Read Pahari, Kullu 1 यूहन्ना 3 Bible Online

1 यूहन्ना 3 - Pahari, Kullu bible

1 यूहन्ना 3

¹हेरा, बापूऐ आसा सैंघै कैण्ढी झ़ुरी डाही कि आसै परमेश्वरा रै औलाद कहलाऐ; होर आसै सी भी ऐई बजहा दुनिया आसाबै नैंई जाणदी, किबैकि दुनिया रै लोके भी प्रभु यीशु बै नैंई जाणु।

²हे प्यारो, ऐबै आसै परमेश्वरा रै औलाद सी, होर हाज़ी तैंईंयैं ऐ जाहिर नैंई हुआ कि आसै कि किछ़ होलै! ऐतरा जाँणा सी कि ज़ैबै प्रभु यीशु प्रकट होला ता आसै तेई सांही होंणा, किबैकि तेइबै तैण्ढाऐ हेरणा ज़ैण्ढा सौ सा।

³होर ज़ो कोई मसीह पैंधै ऐ आशा डाआ सा, सौ आपणै आपा बै तैण्ढाऐ पबित्र केरा सा ज़ैण्ढा सौ सा।

⁴ज़ो कोई पाप केरा सा, सौ बिधाना रा बरोध केरा सा; होर पाप ता बिधाना रा बरोध केरा सा।

⁵तुसै जाँणा सी कि यीशु मसीह, तैबै आऊ कि आसरै पापा बै खत्म केरै; होर तेई रै ज़िन्दगी न कोई पाप नैंई ऑथि।

⁶होर ज़ो कोई प्रभु यीशु न बणीया रौहा सा, सौ पाप नैंई केरदा ज़ो कोई पाप केरा सा तेइयै सौ न भाल़ुदा सा होर न तेइबै जाँणा सा।

⁷प्यारे शोहरूओ, कोई रै भरमाणै न मता ऐन्दै; ज़ो धर्मा रै कोम केरा सा, सौ ऐ मसीह रै बराबर धर्मी सा।

⁸ज़ो कोई पापा रै कोम केरदा रौहा सा शैताना री तरफा न सा। परमेश्वरा रा बेटा तैबै आऊ कि शैताना रा कोम नाश केरै।

⁹ज़ो कोई परमेश्वरा न पैदा हुआ सा, सौ पाप नैंई केरदा; किबैकि परमेश्वरा रा बेज़ा तेईन बणीया रौहा सा, होर सौ पाप केरी ही नैंई सकदा किबैकि सौ परमेश्वरा न पैदा हुआ सा

¹⁰ऊँई लाईया ही आसै परमेश्वरा री औलाद होर शैताना रै औलाद बूझा सी; ज़ो कोई धर्मा रै कोम केरा सी सौ परमेश्वरा, होर ज़ुण लोका आपणै भाई सैंघै झ़ुरी डाह सी ते परमेश्वरा री धिरै न सी।

¹¹ज़ो समाद तुसै शुरू न शुणु सा, सौ ऐ सा कि आसै एकी दुज़ै सैंघै झ़ुरी डाहलै;

¹²होर तुसै आदमा रै शोहरू कैना सांही मता बणदै, ज़ो तेई शैताना सैंघै ती, ज़ुणियै आपणा भाई मारू ती होर सौ किबै मारू? तैबै तेई रै कोम बूरै ती, होर तेई रै भाई रै कोम धर्मै रै ती।

¹³हे भाइयो बैहणा, अगर दुनिया रै लोका तुसा सैंघै बैर डाहलै ता तुसै हैरान मता होंदै।

¹⁴आसै जाँणा सी कि आसै मौऊती न पार होईया ज़िन्दगी न पुजै सी; किबैकि आसै भाई सैंघै झ़ुरी डाह सी। ज़ो झ़ुरी नैंई डांहदा सौ मौऊती री दशा न रौहा सा।

¹⁵ज़ो कोई आपणै भाई सैंघै बैर डाह सा, सौ खूनी सा; तुसै जाँणा सी कि कोई खूनी न हमेशा री ज़िन्दगी नैंई रौंहदी।

¹⁶आसै झ़ुरी तैबै जाणी कि तेइयै आसरी तैंईंयैं आपणा प्राण धिना, तैबै आसाबै भी लोड़ी कि आपणै भाई री तैंईंयैं आपणा प्राण दै।

¹⁷पर ज़ो कोई हागै दुनिया रा धन हो सौ आपणै भाई बै गरीब ज़ाणिया, तेई पैंधै तरस नैंई खाँदा हो, ता तेई हागै परमेश्वरा री झ़ुरी कैण्ढी तैरहा बणीया रौहणी।

¹⁸ओ मेरै प्यारै शोहरूओ, आसै वचन होर जीभा सैंघै ही नैंई, पर कोम होर सच़ाई रै ज़रियै भी झ़ुरी डाहलै।

¹⁹ज़ैबै आसै एकी दुज़ै सैंघै झ़ुरी रखा सी, ऊँई सैंघै ही आसै पछ़ियाणिया सी कि आसै सच़ाई रै सी; होर ज़ुणी गैला न आसरा मन आसाबै दोष देला, तेइरै बारै न यीशु मसीह रै सामनै आपणै-आपणै मना बै तसल्ली देई सकलै,

²⁰किबैकि परमेश्वर आसरै मना न बड़ा सा, होर सैभ किछ़ जाँणा सा।

²¹हे मेरै प्यारै भाइयो, बैहणा, अगर आसरा मन आसाबै दोष न दै, ता आसाबै परमेश्वरा रै सामनै हौंसला होआ सा,

²²होर ज़ो किछ़ आसै मुँगा सी, सौ आसाबै तेईन मिला सा, किबैकि आसै तेइरै हुक्मा बै मना सी होर ज़ो तेइबै खुश केरा सा आसै सौऐ केरा सी।

²³परमेश्वरा रा हुक्म ऐ सा कि आसै तेई रै बेटै यीशु मसीह रै नाँह पैंधै बशाह केरलै, होर ज़ैण्ढी तेइयै आसाबै हुक्म धिना सा तेई रै मुताबक आपु न झ़ुरी डाहलै।

²⁴ज़ो तेइरै हुक्मा बै मना सी, ते परमेश्वरा न होर परमेश्वर तिन्हां न बणिया रौहणा होर तेथा रा, मतलब तेई पवित्र आत्मा न ज़ो तेइयै आसाबै धिनी सा, आसै जाँणा सी कि सौ आसा न सा।