Read Pahari, Kullu याकूब 5 Bible Online

याकूब 5 - Pahari, Kullu bible

याकूब 5

¹हे सेठ लोको शुणा, तुसै आपणै ऐणु आल़ै दु:खा पैंधै च़ीखी-चिखिया रोआ।

²तुसरा धन बर्वाद हुआ होर झिकड़ै कीड़ै खाऐ।

³तुसरै सुनै-च़ाँदी न दीमका लागी सा, होर तेसा दीमका तुसा पैंधै गुआही देणी होर ज़ैण्ढी दीमक होर औग सैभ किछ़ फुकिया भस्म केरा सा तैण्ढै परमेश्वरै तुसाबै सख्त सज़ा देणी। तुसै आखरी ज़ुगा न धन कठा केरू सा।

⁴हेरा, ज़ुणी मज़दूरै तुसरै छेता न लुणनै रा कोम केरू, तिन्हरी सौ मज़दूरी तुसै धोखै न रखी सा, चिलाँदी लागी सा, होर लुणनै आल़ै री आवाज़ सर्वशक्तिमान परमेश्वरा रै कोना तैंईंयैं पुजी सा।

⁵तुसै धौरती न भोग-विलासा न लागी रौहै होर बड़ा सुख भोगू, ऐण्ढै केरिया तुसै आपणै आपा बै ज़ो तेई भेड़ा सांही पालन पोषण केरिया ऐई रोज़ै री तैंईंयैं मोटा ताज़ा केरू सा ज़ो ऐ नी ज़ाणदा कि तेई काटिणा।

⁶तुसै धर्मी दोषी ठहराइया मारू, ज़ो तुसरा सामना नी केरी सकदा।

⁷तैबै हे विश्वासी भाइयो, प्रभु रै ऐणै तैंईंयैं धीरज रैखा, हेरा, किसान धौरती रै बोहू कीमती फ़ौलै री आशा रखिया पैहला होर आखरी गाश होंणै तैंईंयैं इंतज़ार केरदा रौहा सा।

⁸ऐण्ढै तुसै बी धीरज रैखा, होर आपणै दिला बै मजबूत केरा, किबैकि प्रभु रा ऐणा नेड़ सा।

⁹हे विश्वासी भाइयो एकी दुज़ै पैंधै दोष मता लाँदै ताकि तुसै बी दोषी नी ठहरलै, हेरा, न्याय केरनै री तैंईंयैं यीशु छ़ेकै ऐणु आल़ा सा।

¹⁰हे विश्वासी भाइयो, ज़ुणी भविष्यवक्तै प्रभु रै नाँ न गैला केरी, तिन्हां बै दु:ख सौहणै होर धीरज रखणै रा एक आदर्श समझ़ा।

¹¹हेरा, आसै धीरज रैखणु आल़ै बै धन्य बोला सी, तुसै अय्यूबै रै धिरजै रै बारै न ता शुणू सा, होर प्रभु री तरफा न ज़ो तेइरा प्रतिफल हुआ तेइबै भी जाँणा सी, ज़ुणियै कि प्रभु री ब़डी करूणा होर दया प्रगट होआ सा।

¹²पर हे मेरै विश्वासी भाइयो, सैभी न खरी गैल ऐ सा कि, कसमा हेरीत् खाँदै, न स्वर्गै री, न धौरती री, न कौसी होरी च़ीज़ै री, पर तुसरी गैला हाँ री हाँ, होर नैंई री नैंई हो, ताकि परमेश्वर तुसाबै सज़ा नी दै।

¹³अगर तुसा न कोई दु:खी होला ता सौ प्रार्थना केरला, अगर खुश होला ता सौ स्तुति रै भजन गाला।

¹⁴अगर कोई तुसा न रोगी होला ता सौ मण्डली रै स्याणै बै शाधला होर ते प्रभु रै नाँ न तेई पैंधै तेल मौल़िया तेइरी तैंईंयैं प्रार्थना केरलै।

¹⁵होर विश्वासा सैंघै केरदी तिन्हरी प्रार्थनै री बजहा न रोगी बच़णा होर प्रभु सौ च़किया खड़ा केरना होर अगर तेइयै पाप भी केरेदै होलै ता तिन्हरी बी माफी होंणी।

¹⁶तैबै तुसै आपु न एकी दुज़ै रै सामनै आपणै पापा बै मना होर एकी दुज़ै री तैंईंयैं प्रार्थना केरा कि तुसै ठीक होलै। धर्मी मांहणु री प्रार्थनै लाइया बोहू किछ़ होई सका सा।

¹⁷एलिय्याह भविष्यवाणी केरनु आल़ा बी ता आसा सांही दु:ख भोगी मांहणु ती, होर तेइयै गिड़गिड़ाइया प्रार्थना केरी कि गाश नी एला, होर साढ़ै त्रा बौर्षा तैंईंयैं धौरती पैंधै गाश नी आऊ।

¹⁸फिरी तेइयै प्रार्थना केरी ता आसमाना न गाश आऊ होर धौरती न नाज़ हुआ।

¹⁹हे मेरै विश्वासी भाइयो अगर तुसा न कोई सच़ाई री बौता न भटकला होर कोई तेइबै फेरिया आंणला ता,

²⁰सौ ऐ ज़ाणला कि ज़ो कोई भटकै दै पापी बै फेरिया आंणला, सौ एकी प्राणा बै मौऊती न बच़ा सा होर तेइरै पापा बै परमेश्वरा न माफ़ कराणू आल़ा होंणा।