Read Pahari, Kullu 1 पतरस 2 Bible Online

1 पतरस 2 - Pahari, Kullu bible

1 पतरस 2

¹तैबै सैभी किस्मा रै बुरै बर्ताव न दूर होआ। होरी बै धोखा मता देआ कपटी मता बणा। होरी सैंघै जलन मता केरदै। होरी लोका रै खिलाफ़ बुरी गैला मता केरदै।

²जन्मै दै शोहरु सांही साफ आत्मिक दूधै री लालसा केरा, ताकि तेइरै द्वारा उद्धार पाणै री तैंईंयैं बढ़दै ज़ालै।

³किबैकि ज़ैण्ढै पवित्र शास्त्र बोला सा, “तुसै महसूस केरिया जाणु कि प्रभु केतरा भला सा।”

⁴तुसै प्रभु यीशु हागै आऐ सी। सौ एक घौरा री मनियादी न रखैदै एक कीमती पात्थरा सांही सा, पर सौ एक ज़िन्दा पात्थर सा। तेइबै कई लोकै निक्कमा ठहराऊ ती, पर परमेश्वरै सौ चुनु होर सौ बोहू कीमती मनू।

⁵होर ज़ैण्ढै लोक पात्थरा सैंघै घौर बणा सी, परमेश्वर तुसाबै एक ऐण्ढै छ़ुण्डा न शामिल केरदै लागै सी ज़ुणीन परमेश्वरा री आत्मा रौहा सा। ताकि ज़ो यीशु मसीहै आसरी तैंईंयैं केरू, ज़ैण्ढै पुरोहित बलि च़ढ़ा सी तुसै ऐण्ढै कोम केरा ज़ुणी सैंघै परमेश्वर खुश होआ सा।

⁶ऐ तैण्ढाऐ सा ज़ो परमेश्वर पवित्र शास्त्रा न बोला सा कि, “हेरा, हांऊँ सिय्योना न कुणै रा चुनुआदा होर कीमती पात्थर रखा सा, होर ज़ो तेई पैंधै बशाह केरला, तेई कौसी रीतियै शर्मिन्दा नी होंणा।”

⁷तुसरी तैंईंयैं ज़ो बशाह केरा सी, सौ ता बोहू कीमती सा, पर ज़ो बशाह नी केरदै तिन्हरै बारै न पवित्र शास्त्र बोला सा, “ज़ो पात्थर राज़मिस्त्रियै नक्कमा ठहराऊ ती सौहै कुणै रा पात्थर गिणुआ,”

⁸होर फिरी शास्त्र भी बोला सा, “ठेसा लागणै रा पात्थर होर ठोकर खाँणै री टोहल हुआ सा,” किबैकि ते ता वचना बै नी मैनिया ठोकर खा सी, होर ऊँईरी तैंईंयैं ठहराऐ बी सी।

⁹पर तुसै एक चुनुआदा वँश होर राज़-पदधारी, पुरोहिता रा समाज, पवित्र लोका होर परमेश्वरै री आपणी प्रजा सी, तैबै कि ज़ुणियै तुसै निहारै न आपणी नौखी ज्योति न शाधै सी, तेइरै गुण प्रगट केरा।

¹⁰तुसै पैहलै ता किछ़ भी नी ती ऑथि, पर ऐबै परमेश्वरै री प्रजा सी, तुसा पैंधै दया नी ती हुई ती, पर ऐबै दया हुई सा।

¹¹हे प्यारो, हांऊँ तुसा हागै अर्ज़ा केरा सा, कि तुसै आपणै आपा बै औखै ऐसा दुनिया न परदेशी होर यात्री ज़ाणिया तेई दुनिया री इच्छा न ज़ो आत्मा सैंघै युद्ध केरा सी, बच़िया रौहा।

¹²ज़ो लोका परमेश्वरा पैंधै बशाह नैंई केरदै ते तुसरै च़ोहू पासै रौंहदै लागै सी होर बोली सका सी कि तुसै गलत केरदै लागै सी। ऐण्ढी शोभली ज़िन्दगी ज़ीआ कि ते तुसरै ज़रियै केरेदै खरै कोम हेरणै होर तेई रोज़ परमेश्वरा बै महिमा देणी ज़ैबै मसीह दबारा ऐणा।

¹³प्रभु रा आदर केरनै री तैंईंयैं तुसाबै तिन्हां सैभी रा पालन केरना चेहिऐ ज़ो ऐई दुनिया न अधिकारा न सा, मतलब राजा ज़ो सैभी न ज़ादा अधिकार रखा सा।

¹⁴होर राज़पाला बै ज़ुणिबै राजा रै ज़रियै चुना सी। तिन्हां बै गलत कोम केरनु आल़ै बै सज़ा देणै होर सही कोम केरनु आल़ै बै प्रशँसा केरनै री तैंईंयैं भेज़ा सी,

¹⁵किबैकि परमेश्वरै री ऐ इच्छा सा, कि तुसै भलै कोम केरनै सैंघै निर्बुद्धि लोकै री अज्ञानतै री गैला बै बन्द केरा।

¹⁶होर आपणै आपु बै आज़ाद जाँणा, पर आपणी एसा आज़ादी बै बुराई री तैंईंयैं आड़ मता बणादै, पर आपणै आपु बै परमेश्वरा रा दास समझ़िया च़ला।

¹⁷सैभी रा आदर केरा, आपणै सैंघी सैंघै झ़ुरी रखा, परमेश्वरा न डौरा, राज़ै री इज्ज़त केरा।

¹⁸हे विश्वासी नोकरो, तुसै ज़ो दुज़ै लोका रै घौरा न कोम केरा सी, हर किस्मा रै डौरा सैंघै आपणै मालक रै अधीन रौहा, न सिर्फ़ भलै होर नम्रा रै बल्कि बुरै रै भी अधीन रौहा।

¹⁹किबैकि अगर कोई परमेश्वरा रा विचार केरिया अन्याय न दु:ख सौहा सा ता, सौ सुहावना सा।

²⁰किबैकि अगर तैं अपराध केरिया मुक्कै खाऐ होर धीरज रखू ता, तेथा न कि सराउथी री गैल सा? पर अगर भलै कोम केरिया दु:ख सौहा सी होर धीरज रखा सी ता, ऐ परमेश्वरा बै शोभला लागा, सा

²¹होर तुसै एथै री तैंईंयैं चुनै भी सी, किबैकि मसीहै भी तुसरी तैंईंयैं दु:ख सौहिया, तुसाबै एक नमूना धिना सा, कि तुसै भी तेइरै कदमा पैंधै च़ललै।

²²पवित्र शास्त्र बोला सा तेइयै न ता कैधी पाप केरू, होर न तेइरै मुँहा न धोखै री कोई गैल निकती।

²³सौ गाल़ी शुणिया गाल़ी नी ती देंदा, होर दु:ख च़किया कोई बै भी धमकी नी ती देंदा, पर आपणै आपु बै सच़ै न्यायी रै हौथा न सौंपा ती।

²⁴सौ आपु आसरै पापा बै आपणी देही पैंधै च़किआ क्रूसा पैंधै च़ढ़ू, ज़ुणीन आसै पापै री तैंईंयैं मौरिया धार्मिकतै री तैंईंयैं ज़िन्दगी बितालै, तेइरै मार खाँणै सैंघै तुसै ठीक हुऐ।

²⁵तुसै पैहलै भटकीदी भेड़ा सांही ती, पर ऐबै आपणै प्राणै रै रखवालै होर फुआला धिरै फिरी वापस आऐ सी।