Read Pahari, Kullu 1 यूहन्ना 2 Bible Online

1 यूहन्ना 2 - Pahari, Kullu bible

1 यूहन्ना 2

¹हे मेरै शोहरुओ, हांऊँ इन्हां गैला बै तुसरी तैंईंयैं एथै री तैंईंयैं लिखदा लागा सा कि तुसै पाप नी लोड़ी केरू होर अगर कोई पाप केरलै ता परमेश्वर बापू हागै आसरा पक्ष लेणु आल़ा एक सा, “यीशु मसीह ज़ो धर्मी सा।”

²होर सौहै आसरै पापा रा प्रायश्चिता री बलि सा सिर्फ़ आसरै केल्ही नी बल्कि सारी दुनियै रै लोकै रै पापा रा बी।

³आसै तेइरै हुक्मा बै मनलै ता एथा न आसा ज़ाणना कि आसै यीशु बै जाँणा सी।

⁴ज़ो कोई ऐ बोला सा कि “हांऊँ तेइबै जाँणा सा” होर तेइरी हुक्म बै नी मनला सौ झ़ूठा सा होर तेईन सच़ाई नी ऑथि।

⁵पर ज़ो परमेश्वरा रै वचना बै मनला, तेई पैंधै परमेश्वरा री झ़ुरी सच़ सिद्ध होआ सा एथा न ऐ पता च़ला सा कि आसै तेईन सी

⁶अगर कोई बोला सा कि हांऊँ तेईन बणी रौहा सा ता तेइरी तैंईंयैं ऐ ज़रूरी सा कि आपु बी तैण्ढाऐ च़लला ज़ैण्ढा यीशु च़ला ती।

⁷हे मेरै प्यारे भाइयो, हांऊँ तुसाबै कोई नोंऊँआं हुक्म नी लिखदा, पर पराणा हुक्म सा ज़ो तुसाबै शुरू न मिलू सा; ऐ पराणा हुक्म सौ वचन सा, ज़ैबै तुसै यीशु मसीह पैंधै बशाह केरू।

⁸फिरी बी हांऊँ तुसाबै नोंऊँआं हुक्म लिखा सा किबैकि एथा रा सच़ मसीह न हेरूआ होर तुसा न बी; किबैकि निहारा बुराई बै रिहा सा होर प्याशा अच्छाई बै रिहा सा।

⁹ज़ुण कोई ऐण्ढा बोला सा कि हांऊँ प्याशै न च़ला सा पर आपणै बिश्वासी भाई सैंघै बैर रखा सा, सौ हाज़ी तैंईंयैं निहारै न च़ला सा।

¹⁰ज़ुण कोई आपणै भाई सैंघै झ़ुरी रखा सा सौ प्याशै न सा होर ठोकर नी खाई सकदा।

¹¹पर, ज़ुण आपणै भाई सैंघै बैर रखा सा, सौ निहारै न सा होर निहारै न च़ला सा होर ऐ नी ज़ाँणदा कि कौखै च़ौलू सा, किबैकि निहारै तेइरी औछ़ी कांणी केरी सी।

¹²हे शोहरुओ, हांऊँ तुसाबै एथै री तैंईंयैं लिखा सा कि यीशु मसीह रै नाँ न तुसरै पाप माफ हुऐ।

¹³ओ बापूओ, हांऊँ तुसाबै एथै री तैंईंयैं लिखा सा, कि ज़ो शुरू न लेइया सा तुसैई तेइबै जाँणा सी, हे ज़ुआनो हांऊँ तुसाबै एथै री तक लिखा सा, कि तुसै तेई शैताना पैंधै जय पाई सा, हे शोहरूओ, मैं तुसाबै एथै री तैंईंयैं लिखू सा कि तुसै परमेश्वर बापू बै जाँणा सी

¹⁴ओ बापूओ, मैं तुसाबै एथै री तैंईंयैं लिखू सा कि, ज़ो शुरू न सा तुसै सौ ज़ाणू सा, हे ज़ुआनो, मैं तुसरी तक एथै री तैंईंयैं लिखू, कि तुसै मज़बूत होलै, होर परमेश्वरा रा वचन तुसा न बणी रौहला, होर तुसै तेई शैताना पैंधै जय पाई सा।

¹⁵तुसै न ता दुनिया सैंघै होर न ही दुनिया री चीज़ा सैंघै झ़ुरी डाह, अगर कोई दुनिया न झ़ुरी डाआ सा, ता तेइन पिता परमेश्वरा री झ़ुरी नैंई ऑथि।

¹⁶किबैकि ज़ो किछ़ दुनिया न सा, मतलब शरीरा री अभिलाषा होर औछ़ी री अभिलाषा होर कमाई रा घमण्ड, सौ पिता परमेश्वरा री तरफा न नैंई सा पर दुनिया री तरफा न सा।

¹⁷दुनिया होर दुनिया री इच्छा सैभ दूऐ खत्म होंणी सा, पर ज़ो परमेश्वर री इच्छा पैंधै चला सा तेई हमेशा बणीया रौहणा।

¹⁸ओ शोहरूओ, ऐ मसीह रै वापस ऐणै रा आखरी बौगत सा; होर तुसै शुणुदा सा कि मसीह रा बरोधी ऐणु आल़ा सा, तुंई रै मुताबक ऐबै भी बोहू मसीह रै बरोधी खड़ै हुऐंदे सी; ऊँई न आसा बुझणा कि ऐ आखरी बौगत सा।

¹⁹तै मसीह बरोधी ज़ो निकतै ता आसा मौंझ़ै न, पर आसा मौंझ़ै नी ती ऑथि; किबैकि अगर आसा मौंझ़लै होलै, ता आसा सैंघै रौंहदै; पर निकतै तैबै कि ऐ जाहिर हो कि सौ सैभ आसा मौंझ़लै नी ती ऑथि।

²⁰पर तूसरा ता तेई पवित्र आत्मा सैंघै अभिषेक हुआ सा, होर तुसै सैभ किछ़ जाँणा सी।

²¹मैं तुसाबै तैबै नैंई लिखू कि तुसै सच़ाई बै नैंई जाणदै, पर तैबै कि तुसै जाँणा सी, होर तैबै कि झूठ, सच़ा री तरफा न नैंई।

²²झूठा कुण सा? सिर्फ़ सौ ऐ ज़ुण यीशु रै मसीह होंणै रा नाँ केरा सा; होर मसीह रा बरोधी सौ ऐसा, ज़ो पिता परमेश्वर होर बेटै यीशु मसीह रा नाँ केरा सा।

²³ज़ो कोई बेटै रा नाँह केरा सा तेई हागै पिता परमेश्वर बी नैंई ज़ो बेटै बै मना सा, तेई हागै बापू परमेश्वर भी सा।

²⁴ज़ैबै तुसै मसीह न बशाह केरू ती, तुसै ज़ो सच़ा सन्देश शुणु सा, अगर सौ तुसा न बणीया रौहु ता तुसै भी बेटै, होर पिता परमेश्वरा न बणीया रौहणा।

²⁵होर ज़ुणिरा तेइयै (प्रभु यीशुऐ) आसा सैंघै वायदा केरू सा कि सौ आसाबै हमेशा री ज़िन्दगी देला।

²⁶हांऊँ तुसाबै तिन्हां लोका रै बारै न चेताऊणी देआ सा कि ज़ो तुसाबै झ़ूठी शिक्षा देइआ धोखा देणै री कोशिश केरा सी।

²⁷होर तुसरी तैंईंयैं पवित्र आत्मा सैंघै अभिषेक केरू सा, ज़ो तुसै मसीह न पाई सा, तुसा न सा होर तैबै ऐ कोई बै जरूरत नी ऑथि कि तुसाबै सच़ाई रै बारै न शिक्षा दै, एथा रै बदलै न पवित्र आत्मा (ज़ो मसीहै तुसाबै धिनी सा) तिन्हां गैला री सच़ाई रै बारै न ज़ाणनै बै तुसरी मज़त केरला, होर ज़ो पवित्र आत्मा तुसाबै सिखा सा सौ पूरा सच़ सा, एथा न किछ़ बी झ़ुठ नी ऑथि। तैबै मसीह सैंघै बणिया रौहा, ज़ैण्ढा पवित्र आत्मै तुसाबै केरनै री तैंईंयैं बोलू सा।

²⁸तैबै हे शोहरूओ, तेईन बणिया रौहा ज़ैबै सौ जाहिर होला ता आसाबै हौंसला हो, होर आसै तेई रै वापस ऐणै पैंधै तेइरै सामणे शर्मिंदा न हो

²⁹अगर तुसै जाँणा सी कि मसीह धर्मी सा, ता ऐ भी जाँणा सी कि ज़ो कोई धर्मा रा कोम केरा सा सौ परमेश्वरा री औलाद सा।