Read Pahari, Kullu इब्रानियों 11 Bible Online

इब्रानियों 11 - Pahari, Kullu bible

इब्रानियों 11

¹बशाह आशा केरूईदी च़ीज़ा रा पक्का सा होर अनदेखी च़ीज़ा रा सबूत सा।

²आसरै बुज़ुर्गा रा ऐण्ढा बशाह ती। एथा बजहा न सिर्फ़ परमेश्वर तिन्हां न खुश ती।

³बशाह न आसै जाँणा सी कि सारी सृष्टि री रचना परमेश्वरै रै वचनै रै द्वारा हुई सा। ऐण्ढा नी ऑथि कि ज़ो किछ़ हेरनै न एज़ा सा सौ हेरूईदी च़ीज़ा न बैणूदा होला।

⁴बशाह सैंघै आदमा रा शोहरू हाबिलै परमेश्वरै री तैंईंयैं आपणै बड़ै भाई कैना न उतम बलि च़ढ़ाई होर तेसा बलि री बजहा न परमेश्वरै हाबिल धर्मी मांहणु केरिया ग्रहण केरू। किबैकि परमेश्वरै तेइरी बलि न खुश ती, हालांकि हाबिल मूँआ सा, आसै हाज़ी बी परमेश्वरा पैंधै बशाह केरनै रै बारै न तेइन सिखा सी।

⁵बशाह सैंघै हनोक नाँ रा एक मांहणु ज़िन्दा स्वर्गा बै च़कुआ ताकि सौ मौऊती बै महसूस नैंई केरी सकलै, होर कोई बै तेइरा पता नी च़लू; किबैकि तेइयै परमेश्वरै बै च़किणै न पैहलै सौ खुश केरू ती।

⁶होर बशाह बगैर परमेश्वरा बै खुश केरना अनहोना सा किबैकि परमेश्वरा हागै ऐणु आल़ै बै ऐ बशाह केरना ज़रूरी सा कि परमेश्वर सा होर ज़ो तेइबै सच़ाई सैंघै तोपा सी सौ तिन्हां बै ईनाम देआ सा।

⁷बशाह सैंघै नूह नाँ रै एक मांहणुऐ तिन्हां गैला रै बारै न ज़ो तेई बौगतै हेरिदी नी ती ऑथि च़िताऊणी पाईआ आदरा सैंघै आपणै टबरा बै बच़ाणै री तैंईंयैं पाणी रा ज़हाज़ बणाऊ होर नूह रै बशाह न पैहलै, बाकी लोक ज़ो बशाह नैंई केरा ती, ते दोषी ठहराऐ होर नूहा रै बशाह री बजहा न परमेश्वरै सौ धर्मी ठहराऊ।

⁸बशाह सैंघै अब्राहम नाँ रा एक मांहणु ज़ैबै परमेश्वरै सौ एकी ज़ैगा जाणै री तैंईंयैं शाधु ता परमेश्वरै रा हुक्म मनिया ऐण्ढी ज़ैगा बै निकता ज़ो परमेश्वर तेइबै विरासता रै रूपा न तेइबै देणु आल़ा ती होर ऐ नी ती ज़ाणदा कि हांऊँ कौखै बै च़लू सा तैबै भी निकता।

⁹बशाह सैंघै तेइयै वायदै केरूऐदै पराऐ देशा न रौहिया तेइरै इसहाक होर याकूब नाँ रै दुई बेटै समेत ज़ो तेई सैंघै तेई वायदै रै वारिस ती तोम्बू न रौहै।

¹⁰किबैकि सौ पक्की मनियादी आल़ै तेई नगरा रा इंतज़ार केरा ती, ज़ौसरा सोच़नू आल़ा होर बनाणु आल़ा परमेश्वर सा।

¹¹बशाह सैंघै सारा नाँ री बेटड़ियै खापरी होईया भी परमेश्वरा न गर्भ धारण केरनै री शक्ति पाई किबैकि ज़ो वायदा परमेश्वरै केरू ती सौ तेइबै केरला तेसा बै पक्का बशाह ती।

¹²ऐसा बजहा न एकी मांहणु न ज़ो मूँऐंदै सांही ती (बोहू खापरा ती), आसमानै रै तारै होर समुद्रै रै बालू सांही अनगिनत औलाद पैदा केरै।

¹³परमेश्वरा पैंधै बशाह केरनु आल़ै ऐ सारै लोक बगैर वायदै प्राप्त केरै मूँऐ, पर तिन्हां बै दूरा न हेरिया खुश हुऐ होर मैनू कि आसै धौरती न परदेशी होर नज़ाण सी।

¹⁴ज़ो ऐण्ढी गैला केरा सी, तै प्रगट केरा सी कि तै आपणै देशै री खोजा न सी।

¹⁵होर ज़ुणी देशा न तै निकल़िया आऐ ती अगर तेथै री याद केरदै ता तिन्हां हागै वापस ज़ाणै रा मौका ती।

¹⁶पर तै एक उतम स्वर्गीय देशा पैंधै आश रखा सी। एसा बजहा न परमेश्वर तिन्हरै परमेश्वर कहलाणै न खुश सा। किबैकि परमेश्वरै तिन्हरी तैंईंयैं एक नगर त्यार केरू सा।

¹⁷बशाह सैंघै अब्राहमै परीक्षै रै बौगतै इसहाक नाँ रै आपणै बेटै री बलि च़ढ़ाणै री तैंईंयैं नेंदा लागा ती। होर अब्राहम सौ मांहणु ती ज़ुणिबै परमेश्वरै वायदा केरू ती, फिरी बी सौ आपणै इकलौते बेटै री बलि च़ढ़ाणै री तैंईंयैं त्यार ती।

¹⁸होर ज़ुणिबै ऐ बोलू ती, “ऐ सिर्फ़ तेरै बेटै इसहाका न तेरा खानदान होंणा ज़ो मैं वायदा केरू।”

¹⁹किबैकि तेइबै पक्का बशाह ती कि परमेश्वर लोका बै ज़िन्दा केरी सका सा। ऐ सिर्फ़ इसहाका बै मौऊती न वापस आंणनै ज़ैण्ढा ती।

²⁰बशाह सैंघै इसहाकै आपणै दुई बेटै याकूब होर एसावा बै ऐणु आल़ी गैलै रै बारै न आशीष धिनी।

²¹बशाह सैंघै याकूबै मौरदी घेरै यूसुफै रै दुही बेटै बै आशीष धिनी होर आपणै शोठै रा सहारा लेइया परमेश्वरा बै प्रणाम केरू।

²²बशाह सैंघै यूसुफै ज़ैबै सौ मौरनू आल़ा ती ता इस्राइली लोका बै मिस्रा न निकलणै रै बारै न बोलू, होर तिन्हैं सैंघै आपणै अस्तु नेणै रै बारै न हुक्म धिना।

²³विश्वासा सैंघै मूसै रै आमा-बापुऐ सौ पैदा होंणै न बाद त्रा म्हीनै तैंईंयैं छुपाईया रैखू किबैकि तिन्हैं हेरू कि शोहरु बाँका सा, होर तै राज़ै रै हुक्मा न नी डौरै।

²⁴बशाह न ही मूसै स्याणै होईया फिरौनै री बेटी रा शोहरू कहलाणै न नाँह केरू।

²⁵किबैकि तेइबै पापा न सुख भोगणै न परमेश्वरै रै लोका सैंघै दु:ख भोगणा शोभला होर उतम लागा।

²⁶होर मसीह री बजहा न निन्दित होंणा, मिस्रै रै भण्डारा न बड़ा धन समझू किबैकि सौ आपणा ईनाम पाणै री तैंईंयैं इंतज़ार केरदा लागा ती।

²⁷बशाह सैंघै सौ राज़ै री झ़िका न नी डौरू होर मिस्र देश छौड़ू, किबैकि सौ अनदेखै परमेश्वरा बै हेरिया मजबूत रौहू।

²⁸बशाह सैंघै मूसै इस्राइली रै लोका बै चौखटा पैंधै भेड़ा रा लोहू छिड़किया फसह रा त्यौहार मनाणै रा हुक्म धिना ताकि पैहली औलादा रा नाश केरनु आल़ा दूत, इस्राइली री पैहली औलादा बै छुई नैंई सकलै।

²⁹बशाह सैंघै इस्राइली रै लोक लाल समुन्द्रा न ऐण्ढै उतरै ज़ैण्ढा कि ते शुकी धौरती पैंधै च़लै होलै होर ज़ैबै मिस्रै रै लोकै तैण्ढा केरना चाहू ता तै सैभ डूबै।

³⁰बशाह सैंघै ज़ैबै तिन्हैं यरीहो शैहरा री दीवारा रै सौत रोज़ा तैंईंयैं चकर पूरै केरै ता सौ ढौल़ी। ज़ैण्ढा कि परमेश्वरै बोलू ती सौ केरला।

³¹राहाब नाँ री वैश्यै बशाह केरू ता सौ परमेश्वरा रै हुक्म नी मनणु आल़ै सैंघै नाश नी हुई किबैकि तेसै इस्राइली जासूसा रा स्वागत केरू ज़ो यरीहो शैहरा बै हेरनै री तैंईंयैं आऐ ती।

³²ऐबै होर कि बोलणू? किबैकि बौगत नी रौहू कि गिदोना रा, बराका रा, शिमशोना रा, यिफतह रा, दाऊदा रा होर शमुएला रा होर भविष्यवक्तै रै बारै न दसनू।

³³इन्हैं बशाह सैंघै राज्य ज़ीतै, धर्मै रै कोम केरै, वायदै री च़ीज़ा प्राप्त केरी होर शेरै रै मुँह बन्द केरै।

³⁴औगी री झ़ौल़ ठण्डी केरी, तलवारी री धारी न बच़ै, कमज़ोरी न शक्तिशाली निकतै, लड़ाई न वीर निकतै होर आपणै दुश्मना रै फौज़ी मारिआ भगाऐ।

³⁵किछ़ बेटड़ियै आपणै मूँऐंदै दबारा ज़िन्दै पाऐ। केतरै ता मार खाँदै-खाँदै मूँऐ होर तिन्हैं आपणा बशाह छ़ौड़ना नैंई चाहू ताकि तै कैदा न छ़ुटलै किबैकि ज़ैबै तै मौरनै न बाद दबारा ज़िन्दै होलै ता तिन्हां बै शोभली ज़िन्दगी मिली सका सा।

³⁶किछ़ लोका रा मज़ाक उड़ाणा होर कोड़ै लाइआ मारै खाँणी पौड़ी ज़ैबैकि किछ़ जंजीरा न बोनुइआ कैदा न पाऐ।

³⁷कई पात्थरै मारै, कई आरै लाइआ च़ीरै, तलवारियै लाइआ मारै। ते गरीबी न दु:ख सौहंदैआ भेड़ होर बौकरी रै खौलड़ै लाइया औरै-पौरै फिरदै रौहै।

³⁸होर बौणा न, रूआड़ा न, ढौगा न होर दुनिया री दरारा न भटकै।

³⁹ऐ पूरी दुनिया इन्हां विश्वासी लायक नी ती ऑथि होर बशाह रै द्वारा इन्हां सैभी रै बारै परमेश्वरै तिन्हां बै हुक्म धिना तैबै बी तिन्हां बै वायदै री च़ीज़ा नी मिली।

⁴⁰किबैकि परमेश्वरै न सिर्फ़ तिन्हरी तैंईंयैं बल्कि आसरी तैंईंयैं बी एक बेहतर योजना बणाई सा। परमेश्वर तिन्हां बै सिद्ध बनाणा चाहा सी, पर सिर्फ़ आसा सैंघै मिलिया।