Read Pahari, Kullu 2 पतरस 1 Bible Online

2 पतरस 1 - Pahari, Kullu bible

2 पतरस 1

¹हांऊँ शमौन पतरस ज़ो यीशु मसीह रा एक दास होर प्रेरित सा ऐ चिट्ठी तुसाबै लिखदा लागा सा। हांऊँ तुसा सैभी बै लिखदा लागा सा ज़ो तेई कीमती बशाह बै साँझ़ा केरा सी ज़ो आसा हागै सा, ऐ बशाह तुसाबै धिना सा किबैकि यीशु मसीह न्यायी सा ज़ो आसरा उद्धारकर्ता होर परमेश्वर सा।

²हांऊँ प्रार्थना केरा सा कि परमेश्वर तुसाबै होर ज़ादा अनुग्रह होर शान्ति दै, ज़ैण्ढै कि तुसै परमेश्वर होर आसरै प्रभु रै आपणै ज्ञाना न बढ़ा सी।

³परमेश्वरै आपणी शक्ति रै ज़रियै आसाबै सौ सैभ किछ़ धिना सा ज़ो आसाबै परमेश्वर बै एक खुश केरनु आल़ी ज़िन्दगी ज़ीणै री तैंईंयैं लोड़ी। ऐ मुमकिन सा किबैकि आसै परमेश्वरा बै जाँणा सी होर सौ सौऐ सा ज़ुणियै आसाबै आपणी महानता होर शोभलै गुणा रै ज़रियै आपणै लोक होंणै री तैंईंयैं शाधु सा।

⁴इन्हां सैभी रै ज़रियै परमेश्वरै आसाबै महान होर कीमती वरदान धिना सा ज़ो तेइयै वायदा केरू ती। इन्हां वायदै रा इस्तेमाल केरिया आसै दुनिया न तिन्हां बुरी इच्छा न बच़ी सका सी ज़ो लोका बै नाश केरा सी, होर परमेश्वरा रै स्वभावा न एक हिस्सा होई सका सी।

⁵होर एसा बजहा तुसाबै सिर्फ़ मसीह पैंधै बशाह नैंई केरना चेहिऐ, तुसाबै हमेशा सौ केरनै री भी कोशिश केरनी चेहिऐ ज़ो होरी री तैंईंयैं शोभला सा, तुसाबै सिर्फ़ सौऐ नैंई केरना चेहिऐ ज़ो शोभला सा, तुसै ऐण्ढै मांहणु भी बणा ज़ो बुद्धिमानी सैंघै बर्ताव केरना भी जाँणा सा,

⁶होर न सिर्फ़ तुसाबै जाणना चेहिऐ कि कैण्ढै बुद्धिमाना सैंघै बर्ताव केरना सा, तुसाबै आपणै आपा बै भी काबू डाहणा चेहिऐ, ताकि तुसै ते बुरै कोम मता केरा ज़ो केरना चाहा सी, तुसाबै सिर्फ़ आपणै आपा बै काबू नैंई केरना चेहिऐ, तुसाबै परेशानी न धीरज भी डाहणा चेहिऐ, तुसाबै ऐण्ढै ज़ीणा चेहिऐ ज़ो परमेश्वरा बै शोभला लागा सा।

⁷तुसाबै ऐण्ढै नैंई ज़ीणा चेहिऐ ज़ो परमेश्वरा बै शोभला नी लागदा, तुसाबै आपणै ही टबरा सांही एकी दुज़ै री झ़ुरी केरनी चेहिऐ होर तुसाबै सिर्फ़ आपणै ही टबरा सांही एकी दुज़ै री झ़ुरी नैंई केरनी चेहिऐ, तुसाबै सैभी लोका सैंघै झ़ुरी भी केरनी चेहिऐ।

⁸किबैकि अगर ऐ गैला तुसा न बणिया रौहली, होर बढ़दी ज़ाली ता तुसाबै आसरै प्रभु यीशु मसीह री पछ़ियाणनै न नक्कमै होर निष्फल नी होंणै देणै।

⁹पर अगर कोई मांहणु ऐण्ढै नी ज़ीआ सा ता, सौ एक ऐण्ढै मांहणु सांही सा ज़ो कांणा सा। तेइयै बिसरू सा कि परमेश्वरै सौ तिन्हां पापा री तैंईंयैं माफ़ केरू सा ज़ो तेइयै मसीह न ऐणै न पैहलै केरै ती।

¹⁰एसा बजहा न हे प्यारो, आपणै शाधिणै होर चुनिणै बै सिद्ध केरनै री तैंईंयैं कोशिश केरा, किबैकि अगर ऐण्ढा केरलै ता तुसा कैधी ठोकर नी खाँणी।

¹¹बल्कि एसा रीतियै तुसा आसरै प्रभु होर उद्धारकर्ता यीशु मसीह रै हमेशा रौहणु आल़ै राज्य न बड़ै आदरा सैंघै प्रवेश केरना।

¹²ज़ैबैकि तुसै इन्हां गैला बै जाँणा सी, होर तुसाबै सच़ै वचन मिलै सी, तिन्हां न बणी रौहा सी, तैबै भी मूँ तुसाबै इन्हां गैलै री याद दिलाणै री तैंईंयैं त्यार रौहणा।

¹³होर हांऊँ ऐ आपणी तैंईंयैं सही समझ़ा सा कि ज़ैबै तैंईंयैं हांऊँ ऐई डेरै न सा, तैबै तैंईंयैं मूँ तुसाबै याद दिलाँदै रौहणा।

¹⁴किबैकि हांऊँ जाँणा सा कि मूँ छ़ेकै ही मौरना, किबैकि आसरै प्रभु यीशु मसीहै मुँभै साफ़ रीतियै रिहाऊ सा।

¹⁵ऐबै मूँ ऐण्ढी कोशिश केरनी कि मेरै मौरनै न बाद तुसै इन्हां गैला बै हमेशा याद केरी सकलै।

¹⁶किबैकि ज़ैबै आसै तुसाबै आपणै प्रभु यीशु मसीह री शक्ति रा होर ऐणै रा समाद धिना ती ता, च़लाकि सैंघै बणाईदी कहाणी पैंधै नी च़लदै, बल्कि आसै आपु तेइरा प्रताप हेरू ती।

¹⁷आसै तेई पवित्र ढौगा पैंधै तेई सैंघै ती ज़ैबै तेइबै परमेश्वर पिता रै ज़रियै आदर होर महिमा धिनी ती। तेई बौगत परमेश्वर, परम प्रतापी न ऐ बोलिया आवाज़ आई, “ऐ मेरा आपणा प्यारा बेटा सा ज़ुणीन हांऊँ खुश सा!” आसै आपु स्वर्गा न ऐणु आल़ी आवाज़ शुणी।

¹⁸

¹⁹आसै ऐ भी जाँणा सी कि मसीह रै बारै भविष्यवाणी केरनु आल़ै ज़ो गैला लिखी सा सौ पूरी सच़ सा, होर आसै ज़ो गैला तिन्हरी वापसी रै बारै न सिखाऊ ती, ते तिन्हां बै पक्का केरा सी, तुसाबै तिन्हां गैला बै शोभली तैरहा शुणना चेहिऐ, किबैकि ज़ैण्ढै निहारै न च़मकुदा एक दिऊआ लोका बै जाणै न सही बौत रिहाणै न मज़त केरा सा, ऐ गैला तुसाबै जाणनै न मज़त केरा सा की कि सच़ सा। आसरै प्रभु यीशु मसीह रै वापस ऐणै तक तुसाबै तिन्हां गैला बै शोभली तैरहा शुणना चेहिऐ। तेइरा ऐणा नोंऊँऐं ध्याड़ै रै दोतकै सांही प्याशा आंणना, होर सौ भ्याणु तारै सांही होंणा। तेई बौगता तेइरा प्याशा तुसरै दिला न च़मकणा होर परमेश्वरा बै तुसरै सामनै स्पष्ट रूपा न प्रगट केरना।

²⁰पर ऐ तुसरी तैंईंयैं समझणा जरूरी सा कि भविष्यवाणी केरनु आल़ै री ज़ो गैला तुसै शास्त्रा न पौढ़ा सी ते गैला सिर्फ़ भविष्यवाणी केरनु आल़ै रै आपणै विचार नैंई ती।

²¹किबैकि कोई भी भविष्यवाणी मांहणु री इच्छा न कैधी नी हुई, पर भक्तजन पवित्र आत्मा न होईया परमेश्वरा धिरै न बोला ती।