Read Pahari, Kullu 2 पतरस 2 Bible Online

2 पतरस 2 - Pahari, Kullu bible

2 पतरस 2

¹ठीक तैण्ढै तैरहा ज़ैण्ढै झ़ूठी भविष्यवाणी केरनु आल़ै बोहू पैहलै आऐ ती, तैबै झ़ूठी शिक्षा देणु आल़ै तुसा मौंझ़ै ऐणा। तिन्हां झ़ूठी शिक्षा न पौड़ना ज़ुणी सैंघै लोका मसीह न बशाह केरना बन्द केरना। इन्हां झ़ूठी शिक्षा देणु आल़ै मसीह बै आपणा मालक होंणै न भी नाँ केरना। ऐण्ढी तैरहा तिन्हां आपु बै च़ानक नाश केरना।

²होर बोहू सारै तिन्हां सांही लुचपन केरना, ज़ुणी री बजहा न सच़ाई री निन्दा केरनी।

³इन्हां झ़ूठी शिक्षा देणु आल़ै लालची होंणा होर तिन्हां तुसा न ढैबुऐ पाणै री तैंईंयैं बनावटी कहाणी शुणाइया तुसाबै धोखा देणा। परमेश्वरै बोहू पैहलै फैसला केरू ती कि तेई तिन्हां बै सज़ा देणी होर सौ ऐण्ढा केरनै री तैंईंयैं त्यार सा। तेई पक्का ते नाश केरनै।

⁴किबैकि ज़ैबै परमेश्वरै ते पाप केरनु आल़ै स्वर्गदूत नी छ़ौड़ै होर निहारे कुण्डा न पाऐ ताकि न्याय रै रोज़ा तैंईंयैं बन्दी रौहलै,

⁵होर पैहलै ज़ुगा री दुनिया भी नी छ़ौड़ी, बल्कि भक्तिहीन दुनिया पैंधै महा जलप्रलय भेज़िआ धर्मै रै प्रचारक नूहा समेत औठ मांहणु बच़ाऐ,

⁶होर सदोम होर गमोरा नगरा बै विनाशा री ऐण्ढी सज़ा धिनी कि ते भस्म केरै, ताकि ऐणु आल़ै भक्तिहीन लोकै री शिक्षै री तैंईंयैं एक उदाहरण बणलै,

⁷पर सदोमा रा नाश केरनै न पैहलै तेइयै धर्मी लूता बै ज़ो अधर्मी रै बुरै चाल चलना न बोहू दु:खी ती सौ बच़ाई।

⁸किबैकि सौ तिन्हरै बिच़ा न रौंहदै होर तिन्हरै अधर्मै रै कोमा बै हेरिया होर शुणिया हर रोज़ आपणै मना बै दु:खी केरा ती,

⁹प्रभु आपणै भक्ता बै परीक्षा न कौढणा होर अधर्मी बै न्याय रै रोज़ा तैंईंयैं सज़ै री दशा न रखणा भी जाँणा सा।

¹⁰खास केरिया तिन्हां बै ज़ो बुरी इच्छा रै पिछ़ै शरीरा रै मुताबक च़ला सी होर प्रभुता बै तुच्छ जाँणा सी, ते ढीठ होर हठी सी होर बड़ै औह्दै आल़ै बै बुरा भला बोलणै न नी डौरदै।

¹¹तैबै भी स्वर्गदूत ज़ो शक्ति होर सामर्था न तिन्हां न बड़ै सी, प्रभु रै सामनै तिन्हां बै बुरा भला बोलिया दोष नी लाँदै।

¹²ऐ झ़ूठी शिक्षा देणु आल़ै निर्बुद्धि पशु रै बराबर सी, ज़ो ढौकिणै होर नाश होंणै री तैंईंयैं पैदा हुऐ सी होर ज़ुणी गैला बै ज़ाणदै ही नैंई, तिन्हरै बारै न होरी बै बुरा भला बोला सी, तिन्हां आपणी सड़ाहटा न आपुऐ शौढ़ना।

¹³होरी रा बुरा केरनै रै बदलै तिन्हरा बुरा होंणा। तिन्हां बै दिन-ध्याड़ै भोग-विलास केरना शोभला लागा सा, ऐ कलंक होर दोष सा, ज़ैबै ते तुसा सैंघै खा-पीआ सी ता आपणी तरफा न प्रेम भोज केरिया भोग-विलास केरा सी।

¹⁴तिन्हरी औछ़ी न व्यभिचार बौसू सा होर ते पाप केरै बगैर रूकी नी सकदै; ते तिन्हां लोका बै धोखा देआ सी ज़ो मसीह पैंधै पूरी तैरहा बशाह नी केरदै, होर ते तिन्हां बै पापा धिरै बै नेआ सी। ज़ादा न ज़ादा च़ीजा पाणै री तिन्हरै लोभा री बजहा न परमेश्वरा तिन्हां बै सज़ा देणी।

¹⁵ते सीधी बौता बै छ़ौड़िआ भटकै सी होर बओरै रै बेटै बिलामै री बौता न च़ला सी, ज़ुणियै बुरै कोम केरिया ढैबुऐ कमोणा पसन्द केरै।

¹⁶पर परमेश्वरै सौ तेसा बुराई री तैंईंयैं डाँटू ज़ो तेइयै केरी ती। तेइरी गधियै मांहणु री बोली बोलिया होर भविष्यवाणी केरनु आल़ै बै गलत केरनै न रोकू।

¹⁷ऐ झ़ूठी शिक्षा देणु आल़ै शुकै कुँऐ होर ब्यानै लाइया उड़ाऐदै बादला सांही सी, परमेश्वरै तिन्हरी तैंईंयैं हमेशा रा निहारा ठहराऊ सा।

¹⁸ते घमण्डै री बेकार गैला केरिया लुचपनै रै कोमै लाइया तिन्हां लोका बै शारीरिक इच्छा न फसा सी ज़ो भटकैंदै न हाज़ी निकल़दै ही लागै सी।

¹⁹ते तिन्हां बै आज़ाद होंणै री प्रतिज्ञा देआ सी, पर आपु सड़ाहटा रै दास सी, किबैकि ज़ो मांहणु ज़ुणीन हारू सा, सौ तेइरा दास बणिया सा,

²⁰होर ज़ैबै लोका प्रभु होर उद्धारकर्ता यीशु मसीह री पछ़ियाणै रै ज़रियै दुनिया री कई किस्मै री बुराई न बच़िया निकतै, होर फिरी तेथा न फसिया हारै, ता तिन्हरी पिछ़ली दशा पैहिली दशा न भी बुरी हुई सा।

²¹मेरै बोलणै रा मतलब ऐ सा किबैकि ज़ुण लोकै मसीह न कैधी बशाह नी केरू ती तिन्हां न ज़ादा परमेश्वर तिन्हां लोका बै सज़ा देणी ज़ो तेइबै बोहू कठोरता सैंघै छ़ौड़ा सी, ऐ तिन्हां लोका री तैंईंयैं बेहतर होंदा ज़ो कैधी नी जाणदै ती कि धार्मिक तरीकै न आपणी ज़िन्दगी कैण्ढै ज़ीणी। ऐबै ते जाँणा सी की कि सही सा पर परमेश्वरा रै हुक्मा रा नाँह केरा सी ज़ो आसै प्रेरितै तिन्हां बै सिखाऊ।

²²ज़ैण्ढी तैरहा ज़ो बर्ताव ते केरदै लागै सी सौ तैण्ढै सी ज़ैण्ढै कुता ज़ो आपणी उल्टी खाँणै री तैंईंयैं वापस एज़ा सा होर तिन्हां सुँगरनी सांही सा ज़ो नहाईया फिरी च़िकरी न लेटणै री तैंईंयैं ज़ा सा।