Read Pahari, Kullu याकूब 1 Bible Online

याकूब 1 - Pahari, Kullu bible

याकूब 1

¹हांऊँ याकूब, ज़ो परमेश्वर होर प्रभु यीशु मसीह रा दास सा, ऐ चिट्ठी लिखा सा, यहूदी रै बारा गोत्रा बै, ज़ो मसीह न होर सारी दुनिया न तितर-बितर होईया रौहा सी, तुसा सैभी बै मेरा नमस्कार।

²हे मेरै विश्वासी भाइयो बैहणा, ज़ैबै तुसै कई किस्मै री परीक्षा न पौड़लै, तैबै तुसै ऊँई बै पूरी खुशी री गैल समझा,

³किबैकि तुसै जाँणा सी कि तुसरै विश्वासै रै जाँचिणै सैंघै धीरज़ पैदा होआ सा,

⁴हर गैला न धीरज रखणा सिखा कि तुसै आत्मिक रीति न पूरै होर सिद्ध होलै ताकि तुसरै चाल-चलना न कौसी गैला री कमी नी रौहली।

⁵पर अगर तुसा न कौसी बै बुद्धि री कमी सा ता, परमेश्वरा न मूँगा, ज़ो बगैर फटकारिया सैभी बै खुलै दिला सैंघै देआ सा होर तेइबै परमेश्वरा देणी।

⁶पर पूरै विश्वासा सैंघै मुँगलै होर शक नी केरलै, किबैकि शक केरनु आल़ा समुद्रै री लहरी रै सांही सा ज़ो बागरी सैंघै बौहा होर उछला सा।

⁷ऐण्ढा मांहणु ऐ नी बुझ़ै कि मुँभै प्रभु न किछ़ मिलणा।

⁸सौ मांहणु दोगला सा होर सारी गैला न चँचल सा।

⁹ज़ो विश्वासी भाई-बैहण गरीब सी, तिन्हां बै खुश होंणा चेहिऐ कि परमेश्वर तिन्हां बै आदर देआ सा।

¹⁰होर ज़ो विश्वासी सेठ सी, तिन्हां बै खुश होंणा चेहिऐ किबैकि परमेश्वरै तै घमण्डी नी रखै; पर दुनिया रै सेठ मांहणु री ज़िन्दगी गाह रै फूला सांही शुकणा,

¹¹ज़ैण्ढै सूरज़ निकल़दै कड़ाकै रा धूपा पौड़ा सा, होर गाह बै शकौआ सा, होर तेथा रा फूल शुका सा, होर तेइरी शोभा ज़ाँन्दी रौहा सा, तेथा सांही सेठ बी आपणै कोमा केरदै-केरदै माट्टे न मिलणा।

¹²धन्य सा सौ मांहणु, ज़ो परीक्षा न मजबूत रौहा सा किबैकि तेई खरै निकल़िया हमेशा री ज़िन्दगी रा मुकट पाणा, ज़ौसरा वायदा परमेश्वरै आपणै झ़ुरी केरनु आल़ै सैंघै केरू सा।

¹³ज़ैबै कौसरी परीक्षा होली ता सौ ऐ नी बोलला कि मेरी परीक्षा परमेश्वरा धिरै न होआ सा, किबैकि न ता परमेश्वरा री कोई बुरी गैला न परीक्षा होई सका सा, होर न सौ कौसी री परीक्षा आपु केरदा।

¹⁴बल्कि हर एक मांहणु आपणी बुरी इच्छा न फसिया परीक्षा न पौड़ा सा।

¹⁵फिरी ऐ बुरी इच्छा पापा बै जन्म देआ सा, होर ज़ैबै पाप बोहू बड़ा सा, तैबै सौ मांहणु हमेशा री तैंईंयैं मौरा सा।

¹⁶हे मेरै प्रिय विश्वासी भाइयो बैहणा, धोखै न मता रौंहदै।

¹⁷किबैकि हर एक खरा वरदान होर हर एक खरा दान परमेश्वरा धिरै न मिला सा, ज़ुणियै हर किस्मै री आसमाना री ज्योति बणाई, ज़ुणीन न ता कोई बदलाव होई सकदा होर न आसमाना री ज्योति सांही अदला बदलै री बजहा न तेथा पैंधै कोई निहारा पौड़ा सा, परमेश्वर हमेशा एकै सा।

¹⁸तेइयै आपणी इच्छा न आसै सच़ाई रै वचनै लाइया पैदा केरै ताकि आसै तेइयै बणाइदी च़िज़ा न खास सी।

¹⁹हे मेरै प्रिय विश्वासी भाइयो बैहणा, एसा गैला बै तुसै जाँणा सी। हर एक मांहणु शुणनै री तैंईंयैं त्यार, बोलणै न सुल्हे होर झ़िक केरनै न धिमा होला,

²⁰किबैकि ज़ैबै मांहणु झ़िक केरा सा ता सौ परमेश्वरा रै धर्मा रै कोमा बै पूरा नी केरी सकदा, ज़ैण्ढा परमेश्वर तेइन कराणा चाहा सा।

²¹तैबै सारी गंदगी होर सैभ बुरी आदता बै दूर केरिया, परमेश्वरा रै तेई वचना बै बड़ै नम्रता सैंघै ग्रहण केरा, ज़ो तुसरै दिला न बाहुआ सा होर ज़ो तुसरै प्राणा रा उद्धार केरी सका सा।

²²पर परमेश्वरा रै वचना बै मैनणु आल़ै बैणा, सिर्फ़ शुणनू आल़ै केल्ही नी, किबैकि शुणनु आल़ा आपणै आपा बै धोखा देआ सी।

²³किबैकि ज़ो मांहणु परमेश्वरा रै वचना बै शुणनू आल़ा होला होर तेथा रै मुताबक नी च़लदा, सौ तेई मांहणु सांही सा, ज़ो आपणा मुँह शीशै न हेरिया ज़ा सा।

²⁴सौ आपणै मुँह हेरिया ज़ा सा, होर छ़ेकै बिसरा सा कि हांऊँ कैण्ढा ती।

²⁵पर ज़ो मांहणु आज़ादी रै सिद्ध विधाना रै मुताबक कोम केरा सा, सौ आपणै कोमा न तैबै आशीष पा सा कि शुणिया बिसरदा नैंई, पर तैण्ढै कोम केरा सा।

²⁶अगर कोई आपणै आपा बै भक्त समझ़ला होर आपणी ज़ीभा बै बोलणु आल़ी बुरी गैला पैंधै वशा न नी रखदा, सौ आपणै आपा बै धोखा देआ सा, तेइरी भक्ति बेकार सा।

²⁷आसरै परमेश्वर बापू रै सामनै च़ोखी होर साफ भक्ति ऐ सा, कि अनाथ होर विधवै रै दु:खा न तिन्हरी सुधि लेलै होर आपणै आपु बै दुनिया री बुराई न दूर रखलै।