Read Pahari, Kullu 1 पतरस 5 Bible Online

1 पतरस 5 - Pahari, Kullu bible

1 पतरस 5

¹तुसा न ज़ो स्याणै सी हांऊँ तिन्हां सांही अगुवा सा होर मसीह रै दु:खा रा गुआह होर प्रगट होणू आल़ी महिमा न सहभागी होईया तिन्हां बै ऐ समझ़ा सा,

²कि परमेश्वरै रै तेई छ़ुण्डै री ज़ो तुसरै बिच़ा न सा रखवाली केरा होर ऐ दवाब न नी बल्कि परमेश्वरै री इच्छा रै मुताबक खुशी सैंघै होर, नीच कमाई री तैंईंयैं नी पर मन लाइया केरा।

³होर ज़ो लोका तुसरै हवालै केरै सी, तिन्हां पैंधै अधिकार मता जताँदै, बल्कि छ़ुण्डै री तैंईंयैं शोभलै आदर्श बणा।

⁴होर ज़ैबै यीशु मसीह ज़ो कि आसरा प्रधान रखवाला वापस ऐला ता तुसाबै महिमा रा मुकट देणा ज़ो मुरझाणू आल़ा नी ऑथि।

⁵हे नोऊज़ुआनो, तुसै भी स्याणै रै अधीन रौहा बल्कि तुसै सैभियै एकी दुज़ै री सेवा दीन होईया केरा, किबैकि शास्त्र बोला सा, “परमेश्वर घमण्डी रा बरोध केरा सा, पर दीन मांहणु पैंधै अनुग्रह केरा सा।”

⁶तैबै परमेश्वरै रै बलवान हौथा हेठै दीनता न रौहा कि सौ तुसाबै ठीक बौगता न बढ़ाला।

⁷होर आपणी सारी चिंता परमेश्वरा पैंधै छ़ौड़ा किबैकि तेइबै तुसरा ध्यान सा।

⁸होशियार रौहा होर बिऊदै रौहा किबैकि तुसरा बरोधी शैतान ग्रिंज़णू आल़ै शेरा सांही एसा खोजा न रौहा सा कि कुणी बै मारिया खाला।

⁹बशाह न दृढ़ होईया होर ऐ ज़ाणिया तेइरा सामना केरा कि तुसरै मसीह भाई, बैहण ज़ो दुनिया न सी, ऐण्ढै दु:ख भोगदै लागदै सी।

¹⁰परमेश्वरा ज़ो सारै अनुग्रह रा दाता सा, ज़ुणियै तुसै मसीह न आपणी हमेशा महिमै री तैंईंयैं शाधै सी, तुसरै थोड़ी देर दु:ख च़कणै न बाद आपुऐ तुसै सिद्ध, स्थिर होर बलवन्त केरनै।

¹¹तेई रा राज्य ज़ुग-ज़ुग रौहला। आमीन।

¹²मैं सिलासा री मज़ती न ऐ होछ़ी चिट्ठी लिखी होर तुसाबै भेज़ी सा। हांऊँ तेइबै मसीह न एक बफादार भाई समझा सा। लिखणै रा मेरा मकसद तुसाबै उत्साहित केरना होर बशाह दिलाणा सा कि तुसै ज़ो झेलदै लागै सी सौ सच़ी न परमेश्वरा रै अनुग्रह रा हिस्सा सा। ऐई अनुग्रह न मजबूत रौहा।

¹³बैबीलोन शैहरा रै विश्वासी ज़ो रोमा न सी, ज़ुणिबै परमेश्वरै चुनु सा, ज़ैण्ढै तुसै चुनै सी, तुसाबै नमस्कार भेज़ा सी। मरकुस भी ज़ो मेरै मेरा बेटै सांही सा तुसाबै नमस्कार भेज़ा सा।

¹⁴सच़ै प्यारा सैंघै एकी दुज़ै बै नमस्कार केरा। तुसा सैभी बै ज़ो मसीह न होलै शान्ति मिली लोड़ी।