Read Pahari, Kullu इब्रानियों 6 Bible Online

इब्रानियों 6 - Pahari, Kullu bible

इब्रानियों 6

¹ता एज़ा आसै मसीह रै बारै न शुरूआती शिक्षा पैंधै बार-बार चलना बन्द केरना। एज़ा आसा एथा रै बजाय आगै बढ़ै होर आपणी समझ़ा न पक्के होलै। आसाबै एथा रै बारै न गैला केरनै री जरूरत नैंई ऑथि कि आसै आपणै बुरै कोमा न किबै फिरना चेहिऐ ज़ो मौऊती धिरै बै नेआ सा होर आसाबै परमेश्वरा पैंधै किबै बशाह केरना चेहिऐ।

²तुसाबै बपतिस्मै, हौथ रखणै होर मूँऐंदै रै ज़िन्दै होंणा होर हमेशा रै न्याय रै बारै न होर ज़ादा शिक्षा री जरूरत नैंई ऑथि।

³होर तैबै परमेश्वरै चाहा सा आसा समझ़णै री तैंईंयैं आगै बढ़ना।

⁴किबैकि ज़ो लोका आपणै बशाह बै छ़ौड़ा सी तिन्हां बै दबारा पश्चाताप केरनै री तैंईंयैं नैंई आंणी सकदै, तिन्हैं एक बार परमेश्वरा री सच़ाई पछ़ियाणी ज़ो परमेश्वरा धिरै न एज़ा सा होर स्वर्गा न भेंट होर दुज़ै सैंघै मिलिया पवित्र आत्मा पाई सा।

⁵होर तिन्हैं महसूस केरू ती कि परमेश्वरा रा सन्देश शोभला सा होर तिन्हैं ऐणु आल़ै बौगता री शक्ति महसूस केरी सा।

⁶तै परमेश्वरा न दूर हुऐ सी, तिन्हां बै दबारा वापस आंणनै रा कोई तरीका नैंई ऑथि किबैकि तै आपु दबारा परमेश्वरा रै बेटै बै क्रूसा पैंधै च़ढ़ादै लागै सी होर तेइबै शर्मिंदा केरदै लागै सी। ज़ुणीन दुज़ै मसीह रा मज़ाक उड़ा सी।

⁷शोभली शिक्षा प्राप्त केरनु आल़ै लोक ऐण्ढी ज़मीना सांही सी ज़ौखै गाश हमेशा होंदा रौहा सा। अगर ज़मीन शोभली सा ता ऐ किसाना री तैंईंयैं शोभली फसल आंणा सा होर एथा न परमेश्वरा री आशीष सा।

⁸दुज़ै लोक ऐण्ढी ज़मीना सांही सी सौ ज़िढ़ी झ़ौकड़ पैदा केरा सा होर बेकार सा। ऐ परमेश्वरा रै ज़रियै श्राप देणै रै खतरै न सा होर औगी ना नाश होंणा।

⁹ओ प्यारे भाई बैहणियो, भलै आसै ऐण्ढी तैरहा गैला बै केरा सी, आसै सच़िऐ बशाह नैंई केरदै कि ऐ तुसरी तैंईंयैं लागू होआ सा। आसाबै बशाह सा कि तुसै शोभली च़ीज़ा री तैंईंयैं सा ज़ो उद्धारा सैंघै एज़ा सा।

¹⁰किबैकि परमेश्वर अन्यायी नी ऑथि, कि तुसरै कोम होर तुसरी झ़ुरी बै बिसरला ज़ो तुसै तेइरै नाँ री तैंईंयैं एसा रीतियै रिहाई कि परमेश्वरा रै लोकै री सेवा केरी होर केरदै बी लागै सी।

¹¹आसरी बड़ी इच्छा ऐ सा कि ज़ैबै तैंईंयैं ज़िन्दै सी, तैबै तैंईंयैं तुसै प्यारा सैंघै कोम केरदै रौहा, ताकि तुसै पक्का होई सकलै कि तुसाबै ज़ो आश केरी सा, सौ सच़ होंणी।

¹²तैबै तुसा आलसी नैंई बणना। एथा रै बजाय, तुसा तिन्हां लोका रै उदाहरण मनणै ज़ो तिन्हरै बशाह होर सौहणै री बजहा न परमेश्वरा रै वायदै रा हकदार होंणा।

¹³होर परमेश्वरै अब्राहमा बै वायदा केरदी घेरै कसम खाँणै री तैंईंयैं आपु न बड़ा होर कोई नी मिलू, तैबै परमेश्वरै आपणी कसम खाईया बोलू,

¹⁴“मूँ सच़िऐ तौभै बोहू आशीष देणी होर तेरी औलादा बै बढ़ाँदै जाँणा।”

¹⁵अब्राहमै बोहू बौर्षा तैंईंयैं धीरजा सैंघै इंतज़ार केरू, तैबै परमेश्वरा रा वायदा प्राप्त केरु।

¹⁶ज़ैबै लोका कसम खा सी ता लोक हमेशा आपु न कौसी बड़ै री कसम खा सी। कसम साबित केरा सा ज़ो तै बोला सी, सौ सच़ सा होर ऐ सैभी बैहसा बै खत्म केरा सा।

¹⁷ऐ बजहा सा कि परमेश्वरै एक कसम खाई ती। एथा न सौ तिन्हां लोका बै साफ रीतिऐ रिहाणा चाहा ती ज़ुणी सैंघै वायदा केरू ती कि तेइयै ज़ो बी वायदा केरु सा सौ केरना।

¹⁸ता फिरी औखै दुई गैला सी, तेइरा वायदा होर तेइरी कसम, ज़ो कैधी नैंई बदली सकदी होर ज़ुणिरै बारै परमेश्वर कैधी झ़ूठ नैंई बोली सकदा। तैबै आसै ज़ो परमेश्वरा रै नेड़ सुरक्षा पाणै री तैंईंयैं आऐ सी ज़ो आश तेइयै आसाबै धिनी सा, तेथा बै ढौकिया आसै बोहू उत्साहित सी।

¹⁹ऐ आश ज़ो आसा हागै सा मज़बूत सा होर हिली नैंई सकदी। ऐ आसाबै परमेश्वरा न दूर नैंई जाणै देंदी बल्कि ऐ आसाबै मन्दिरा रै आँध्रै सैभी न पवित्र ज़ैगा परमेश्वर हागै आंणा सा।

²⁰ज़ौखै यीशुऐ आसरी तरफा न आसा न पैहलै स्वर्गा न प्रवेश केरू। सौ मलिकिसिदकै सांही हमेशै री तैंईंयैं महापुरोहित बणु।