Read Pahari, Kullu 1 पतरस 1 Bible Online

1 पतरस 1 - Pahari, Kullu bible

1 पतरस 1

¹हांऊँ पतरस ज़ो यीशु मसीह रा एक प्रेरित सा, ऐ चिट्ठी लिखदा लागा सा, तिन्हां परदेशी रै नाँ ज़ुण परमेश्वरै चुनैदै लोका सी ज़ो पुन्तुस, गलातिया, कप्पदुकिया, आसिया होर बितूनिया प्रदेशा रै अलग-अलग शैहरा न रौहा सी,

²होर पिता परमेश्वरै तुसै बोहू पैहलै चुनु ती कि तुसै तेइरै लोका बणा होर तुसाबै पवित्र आत्मा रै कोमा सैंघै पवित्र केरलै। तेइयै ऐण्ढा तैबै केरू ताकि तुसै यीशु मसीह री गैला मना होर तेइरै लोहू सैंघै च़ोखै होआ। हांऊँ प्रार्थना केरा सा कि परमेश्वर तुसाबै अनुग्रह होर शान्ति भरपूरी न दै।

³आसरै प्रभु यीशु मसीह रै पिता होर परमेश्वर रा धन्यवाद हो, परमेश्वरै आपणी बड़ी दया आसा पैंधै केरी, आसाबै एक नोंऊँई ज़िन्दगी धिनी सा। किबैकि परमेश्वरै यीशु मसीह मूँऐंदै न ज़िन्दा केरू, तेइयै आसाबै बड़ै बशाह सैंघै ज़ीणै लायक बणाऊ सा; ऐ पूरी तैरहा तिन्हां च़ीजा बै पाणै री आश सा ज़ो तेइयै आसाबै देणै रा वायदा केरू सा।

⁴आसै तेई विरासता बै पाणै रा इंतज़ार केरा सी, ज़ो परमेश्वरै आसा री तैंईंयैं त्यार केरी सा। कोई कैधी भी तिन्हां च़ीजा बै नाश नैंई केरी सकदा। तिन्हरा कोई किछ़ भी बिगाड़ी नैंई सकदा। तिन्हां कैधी खापरै या कम बाँकै नैंई बणना। परमेश्वर तिन्हां च़ीजा बै तुसरी तैंईंयैं स्वर्गा न रखदै लागै सी।

⁵होर तुसरै बशाह रै ज़रियै परमेश्वर तुसाबै आपणी शक्ति रै ज़रियै तैबै तक रक्षा केरदा लागा सा ज़ैबै तक कि तुसै शैताना न पूरी तैरहा उद्धार प्राप्त नैंई केरी लेंदे ज़ो कि मसीह रै वापस ऐणु आल़ै रै रोज़ रिहाणै री तैंईंयैं त्यार सा।

⁶होर एसा बजहा न तुसाबै मगन होंणा चेहिऐ, ज़ैबैकि ज़रूरी सा कि ऐबै किछ़ रोज़ै री तैंईंयैं कई किस्मै री परीक्षै री बजहा न दु:खा न सी,

⁷इन्हां मुसीबता रा मकसद ऐ रिहाणा सा कि, कि तुसै सच़िऐ परमेश्वरा न बशाह केरा सी। तुसरा बशाह यीशु मसीह न सुनै न ज़ादा कीमती सा। ज़ैण्ढै नाश होणू आल़ै सुनै बै औगी रै ज़रियै परेखू होर च़ोखा केरा सी, अगर तुसरा बशाह ताउदै औगी रै ज़रियै अजमाणै रै बावजूद भी मजबूत रौहा सा, ता ऐ तुसाबै तेई रोज़ बोहू प्रशंसा होर महिमा होर आदर दिलाणा ज़ैबै यीशु मसीह दबारा ऐणा।

⁸तेई सैंघै तुसै बगैर हेरै झ़ुरी रखा सी होर ऐबै ता तेई पैंधै बगैर हेरै बशाह केरिया ऐण्ढै खुश होर मगन होआ सी, ज़ो दसणै न बाहरै सा होर महिमा सैंघै भौरूआन्दा सा,

⁹तुसै खुश सी किबैकि तुसरी आत्मा बै परमेश्वर पूरी तैरहा न पापा री सज़ा न बच़ाँदै लागै सी। ऐ यीशु मसीह न तुसरै बशाह रा प्रतिफल सा।

¹⁰ऐई उद्धारै रै बारै न तिन्हां भविष्यवक्तै बोहू छानबीन होर जाँच पड़ताल केरी, ज़ुणियै तेई अनुग्रह रै बारै न ज़ो तुसा पैंधै होणु आल़ा ती, भविष्यवाणी केरी ती।

¹¹मसीह री आत्मा तिन्हां मौंझ़ै ती होर तिन्हां बै दसदी लागी ती कि मसीहै कैण्ढै दुःख सौहणै होर फिरी तिन्हां बै बोहू आदर देईणा। तैबै तिन्हैं एसा गैला री खोज केरी की कि मसीह कुण होंणा होर ऐ कैबै होंणा।

¹²लेकिन परमेश्वरै इन्हां भविष्यवाणी केरनु आल़ै बै दसू कि तिन्हरै सन्देश तिन्हरी तैंईंयैं नैंई बल्कि तुसरी तैंईंयैं ती। सौ सन्देश यीशु मसीह रै बारै खुशी रा समाद सा ज़ो ऐबै तुसै शुणु। परमेश्वरै स्वर्गा न आपणी पवित्र आत्मा भेज़िया लोका बै तुसाबै खुशी रा समाद शुनाणै न मज़त केरी। ऐ सैभ ऐतरा नौखा सा कि स्वर्गदूत भी इन्हां गैला बै होंदेआ बड़ी इच्छा सैंघै हेरदै लागै सी।

¹³तैबै आपणै दिमागा बै त्यार केरा ज़ैण्ढै लोका कोम केरनै री तैंईंयैं आपणा च़ेका बौना सी। ऐ सा, तुसाबै ऐसा गैला पैंधै काबू केरना चेहिऐ की तुसै कि सोच़ा सी, होर ऐण्ढा केरनै सैंघै तुसरी ज़िन्दगी रा चाल चलन पूरी तैरहा न होर आत्म बशाह न उद्धार पाणै री आश केरा सा कि ज़ैबै यीशु मसीह स्वर्गा न दबारा ऐणा ता परमेश्वरा तुसा पैंधै अनुग्रह केरना।

¹⁴परमेश्वरा रै हुक्म मनणु आल़ै बणा, शोभलै शोहरू सांही ज़ो आपणै बापू रा हुक्म मना सी। तिन्हां बुरै कोमा बै मता केरा ज़ुणिबै तुसै तैबै केरना चाहा ती ज़ैबै तुसै परमेश्वरा री सच़ाई बै नैंई जाँणा ती।

¹⁵पर ज़ैण्ढा तुसरा शाधणु आल़ा पवित्र सा, तैण्ढै तुसै भी आपणी सारी चाल-चलना न पवित्र बैणा।

¹⁶किबैकि शास्त्रा न लिखुआ सा कि, पवित्र बैणा, किबैकि हांऊँ पवित्र सा,

¹⁷होर ज़ैबै तैंईंयैं तुसै हे पिता बोलिया तेई हागै प्रार्थना केरा सी, ज़ो बगैर पक्षपातै रै हर एकी रै कोमै रै मुताबक न्याय केरा सा ता, आपणै परदेशी होंणै रा बौगत डौरा सैंघै बिता।

¹⁸किबैकि तुसै जाँणा सी कि नक्कमा चाल-चलन ज़ो बुज़ुर्गा न ओरै च़लदा आऊ सा, तेथा न तुसरा छुटकारा सुनै च़ाँदी मतलब नाशमान च़ीज़ै लाइया नी हुआ,

¹⁹पर निर्दोष होर निष्कलंक गौभू मतलब मसीह रै कीमती लोहू रै द्वारा हुआ।

²⁰ऐसा दुनिया बै बनाणै न पैहलै, परमेश्वरै बौगता न पैहलै ऐ फैसला केरू ती कि यीशु मसीह उद्धार केरनु आल़ा होंणा। पर सौ सिर्फ़ तुसरी मज़त केरनै री तैंईंयैं इन्हां आखरी रोज़ न ऐसा दुनिया न आऊ।

²¹ज़ो तेइरै द्वारा तेई परमेश्वरा पैंधै बशाह केरा सी, ज़ुणियै सौ मूँऐंदै न ज़िन्दा केरू होर महिमा धिनी कि तुसरा बशाह होर आशा परमेश्वरा पैंधै होली।

²²किबैकि तुसै सच़ाई बै मनणै रै ज़रियै पवित्र बणाऊ सा, ऐबै तुसाबै आपणै सैंघी विश्वासी सैंघै तन मना लाइया झ़ुरी केरनी चेहिऐ। पर तुसाबै आपणै पूरै दिला सैंघै झ़ुरी केरदै रौहणा चेहिऐ।

²³किबैकि तुसै नाशमान नी, पर अविनाशी बेज़ै लाइया परमेश्वरै रै ज़िन्दै होर सदा ठहरनू आल़ै वचनै रै ज़रियै नोंऊँआं जन्म पाऊ सा।

²⁴ऐ सौऐ सा ज़ो पवित्र शास्त्र बोला सा, “सैभ लोका गाह रै बराबर सी, होर तिन्हरी सारी शोभा जंगली फूला सांही सा। गाह शुकणा होर फूल भी धौरती पैंधै पौड़ना।”

²⁵पर परमेश्वरा रा वचन हमेशा रौहणा। ऐ वचन मसीह रै बारै न खुशी रा समाद सा ज़ो तुसाबै प्रचार केरूआ ती।