Read Pahari, Kullu 2 पतरस 3 Bible Online

2 पतरस 3 - Pahari, Kullu bible

2 पतरस 3

¹हे प्यारो, ऐबै हांऊँ तुसाबै ऐ दुज़ी चिट्ठी लिखा सा, होर दुई चिट्ठी न हांऊँ तुसाबै याद दिलाइया सही तरीकै न सोच़णै री तैंईंयैं उत्साहित केरनै री कोशिश केरदा लागा सा ज़ो किछ़ गैला तुसै पैहलै ही सिखु सा।

²हांऊँ ऐ तैबै केरदा लागा सा किबैकि हांऊँ चाहा सा तुसै तिन्हां गैला बै याद केरा ज़ो परमेश्वरा री भविष्यवाणी केरनु आल़ै बोहू पैहलै न बोली ती, होर आसरै प्रभु यीशु मसीहा, आसरै उद्धारकर्ता री शिक्षा, ज़ो तुसा हागै आऐदै प्रेरितै तुसै सिखाऐ सी।

³सैभी न खास गैल ऐ सा कि तुसाबै पता होंणा चेहिऐ कि मसीह वापस ऐणै न पैहलै आखरी रोज़ा न ऐण्ढै लोका होंणा ज़ुणियै तुसरा मज़ाक उड़ाणा, किबैकि तुसै बशाह केरा सी कि मसीह दबारा वापस ऐणा। तिन्हां ते बुरै कोम केरनै ज़ो तिन्हां बै खुश केरा सी।

⁴तेइरै ऐणा रा वायदा बिलकुल सच़ नी ऑथि! सौ बिल्कुल नी ऐन्दा लागा सा! किबैकि ज़ो पैहलै परमेश्वरा रै लोका ती ते सैभ मूँऐं सी, पर फिरी भी किछ़ नी बदलू। हालात ऐण्ढै सी ज़ो हमेशा न होंदै आऐ सा ज़ैबै न लेइया परमेश्वरै सृष्टि बणाई सा!

⁵ते ज़ाणि बुझ़िया एसा सच़ाई रा ध्यान नी देंदै कि सृष्टि री शुरूआती न परमेश्वरै बोलू होर आसमान बणू। आपणै शब्दा न तेइयै धौरती पाणी न अलग केरी होर शुकी ज़ैगा पाणी रै ज़रियै बाहरै खोली।

⁶इन्हां पाणी रै ज़रियै परमेश्वरै तेसा दुनिया रा नाश केरू ज़ो पाणी न ज़िन्दी ती। तेइयै एक बोहू बड़ा गाश भेज़ू होर गाशा सैंघै धौरती पैंधै बाड़ आई होर सैभ ज़िन्दै प्राणी नाश केरै।

⁷पर वर्तमान काला रा आसमान होर धौरती तेही वचनै रै द्वारा रखुई सा कि, ते फुकिलै होर ते भक्तिहीन मांहणु रै न्याय होर नाश होंणै रै रोज़ा तैंईंयैं ऐण्ढै रखिणै।

⁸हे प्यारो, ऐ एक गैल तुसा न छिपी नी रौहै कि, प्रभु रै औखै एक रोज़ हज़ार बौष रै बराबर सा होर हज़ार बौष एक रोज़ै रै बराबर सा।

⁹प्रभु आपणी प्रतिज्ञै रै बारै न देर नी केरदा, ज़ैण्ढी देर कई लोका समझ़ा सी, पर तुसरै बारै न धीरज रखा सा, होर नी च़ाँहदा कि कोई नाश होला, बल्कि सैभी बै मन फेरनै रा मौका मिलला।

¹⁰पर प्रभु रा ध्याड़ा च़ोरा सांही ऐणा, तेई ध्याड़ै न आसमान बड़ी हड़हड़ाहटै शब्दा सैंघै ज़ाँदै रौहणा होर सारी धातु तौतै होईया पिघलणी, होर धौरती होर तेइरै कोमा रा न्याय होंणा।

¹¹किबैकि परमेश्वरा पूरी तैरहा इन्हां सैभी च़ीज़ा रा नाश केरना ज़ैण्ढा मैं ऐबै बोलू, तुसाबै पूरी तैरहा परमेश्वरा बै खुश केरनु आल़ै तरीकै सैंघै बर्ताव केरना चेहिऐ।

¹²होर परमेश्वरै रै तेई ध्याड़ै री इंतज़ार कैण्ढै तैरहा केरना चेहिऐ होर तेइरै छ़ेकै ऐणै री तैंईंयैं कैण्ढै कोशिश केरनी चेहिऐ; ज़ुणिरी बजहा सैंघै आसमान औगी लाईया पिघल़णा, होर आसमान रै तारै बोहू गर्म होईया पिघल़णा।

¹³पर आसै आश केरा सी कि ज़ैण्ढै तेइयै वायदा केरू ती कि तैण्ढै ही एक नोंऊँआं आसमान होर धौरती बनाणै रा भी। सिर्फ़ धर्मी लोक तौखै रौहा सी।

¹⁴हे प्यारो, ज़ैबै तैंईंयैं तुसै इन्हां गैला री आशा रखा सी ता, कोशिश केरा कि तुसै शान्ति न तेई सामनै निष्कलंक होर निर्दोष ठहरलै।

¹⁵आसरै प्रभु रै धीरजा बै एक मौका समझ़ा ज़ो सौ तुसाबै ऐणु आल़ै न्याय न बच़णै री तैंईंयैं देंदा लागा सा। ऐ सौऐ सा ज़ो आसरै प्यारे सैंघी पौलुसै भी तेसा बुद्धि रा इस्तेमाल केरिया ज़ो परमेश्वरै तेइबै धिनी ती एक चिट्ठी न तुसाबै लिखू ती।

¹⁶तैण्ढाऐ तेइयै विश्वासी बै आपणी सैभ चिट्ठी न भी ऐ गैला लिखी सा, ज़ुणीन केतरी गैला ऐण्ढी सी ज़ुणिबै समझ़णा मुश्किल सा होर ज़ुणी लोकै शोभली तैरहा नी सिखु होर ज़ुण पक्कै नी ऑथि की ते कि बशाह केरा सी, इन्हां मुश्किल गैला रा मतलब गलत तरीकै न समझा सी, ज़ैण्ढै की ते शास्त्रा रै दुज़ै पैहरै रै वचना रा मतलब समझा सी। ऐण्ढा केरनै न ते आपु परमेश्वरा बै नाश केरनै री बजहा बणा सी।

¹⁷ऐबै हे प्यारो, तुसै पैहलै न जाँणा सी कि ऐ गैला होंणी। तैबै होशियार रौहात्, ताकि परमेश्वरा रै बिधाना रा पालन नी केरनु आल़ै लोक झ़ूठी शिक्षा देइया भरमाई न सकलै। अगर तुसै तिन्हरी गैला मना सी ता तिन्हरी सच़ी गैला पैंधै बशाह केरना बन्द केरलै ज़ो तुसै पैहलै मजबूती सैंघै बशाह केरा ती।

¹⁸पर आसरै प्रभु होर उद्धारकर्ता यीशु मसीह रै अनुग्रह होर पछ़ियाणा न बढ़दै ज़ात्। तेही री महिमा ऐबै भी हो, होर ज़ुगा-जुगा तैंईंयैं होंदी रौहै। आमीन।