Read Pahari, Kullu याकूब 4 Bible Online

याकूब 4 - Pahari, Kullu bible

याकूब 4

¹तुसा न लड़ाई झ़गड़ै कौखै न आऐ? ऐ गैला तिन्हां बुरी इच्छा न एज़ा सी ज़ो तुसरै अँगा न लड़ा भिड़ा सी?

²ऐण्ढी च़ीज़ा पाणै री तुसै बोहू इच्छा रखा सी पर तुसाबै सौ च़ीज़ा नी मिलदी। तैबै तुसै हत्या होर मिश केरा सी होर ज़ो च़ीज़ा होरी हागै सी तिन्हां च़ीज़ा बै पाणै री तैंईंयैं तुसै लड़दै झगड़दै रौहा सी पर तै तुसाबै नी मिलदी। ज़ो किछ़ तुसाबै लोड़ी सौ तैबै नी मिलदा किबैकि तुसै परमेश्वरा न नैंई मुँगदै।

³फिरी बी तुसै मुँगा ता सी पर तुसाबै नी मिलदा, किबैकि तुसै बुरी इच्छा सैंघै मुँगा सी, ताकि आपणै भोगविलासा बै पूरा केरी सकलै।

⁴हे विश्वासघातीयो, कि तुसै नी ज़ाणदी, कि दुनिया सैंघै दोस्ती केरनी परमेश्वरा सैंघै बैर केरना सा? तैबै ज़ो कोई दुनिया न दोस्ती रखणा चाहा सा, सौ आपणै आपु बै परमेश्वरा रा बैरी बणा सा।

⁵कि तुसै ऐ समझ़ा सी कि, पवित्र शास्त्र बेकार ऐ सैभ बोला सा? “परमेश्वरै आसा आँध्रै ज़ो आत्मा भौरी सा, तैबै सौ चाहा सा कि आसै तेइबै प्यार केरलै, ज़ैण्ढा एक लाड़ा जलन रखा सा कि तेइरी लाड़ी सिर्फ़ तेई सैंघै प्यार रखै।”

⁶परमेश्वर ता होर बी ज़ादा अनुग्रह देआ सा, अगर आसै इन्हां बुरी इच्छा न दूर रौहै, ऊँई बजहा न ऐ लिखू सा कि, “परमेश्वर घमण्डी रा बरोध केरा सा, पर दीन लोका पैंधै अनुग्रह केरा सा।”

⁷परमेश्वरै रै अधीन होआ होर शैताना रा बिरोध केरा, ता तेई तुसा हागै न भैगणा।

⁸परमेश्वरा रै नेड़ एज़ा, ता तेई बी तुसा हागै भेटी ऐणा। हे पापियो, आपणै ज़िन्दगी न पापा बै दूर केरा, होर हे दोगलै लोको, आपणै दिला बै पवित्र केरा।

⁹दु:खी होईया ज़ात् किबैकि तुसै पाप केरू सा, दुःख मनात् होर रोआ, तुसरी हौसी दुःखा न होर खुशी उदासी न बदलणी।

¹⁰प्रभु सामनै दीन बैणा, ता तेई तुसै उथड़ै पैंधै रखणै।

¹¹हे विश्वासी भाइयो, एकी दुज़ै री बदनामी मता केरदै। ज़ुण आपणै भाई री बदनामी केरा सा या आपणै भाई पैंधै दोष ला सा, सौ बिधानै री बदनामी केरा सा होर मूसै रै बिधाना पैंधै दोष ला सा, ता तू बिधानै रै मुताबक च़लणू आल़ा नी ऑथि पर तेथा पैंधै न्याय केरनु आल़ा ठहरू।

¹²बिधान देणु आल़ा होर न्यायी एकै परमेश्वर सा, ज़ुणिबै बच़ाणै होर नाश केरनै री सामर्थ सा, तू कुण सा, ज़ो आपणै पड़ेशी पैंधै दोष ला सा?

¹³तुसै ज़ो ऐ बोला सी कि, “औज़ या काल आसा होरी नगरा न ज़ाइआ एक बौर्ष बिताणा होर कोम धन्धा केरिया ढैबुऐ कमोणै।”

¹⁴होर तुसै ऐ नी ज़ाणदै कि काल कि होंणा, शुणा, तुसरी ज़िन्दगी सा कि? तुसै ता तेई धुँऐ सांही सी, ज़ो थोड़ी देर हेरिया सा फिरी राहिया सा।

¹⁵एथै रै बदलै तुसाबै ऐ बोलणा चेहिऐ कि, “अगर प्रभुऐ चाहू ता आसा ज़िन्दै रौहणा होर ऐ या सौ कोम बी केरना।”

¹⁶पर ऐबै तुसै आपणै काला रै बारै न डींगा पैंधै घमण्ड केरा सी। ऐण्ढा घमण्ड केरना पापा न बुरा होआ सा।

¹⁷ज़ो भलाई केरना जाँणा सा, होर नी केरदा, तेइरी तैंईंयैं ऐ पाप सा।