Read Pahari, Kullu याकूब 2 Bible Online

याकूब 2 - Pahari, Kullu bible

याकूब 2

¹हे मेरै भाइयो होर बैहणा, तुसै आसरै महिमामय प्रभु यीशु मसीह रै च़ेले सी, तैबै तुसा एकी होरी न भेदभाव री भावना न दूर रौहा,

²उदाहरणा री तैंईंयैं अगर एक मर्द सुनै रै गुठी होर शोभलै मैंहगै झिकड़ै लाइया तुसरी सभा न एला होर एक गरीब बी मैलै कुचैलै झिकड़ै लाइया तुसरी मण्डली न एला,

³होर तुसै तेई शोभलै झिकड़ै आल़ै रा मुँह हेरिया बोललै कि, “तू तौखै शोभली ज़ैगा न बेश” होर तेई गरीबा बै बोललै कि, “तू औखै खड़ा रौह” या “मेरी ज़ोंघा हागै बेश।”

⁴कि तुसै आपु न भेदभाव नी केरू होर बुरै विचारै न्याय केरनु आल़ै नी ठहरै?

⁵हे मेरै प्यारे विश्वासी भाइयो, बैहणा, शुणा, कि परमेश्वरै ऐई दुनिया रै गरीब नी चुनै कि विश्वासा न धनी हो होर तेई राज्य रै हकदार होलै, ज़ौसरा वायदा परमेश्वरै आपणै झ़ुरी केरनु आल़ै सैंघै केरी सा?

⁶पर तुसै तेई गरीबा री बेइज़ती केरी; कि धनी लोका तुसा पैंधै अत्याचार नी केरदै, होर कि ते तुसाबै कचहरी बै घसीटिआ नी नेंदै?

⁷कि ते तेई खरै नाँ प्रभु यीशु मसीह री निन्दा केरा सी, ज़ौसरै तुसै कहलाइया सी?

⁸तैबै बी अगर तुसै पवित्र शास्त्रै रै ऐई वचनै रै मुताबक, “आपणै पड़ेशी सैंघै आपु सांही झ़ुरी रखा सी,” सैच़ियै तेई राज्य रै बिधाना बै पूरा केरा सी ता खरा केरा सी।

⁹पर अगर तुसै भेदभाव केरा सी ता पाप केरा सी; होर बिधान तुसाबै दोषी ठहरा सा।

¹⁰किबैकि ज़ो कोई सारै बिधाना रा पालन केरा सा, पर एकी गैला न भूल केरा सा ता सौ सैभी गैला न दोषी ठहरू।

¹¹तैबै ज़ुणियै ऐ बोलू कि, “तू व्यभिचार हेरी केरदा,” तेइयै ऐ बी बोलू कि, “तू हत्या हेरी केरदा,” पर तैं व्यभिचार ता नी केरू पर हत्या केरी ता तैबै भी तू बिधानै रै खिलाफ़ च़लणू आल़ा ठहरू।

¹²तुसै तिन्हां लोका सांही दया सैंघै बोला होर कोम बी केरा, ज़ुणिरा न्याय तेसा बिधानै रै मुताबक होंणा, ज़ुणियै सौ आज़ाद केरै।

¹³किबैकि ज़ुणियै दया नी केरी, तिन्हरा न्याय बगैर दया रै होंणा। अगर तुसै दुज़ै पैंधै दया केरलै ता परमेश्वरा बी न्याय रै ध्याड़ै तुसा पैंधै दया केरनी।

¹⁴हे मेरै विश्वासी भाइयो बैहणा, अगर कोई बोलला कि मुँभै यीशु मसीह पैंधै विश्वास सा पर सौ दुज़ै री तैंईंयैं खरै कोम नैंई केरदा ता तेथा न कि फायदा? कि ऐण्ढा विश्वास कैधी तेइरा उद्धार केरी सका सा?

¹⁵अगर कोई भाई या बैहण हागै टौलै नी होलै होर तिन्हां बै हर रोज़ खाँणै री कमी होली,

¹⁶होर तुसा न कोई तिन्हां बै बोलला, शान्ति सैंघै ज़ात्, तुसै गर्म रौहा होर पेट भौरिया खा पिया, पर ज़ो च़ीज़ा देही री तैंईंयैं ज़रूरी सी तिन्हां बै नी देलै ता कि फायदा?

¹⁷तैण्ढाऐ विश्वास बी अगर भलै कोमै रै मुताबक नी होला, ता आपणै स्वभावा न मूँआ सा।

¹⁸वरन् कोई बोली सका सा कि, “किछ़ लोका बै बशाह सा होर किछ़ लोका रै भलै कोम सी।” पर हांऊँ तुसाबै बोला सा, “तू मुँभै आपणा बशाह बगैर भलै कोमा न साबित केर; होर मूँ आपणा बशाह भलै कोमा सैंघै साबित कराणा।”

¹⁹तौभै बशाह सा कि एकै परमेश्वर सा, तू शोभला केरा सा, बुरी आत्मा बी बशाह रखा सी होर थर-थर कोमहा सी।

²⁰पर हे मूर्ख मांहणुआ कि तू ऐ बी नी ज़ाणदा कि भलै कोमा बगैर बशाह बेकार सा?

²¹ज़ैबै आसरै बुज़ुर्ग अब्राहमै आपणा बेटा इसहाक वेदी पैंधै च़ढ़ाऊ, ऐईरै एस भलै कोमा सैंघै परमेश्वरै सौ धर्मी ठहराऊ।

²²तैं हेरू कि विश्वासै तेइरै कोमा सैंघै मिलिया असर केरू होर कोमै लाइया तेइरा बशाह सिद्ध हुआ,

²³होर पवित्र शास्त्रा रा ऐ वचन पूरा हुआ कि अब्राहमै परमेश्वरै रा बशाह केरू होर तेथा री बजहा सैंघै सौ धर्मी मांहणु गिणुआ, होर सौ परमेश्वरा रा सैंघी बणु।

²⁴तैबै तुसै हेरू कि मांहणु सिर्फ़ बशाह लाइया केल्ही नी, बल्कि कोमा लाइया बी धर्मी ठहरा सा।

²⁵तैण्ढाऐ राहाब वेश्या बी ज़ैबै तेसै दूत आपणै घौरा ठहरायै होर दुज़ी बौतै विदा केरै, सौ बी तेसा रै भलै कोमै लाइया धर्मी ठहरी।

²⁶ज़ैण्ढै देह शाह बगैर मूँई सा, तैण्ढाऐ बशाह बी बगैर भलै कोमा लाइया मूँआ सा।