Read Pahari, Kullu इब्रानियों 1 Bible Online

इब्रानियों 1 - Pahari, Kullu bible

इब्रानियों 1

¹पैहलकै ज़ुगा न परमेश्वरै बुज़ुर्गा सैंघै कई बार अलग-अलग तरीकै न भविष्यवक्तै रै ज़रियै गैला केरी,

²इन्हां आखरी रोजा न आसा सैंघै बेटै रै ज़रियै गैला केरी परमेश्वरै आपणै बेटै रै ज़रियै सृष्टि बणाई होर तेइयै सौ सारी च़ीज़ा रा वारिस ठहराऊ।

³बेटा ही परमेश्वरा री महिमा रा प्याशा सा तेथा न आसै हेरा सी कि परमेश्वर कैण्ढा सा होर सैभ च़ीज़ा बै आपणी शक्ति रै हुक्मा सैंघै सम्भाल़ा सा। तिन्हैं लोकै रै पाप च़ोखै केरै होर फिरी तै स्वर्गा न परमेश्वरा री महिमा रै दैहिणी धिरै ज़ाइआ बेठा,

⁴होर तैबै परमेश्वरै बेटै बै एक नाँ धिना ज़ो कि स्वर्गदूता न बोहू बड़ा सा ज़ुणिरै ज़रियै आसै हेरा सी कि बेटा तिन्हरै मुकाबले बोहू बड़ा सा।

⁵शास्त्रा न कोइयै कैधी ऐ नी दसू कि परमेश्वरै कोई बी स्वर्गदूता बै बोलू पर तेइयै आपणै बेटै बै कि बोलू “तुसै मेरै बेटै सी, औज़ मैं सैभी बै दसू कि हांऊँ तुसरा पिता सा!” होर तेइयै कोई बी स्वर्गदूता रै बारै न कैधी नैंई बोलू कि “तेइयै आपणै बेटै रै बारै न एक होर शास्त्रा रै पैहरै न कि बोलू: हांऊँ तेइरै पिता बणना, होर तेई मेरै बेटै होंणा?”

⁶होर परमेश्वर आपणा ज़ेठा बेटा दुनिया न भेज़णै न ठीक पैहलै ता बोलू सा कि, “परमेश्वरै रै सारै स्वर्गदूत तेइबै ज़ो प्रणाम केरलै।”

⁷होर स्वर्गदूतै रै बारै न बोला सी कि, “सौ आपणै दूता बै बागरी सांही बणा सा, होर आपणै सेवका बै भौकदी औगी सांही बणा सा।”

⁸पर बेटै बै बोला सा, “हे परमेश्वर तेरा राज्य जुगा-जुगा तैंईंयैं रौहणा। तौ धर्मा सैंघै आपणै राज्य न राज़ केरना।

⁹तुसाबै सही कोम केरना शोभला लागा सा होर बुरै कोम केरनै न तुसै नफरत केरा सी। एसा बजहा न तेरै परमेश्वरै तेरै सैंघी न ज़ादा खुशी होर आदर धिना।”

¹⁰होर शास्त्र बी बोला सा कि, “हे प्रभु शुरू न तैं दुनिया री मनियाद पाई, होर तुसै आसमाना न सैभ किछ़ बणाऊ सा।

¹¹तिन्हां ता नाश होंणा पर; तौ हमेशा बणी रौहणा होर तिन्हां झिकड़ै सांही पराणै होंणा।

¹²होर तौ ते च़ादरा सांही लपेटणै; तिन्हां झिकड़ै सांही बदलिणा। पर तू हमेशा सौहै सा, होर तौ हमेशा ज़िन्दै रौहणा।”

¹³होर परमेश्वरै कैधी बी कोई बी स्वर्गदूता बै नैंई बोलू, “तू मेरी दैहिणी धिरै बेश, ज़ाँ तैंईंयैं कि हांऊँ तेरै बैरी बै तेरै अधीन न केरनु?”

¹⁴फिरी, स्वर्गदूत कि केरा सी? तै सौ सी ज़ो परमेश्वरा री सेवा केरा सी, तिन्हां बै उद्धार पाणु आल़ै लोका री सेवा री तैंईंयैं भेज़ूदा सा।