Read Pahari, Kullu 1 पतरस 4 Bible Online

1 पतरस 4 - Pahari, Kullu bible

1 पतरस 4

¹तैबै ज़ैबैकि मसीहै शरीरा न होईया दु:ख सौहू ता तुसाबै भी तेसा मनसा सैंघै दुःख सौहणै री तैंईंयैं त्यार होंणा चेहिऐ, ज़ो तेई हागै ती। अगर तुसै मसीह री तैंईंयैं दुःख सौहणै बै त्यार सी ता तुसै पापा केरना छ़ौड़नै रा फैसला केरू सा।

²नतीज़ै रै तौरा पैंधै सौ मांहणु आपणी सारी ज़िन्दगी ऐसा धौरती पैंधै आपणी शारीरिक मांहणु री इच्छै रै मुताबक नी बल्कि परमेश्वरै री इच्छै रै मुताबक ज़ीलै।

³किबैकि होरी ज़ाति री इच्छै रै मुताबक कोम केरनै होर लुचपनै री बुरी इच्छा, मतवालापन, लीलाक्रीड़ा, पियक्कड़पन होर घृणित मूर्ति पूज़ा न आसै ज़ो बौगत बिताऊ, सौऐ बड़ा भारी हुआ।

⁴तैबै तुसरै पराणै सैंघी हैरान होआ सी कि, तुसै बोहू बुरै कोमा न तिन्हरा साथ नी देंदै होर तैबै ते बुरा भला बोला सी।

⁵पर तिन्हां तेइबै, ज़ो ज़िन्दै होर मूँऐंदै रा न्याय केरनै री तैंईंयैं त्यार सा, लेखा देणा।

⁶किबैकि मूँऐंदै बै भी खुशी रा समाद एथै री तैंईंयैं शुणाउआ ती कि, शरीरा न तिन्हरा न्याय मांहणु रै मुताबक होला, पर आत्मा न परमेश्वरै रै मुताबक ज़िन्दै रौहलै।

⁷सैभी गैला रा आखरी छ़ेकै होणु आल़ा सा, ऐबै सँयमी होईया प्रार्थना केरनै री तैंईंयैं होशियार रौहा

⁸होर सैभी न खरी गैल ऐसा कि, एकी दुज़ै सैंघै होर भी ज़ादा झ़ुरी रखा, किबैकि झ़ुरी बोहू सारै पापा बै खौटा सा।

⁹कुड़कुड़ाऐ बगैर एकी दुज़ै री पाहुणच़ारी केरा।

¹⁰ज़ुणिबै ज़ो वरदान मिलू सा, सौ तेइबै परमेश्वरै रै अनुग्रह रै भलै भण्डारी सांही एकी दुज़ै री सेवा न लाऐ।

¹¹अगर तुसा हागै प्रचार केरनै रा वरदान सा ता तौभै परमेश्वरा रै वचना रा प्रचार केरना चेहिऐ। अगर तुसा हागै दुज़ै लोका री मज़त केरनै रा वरदान सा ता तेइबै तेसा शक्ति सैंघै केरा ज़ो परमेश्वर तुसाबै देआ सा। फिरी तुसै ज़ो किछ़ भी केरा सी सौ यीशु मसीह रै ज़रियै परमेश्वरा री महिमा आंणा सा। सैभ महिमा होर शक्ति ज़ुग-ज़ुग तेइरी सा। आमीन।

¹²हे प्यारो, तेसा दर्दनाक गैला रै बारै न हैरान मता होआ ज़ो तुसै दु:ख सौहा सी, किबैकि तुसै मसीह रै सी। पर ऐ च़ीजा ऐ रिहाणै री तैंईंयैं होंदी लागी सा की, कि तुसै सच़ी परमेश्वरा बै मना सी। तैबै ऐ मता सोच़ा कि तुसा सैंघै किछ़ नौखा होंदा लागा सा।

¹³पर ज़ैण्ढै-ज़ैण्ढै मसीह रै दु:खा न सहभागी होआ सी, खुशी मनात् कि, तेइरी महिमै रै प्रगट होंणै रै बौगता भी तुसै खुश होर मगन हो।

¹⁴फिरी अगर मसीह रै नाँ री तैंईंयैं तुसरी निन्दा केरिया सा ता धन्य सी, किबैकि महिमा री आत्मा, ज़ो परमेश्वरै री आत्मा सा, तुसा पैंधै छ़ाँव केरा सा।

¹⁵तुसा न कोई मांहणु खूनी, च़ोर, कुकर्मी या पराऐ कोमा न हौथ पाणै री बजहा न दु:ख नी पाला।

¹⁶अगर मसीह होंणै री बजहा न दु:ख पा सा ता शर्मिंदा हेरी होंदा, पर एसा गैलै री तैंईंयैं परमेश्वरै री महिमा केरा।

¹⁷किबैकि न्याय रा बौगत आई पुजू सा कि, पैहलै परमेश्वरै रै लोका रा न्याय केरिला, होर ज़ैबै न्याय री शुरूआत आसा न होंणी ता तिन्हरा कि होंणा ज़ो परमेश्वरै रै खुशी रै समादा बै नी मनदै?

¹⁸ज़ैण्ढै कि शास्त्र बोला सा, “अगर धर्मी मांहणु बड़ी मुश्किला सैंघै मुक्ति पा सा ता, भक्तिहीन होर पापी रा कि ठिकाणा?”

¹⁹तैबै ज़ो परमेश्वरै री इच्छै रै मुताबक दु:ख सौहा सी, ते भलाई केरदैआ आपणै-आपणै प्राणा बै विश्वासयोग्य सृजनहारै रै हौथा न सौंपलै।