Read Pahari, Kullu याकूब 3 Bible Online

याकूब 3 - Pahari, Kullu bible

याकूब 3

¹हे मेरै विश्वासी भाइयो बैहणा, मण्डली न तुसा मौंझ़ै बोहू उपदेशक मता बैणा, किबैकि तुसै जाँणा सी कि आसै ज़ो उपदेशक सी आसरा होर बी सख्ती सैंघै न्याय होंणा सा।

²किबैकि आसै बोहू बार भूल केरा सी, ज़ुण बोलणै न बी भूल नैंई केरदा, सौहै ता सिद्ध मांहणु सा होर सौ आपणै सारै कोमा पैंधै बी काबू पाई सका सा।

³ज़ैबै आसै आपणै वशा केरनै री तैंईंयैं घोड़ै रै मुँहा न नकेल ला सी ता आसै तिन्हरी सारी देही बै बी फेरी सका।

⁴हेरा, ज़हाज बी ऐतरै बड़ै होआ सी होर तेज़ बागरी न तिन्हां बै च़ला सी, तैबै बी एक होछ़ी ज़ेही पतवारा सैंघै माँझी री इच्छै रै मुताबक घुमाईया सी।

⁵तैण्ढाऐ ज़ीभ भी एक होछ़ा ज़ेही औंग सा होर बड़ी-बड़ी (डींग) गप्पा मारा सा, ज़ैण्ढै थोड़ी ज़ेही औगियै केतरै बड़ै बौणा न औग लागा सा।

⁶ज़ीभ बी एक औगी सांही सा होर ऐ जीभ आसरै देही न एक ऐण्ढा औंग सा ज़ो सैभी न बुरा सा, होर सौ सारी देही बै बर्बाद केरा सा होर नरक कुण्डै री औगी न भौकदी रौहा सा होर आसा री ज़िन्दगी न औग ला सा।

⁷हर किस्मै रै बौणा रै पशु, च़ीड़ू, रेंगणु आल़ै ज़ीऊ होर पाणी रै ज़ीऊ ता मांहणु रै वशा न होई सका सी होर हुऐदै बी सी।

⁸पर ज़ीभा बै कोई बी मांहणु वशा न नी केरी सकदा। सौ एक ऐण्ढी बला सा ज़ो कैधी नी रूकदी, सौ प्राणा बै नाश केरनु आल़ै ज़हरै लाइया भौरूइदी सा।

⁹एसै ज़िभै लाइया आसै प्रभु होर परमेश्वर पिता री स्तुति केरा सी होर, एसा ज़िभै लाइया आसै मांहणु बै ज़ो परमेश्वरै रै आपणै रूपा न बणाई, श्राप देआ सी।

¹⁰एकी मुँहा न धन्यवाद होर श्राप निकल़ा सी। हे मेरै भाइयो, ऐण्ढा नी होंणा चेहिऐ।

¹¹कि एकी पाणी रै ज़ाईरु न मीठा होर खारा पाणी निकल़ा सा?

¹²हे मेरै विश्वासी भाइयो, कि फेगड़े रै बुटै न जैतून या अँगूरै री लूड़ी न फेगड़े लागी सका सी? तैण्ढाऐ खारै पाणी रै ज़ाईरु न मीठा पाणी नी निकली सकदा।

¹³तुसा न ज्ञानवान होर समझदार कुण सा? ज़ो ऐण्ढा होला सौ आपणै कोमा बै आपणी शोभली चाल-चलना सैंघै नम्र होइया केरलै ज़ो ज्ञान तेइबै धिना सा।

¹⁴पर अगर तुसरै आपणै-आपणै मना न कड़वाहट, जलन होर खुदगरज़ी री भावना सी ता सच़ाई रै बरोधा न घमण्ड हेरीत् केरदै होर न झ़ूठ हेरीत् बोलदै।

¹⁵ऐ सौ बुद्धि नी ऑथि, ज़ो परमेश्वर देआ सा, बल्कि संसारिक, शारीरिक होर शैतानी सा।

¹⁶तैबै ज़ौखै जलन होर खुदगरज़ी होआ सा, तौखै बखेड़ा होर हर किस्मै रै बुरै कोम होआ सी।

¹⁷पर ज़ो बुद्धि परमेश्वर देआ सा सौ पैहलै ता पवित्र होआ सा, तैबै मिलनसार, कोमल, नम्र, दया, शोभलै फ़ौल़ा न लादुआ दा, भेद-भाव होर कपट रहित होआ सा।

¹⁸होर मेल मिलाप कराणू आल़ै री तैंईंयैं शान्ति रा परिणाम ऐ होआ सा कि एकी दुज़ै सैघै धार्मिकता री ज़िन्दगी ज़ीआ।