Read Pahari, Kullu इब्रानियों 9 Bible Online

इब्रानियों 9 - Pahari, Kullu bible

इब्रानियों 9

¹परमेश्वर होर इस्राइली लोका मौंझ़ै पैहलै वायदै न आराधना होर ऐई दुनिया न आराधना रै तोम्बू री तैंईंयैं नियम ती।

²इस्राइली लोकै एक तोम्बू बणाऊ, तेई तोम्बू न दुई कमरै ती, तोम्बू रै पैहलै कमरै न एक दीऊआ, एक मेज़ होर मेज़ा पैंधै पवित्र रोटी ती। ऐई कमरै बै पवित्र ज़ैगा बोला सी।

³फिरी तौखै एक पर्दा ती, होर परदै रै पिछ़ै एक कमरा ती ज़ुणिबै सैभी न पवित्र ज़ैगा बोला सी।

⁴ऐसा सैभी न पवित्र ज़ैगा न धूप पकेणै री तैंईंयैं इस्तेमाल केरनु आल़ी सुनै री एक वेदी ती। सुनै लाइआ मेढ़ुईदी पवित्र शौठी बी तौखै ती ज़ुणिबै वायदै रा सँदूक बोला ती, तेथा आँध्रै त्राई च़ीज़ा ती। सैभी न पैहलै मन्ना लाइआ भौरूआन्दा सुनै रा मर्तबान ती। फिरी तौखै हारून री च़लणु आल़ी शौठी ती ज़ुणीन टीरा फूटी ती। आखरी न तेथा पैंधै लिखैदै दस हुक्मा री पात्थरा री पौटी ती।

⁵सँदूका पैंधै दुई करूब ती, ज़ो परमेश्वरा री महिमा रै नशाण ती, ज़ुणिरै पाँख सँदूक, प्रायश्चितै री ज़ैगा पैंधै फैलैदै ती। पर हांऊँ इन्हां च़ीज़ा रै बारै न एक-एक केरिआ बखान नैंई केरी सकदा।

⁶इन्हां च़ीज़ा बै ऐण्ढी तैरहा त्यार केरनै न बाद, यहूदी पुरोहित हर रोज़ आपणै धार्मिक कोमा बै केरनै री तैंईंयैं तोम्बू रै पैहलै कमरै न ज़ुणिबै पवित्र ज़ैगा बोला सी, जाया केरा ती।

⁷पर बौर्षा रै एक बारी सिर्फ़ महापुरोहित दुज़ै कमरै न ज़ाई सका ती, ज़ुणिबै सैभी न पवित्र ज़ैगा बोला सी। सौ आपु सैंघै एक बलि केरेदै पशु रा लोहू लेआ ती। होर हमेशा आपणै होर इस्राइली लोका रै पापा री तैंईंयैं ज़ो तिन्हैं भूल चूका न केरी ती बलि च़ढ़ाया केरा ती।

⁸इन्हां नियमा न पवित्र आत्मै दसू सा कि कोई भी तोम्बू रै दुज़ै कमरै न नैंई जाई सकदा, ज़ुणिबै सैभी न पवित्र ज़ैगा बोला ती, ज़ैबैकि पैहला कमरा ज़ुणिबै पवित्र बोला ती, हाज़ी बी आराधना री ज़ैगा ती।

⁹ऐ तोम्बू औज़कै बौगता बै रिहाणै रा एक उदाहरण सा। तोम्बू रै पैहलै कमरै न ज़ुणिबै पवित्र ज़ैगा बोला सी, पुरोहित भेंट होर बलि च़ढ़ा सी सौ लोका रै विचारा बै च़ोखै केरनै लायक नैंई ऑथि ज़ो तिन्हां च़ीज़ा बै आंणा सी।

¹⁰किबैकि ऐ नियम सिर्फ़ आपु बै धोणै री तैंईंयैं खाँणै-पीणै त्यौहार ज़ैण्ढी च़ीज़ा रै बारै न सा। होर शारीरिक च़ीज़ा रै बारै न नियम तैबै तैंईंयैं च़लणा ज़ैबै तैंईंयैं कि तिन्हां नियमा बै किछ़ शोभलै तरीकै सैंघै बदलनै रा बौगत नैंई ऐला।

¹¹तैबै मसीह ऐबै आईदी शोभली च़ीज़ा पैंधै महापुरोहित बणु। तिन्हैं स्वर्गा न तेई बड़ै होर सिद्ध तोम्बू न प्रवेश केरु, ज़ो मांहणु रै हौथा नैंई बणाऊ ती होर ऐ ऐसा बणाईदी दुनिया रा हिस्सा नैंई ऑथि।

¹²बौकरै होर छ़ेलू रै लोहू रै द्वारा नी बल्कि आपणै लोहू रै द्वारा एकै बार सैभी न पवित्र ज़ैगा प्रवेश केरू होर हमेशै री तैंईंयैं छुटकारा पाऊ।

¹³मूसा रै बिधाना रै मुताबक ज़ो लोका छ़ोतले होआ सी तै परमेश्वरै री आराधना केरनै लायक नैंई। फिरी भी ते च़ोखै मनिया सी, अगर तै बौकरै होर बौल्दा रै बलि केरूऐदै लोहू होर बलि केरूऐदै बौकरै री (भौस) छ़ार छ़िड़का सी ता।

¹⁴पर मसीह बगैर पापा रा ती, होर तेइयै आपु बै परमेश्वरा बै हमेशा री तैंईंयैं एक आत्मिक बलिदाना रै रूपा न च़ढ़ाऊ। ऐही बजहा सा कि तेइरा लोहू बोहू शक्तिशाली सा होर आसरै विचारा बै च़ोखा केरा सा। ऐबै आसै ज़िन्दै परमेश्वरै री सेवा केरी सका सी तिन्हां च़ीज़ा बै नैंई केरी सकदै ज़ो मौऊती री बजहा बणा सी।

¹⁵ऐही बजहा सा कि सौ सौऐ सा ज़ो परमेश्वर होर लोका मौंझ़ै बिचवाई केरा सा, ताकि ज़ो लोक शाधेंदै सी तै हमेशा री तैंईंयैं विरासत पाई सकलै, ज़ो परमेश्वरै तिन्हां न वायदा केरू सा। किबैकि मसीह पैहलै वायदै रै मुताबक केरेदै पापा री सज़ा न छुटकारा देणै री तैंईंयैं मूँआ।

¹⁶असली न, ऐण्ढी तैरहा रा एक समझौता केरना एक बसियत लिखणा सा। तैबै ऐ तैबै लागू होआ सा ज़ैबै पता लागा सा कि एथा बै लिखणु आल़ा मांहणु मूँआ।

¹⁷किबैकि ऐण्ढा वायदा मौरनै सैंघै पक्का होआ सा होर ज़ैबै तैंईंयैं वायदै केरनु आल़ा ज़िन्दा रौहा सा तैबै तैंईंयैं वायदा किछ़ कोमा रा नी होंदा।

¹⁸ऐही बजहा सा कि पैहला वायदा एक पशु रै लोहू सैंघै बणाऊ ती।

¹⁹किबैकि मूसै सैभी लोका री तैंईंयैं सैभ हुक्म पौढ़ै, तेइयै पाणी सैंघै छ़ेलू होर बौकरै रा लोहू लेऊ, होर जूफे री शांणी होर लाल रंगा रै ऊना रा इस्तेमाल केरिया परमेश्वरा रै नियमा री कताब होर सैभी लोका पैंधै छिड़कू।

²⁰होर तेइयै लोका बै बोलू, “ऐ तेई वायदै रा लोहू सा ज़ो परमेश्वरै तुसा सैंघै केरू सा।”

²¹होर एसा रीतियै मूसै तोम्बू होर आराधना रै सारै समाना पैंधै लोहू छिड़कू।

²²होर मूसा रै बिधानै रै मुताबक सारी च़ीज़ा लोहू सैंघै च़ोखी केरिआ सी होर बगैर लोहू बहाऐ पापै री माफी नी होंदी।

²³ऐही बजहा सा कि तोम्बू रा सैभ किछ़ ज़ो स्वर्गै री च़ीज़ा रा नमूना ती, ज़ुणिबै पशु रै लोहू न च़ोखै होंणा ती। पर स्वर्गा न सच़ी च़ीज़ा पशु रै लोहू री तुलना न उतम बलि सैंघै च़ोखा केरना ती

²⁴तैबै मसीह एक पवित्र ज़ैगा नैंई नौठा ती ज़ो मांहणु द्वारा बणाउईदी ती, ज़ो सिर्फ़ स्वर्गा न सच़ाई री एक नमूना ती। एथा रै बजाय, सौ स्वर्गा बै नौठा होर ऐबै आसरी मज़त केरनै री तैंईंयैं तौखै परमेश्वरा सैंघै सा।

²⁵ऐण्ढा नी ऑथि कि सौ बार-बार आपु बै च़ढ़ाणै री तैंईंयैं स्वर्गा बै नौठा ज़ैण्ढा कि धौरती पैंधै महापुरोहित हर बौर्ष पशु रा लोहू लेइया सैभी न पवित्र ज़ैगा प्रवेश केरा सा।

²⁶अगर जरूरी हुआ होंदा ता दुनिया रै शुरूआती न मसीह बै बार-बार मौरना पौड़ना। लेकिन ऐबै एकी बार आखरी न सौ बलि रै रूपा न आपणी मौऊती न पापा बै दूर केरनै री तैंईंयैं ऐई ज़ुगै न प्रगट हुआ सा।

²⁷होर ज़ैण्ढा कि मांहणु री तैंईंयैं एक बार मौरना होर तेथा न बाद न्याय रा होंणा नियुक्त सा।

²⁸तैण्ढाऐ मसीह बोहू लोका रै पापा बै दूर केरनै री तैंईंयैं सिर्फ़ एक बार मूँआ। पर ज़ैबै तेई दबारा वापस ऐणा ता तेई पाप दूर नैंई केरना। तेई हर एकी बै बच़ाणै री तैंईंयैं ऐणा ज़ो तेइरा इंतज़ार केरदै लागै सी।