौलुसा बै ज़ो ऐबै बी मसीह यीशु री तैंईंयैं कैदी सा, ऐ होर बी बड़ा शोभला लागा सा कि झ़ुरी सैंघै प्रार्थना केरनु।

¹⁰हांऊँ उनेसिमुसै री तैंईंयैं अर्ज़ केरदा लागा सा, ज़ुण मेरी तैंईंयैं शौहरू सांही सा। ज़ैबै हांऊँ कैदा न ती, सौ मसीह न मेरा शोहरु बणु।

¹¹सौ ता पैहलै तेरै कोई कोमा रा नैंई ती, पर ऐबै आसरै होर तुसरै बड़ै कोमा रा सा।

¹²तेइबै मतलब ज़ो मेरै दिला रा टुकड़ा सा, मैं तुसा हागै बापस भेजुन्दा सा।

¹³ज़ैबै हांऊँ कैदा न सा, हांऊँ तेइबै औखै मूँ सैंघै खुशी रै समादा रा प्रचार केरनै न मेरी मज़त केरनै री तैंईंयैं रखणा चाहा सा। सौ औखै मेरी मज़त केरनै री तैंईंयैं तुसरी ज़ैगा लेई सका सा, किबैकि मुँभै पता सा तुसै मेरी मज़त केरना चाहा सी।

¹⁴पर मैं तुसरी इच्छा बगैर किछ़ भी केरना नैंई चाहू, कि तुसरी ऐ मज़त ज़बरदस्ती नैंई पर खुशी सैंघै होली।

¹⁵शायद ऐ बजहा सा कि परमेश्वरै उनेसिमुसा बै थोड़ै बौगता री तैंईंयैं तुसा न दूर भगणै रा हुक्म धिना ताकि सौ मसीह पैंधै बशाह केरै, होर नतीज़ै रै तौरा पैंधै सौ हमेशा तुसा सैंघै रौहला।

¹⁶पर ऐबै सिर्फ़ तेरा नोकर ही नैंई होंणा। सौ एक नोकरा न बढ़ीकेरिया सा। सौ ऐबै तेरा प्यारा विश्वासी भाई सा। हांऊँ तेइबै बड़ी झ़ुरी केरा सा, पर तुसाबै नोकरा रै रूपा न होर भी ज़ादा झ़ुरी केरनी चेहिऐ, किबैकि सौ मसीह न एक भाई सा।

¹⁷अगर तू मुँभै आपणा सैंघी बूझा सा, ज़ैबै उनेसिमुस तुसा हागै वापस एज़ा सा ता, तेइरा खुशी सैंघै बर्ताव केरा ज़ैण्ढै तुसै मेरा स्वागत केरा सी।

¹⁸होर अगर तेइयै तुसरा किछ़ नुकसान केरूदा सा, या अगर सौ किछ़ च़ीजा री तैंईंयैं तुसरा ऋणी सा ता मूँ तेइरा भुगतान केरना।

¹⁹हांऊँ पौलुस आपणै हौथा सैंघै लिखा सा कि हांऊँ आपुऐ भौरना, तुसै पैहलै न जाँणा सा कि अगर मैं तुसरी मज़त नैंई केरी होन्दी ता तुसा आपु नोंऊँई ज़िन्दगी नैंई पाई सकदै ती, तैबै तुसै आपणी ज़िन्दगी रै मूँ न ऋणी सी।

²⁰हे सैंघी, ऐ खुशी मुँभै प्रभु न तेरी तरफा न मिले। मसीह न मेरै ज़ीऊ बै हौरा-भरा केर।

²¹हांऊँ तेरै हुक्मा रै होंणै रा भरोसा रखिया तौभै लिखा सा, ऐ जाँणा सा कि ज़ो किछ़ हांऊँ बोला सा, तू तेइन भी ज़ादा केरला।

²²होर एक होर गैल सा कि मेरै रौहणै तैंईंयैं आपणै घौरा न एक कमरा त्यार रखा। मुँभै आशा सा कि प्रार्थना रै ज़रियै हांऊँ तुसाबै देइणा।

²³इपफ्रास ज़ो मसीह यीशु न मूँ सैंघै कैदी सा,

²⁴होर मरकुस होर अरिस्तर्खुस होर देमास होर लूका ज़ो मूँ सैंघै प्रभु रा कोम केरा सी, तिन्हरा तौभै नमस्कार।

²⁵हांऊँ प्रार्थना केरा सा कि प्रभु यीशु मसीह रा अनुग्रह तुसा पैंधै हो। आमीन।