Read Pahari, Kullu 1 यूहन्ना 4 Bible Online

1 यूहन्ना 4 - Pahari, Kullu bible

1 यूहन्ना 4

¹ओ मेरै प्यारो, हर एक मांहणु बै झ़ुरी मता केरदै, बल्कि मांहणु बै परखा कि सौ परमेश्वरा री तरफा न सा कि नैंई; किबैकि बोहू झ़ूठै भविष्यवाणी केरनु आल़ै दुनिया न निकतै सी।

²परमेश्वरै री आत्मा तुसै ऐण्ढी तैरहा पछ़ियाणी सका सी: ज़ो आत्मा ऐ मना सा कि यीशु मसीह मांहणु रा रूप लेयिआ आऊ सा सौ परमेश्वरा री तरफा न सा,

³होर ज़ो आत्मा यीशु बै नैंई मनदी, सौ परमेश्वरा री तरफा न नैंई ऑथि; होर सौऐ ता मसीह बरोधी आत्मा सा, ज़ुणिरै बारै न तुसै पैहलै न ओरु शुणुदा सा कि सौ ऐणु आल़ा सा, होर सौ ऐबै भी दुनिया न सा।

⁴ओ प्यारे शोहरूओ, तुसै परमेश्वरा रै सी, होर तुसै तिन्हां झ़ूठी भविष्यवाणी केरनु आल़ै न जीतू सा; किबैकि ज़ो पवित्र आत्मा तुसा न सा सौ तेई शैतानै री शक्ति न बड़ी सा ज़ो ऐई दुनिया न बड़ा सा।

⁵तै झ़ूठी भविष्यवाणी केरनु आल़ै सी, ऐई बजहा न तैआ दुनिया री गैला केरा सी, होर दुनिया रै लोक तिन्हरी शुणा सी।

⁶आसै परमेश्वरा रै सी। ज़ो परमेश्वरा बै जाँणा सा, सौ आसरी शुणा सा; होर ज़ो परमेश्वरा बै नैंई जाणदा सौ आसरी नैंई शुणदा। ऐई बजहा न आसै सच़ बोलणु आल़ा होर भरमाणै आल़ै री आत्मा बै पहचाणी सका सी।

⁷हे प्यारो, आसै आपु न झ़ुरी डाहे; किबैकि झ़ुरी परमेश्वरा न सा, ज़ो कोई एकी दुज़ै सैंघै झ़ुरी डाह सा, सौ परमेश्वरा री औलाद सा होर परमेश्वरा बै जाँणा सा।

⁸ज़ो कोई दुज़ै सैंघै झ़ुरी नैंई डाहन्दा सौ परमेश्वरा बै नैंई जाणदा, किबैकि परमेश्वर झ़ुरी सा।

⁹ज़ो झ़ुरी परमेश्वर आसा सैंघै डाह सा, सौ ऊँई लाईया ऐ जाहिर हुआ कि परमेश्वरै आपणा इकलौता बेटा दुनिया न भेज़ू कि आसै तेइरै ज़रियै हमेशा री ज़िन्दगी पालै।

¹⁰सच़ी झ़ुरी ऊँई न नैंई ऑथि कि आसै परमेश्वरा सैंघै झ़ुरी केरी, पर ऊँई न सा कि तेइयै आसा सैंघै झ़ुरी डाही होर आसरै पापै रै प्रायश्चितै री तैंईंयैं आपणा बेटा भेज़ू।

¹¹हे मेरै प्यारो, ज़ैबै परमेश्वरै आसा सैंघै ऐण्ढी झ़ुरी डाही कि आसाबै भी आपु न झ़ुरी डाहणी चेहिऐ।

¹²पर परमेश्वर कैधी कोइयै नैंई हेरू; अगर आसै आपु न झ़ुरी डाहलै, ता परमेशवर आसा न बणीया रौहा सा होर तेइरी झ़ुरी आसा न जाहिर होआ सा।

¹³तैबै आसै जाँणा सी कि आसै परमेश्वरा न बणिया रौहा सी, होर सौ आसा न; किबैकि तेइयै आपणी आत्मा आसाबै धिनी सा।

¹⁴आसै बेटा बी हेरू सा कि होर गुआही देआ सी कि बापू परमेश्वरै बेटै बै दुनिया रै लोक रा मुक्तिदाता केरिया भेज़ू सा।

¹⁵ज़ो कोई ऐ मना सा कि यीशु परमेश्वरा रा बेटा सा, परमेश्वर तेइन बणीया रौहा सा, होर सौ परमेश्वरा न बणीया रौहा सा।

¹⁶ज़ो झ़ुरी परमेश्वर आसा सैंघैं डाह सा, सौ आसै जाणु सा होर आसाबै तेइरा बशाह सा। परमेश्वर झ़ुरी सा, ज़ो झ़ुरी न बणीया रौहा सा, सौ परमेश्वर न बणीया रौहा सा, होर परमेश्वर तेईन बणीया रौहा सा।

¹⁷ऊँई सैंघै ही झ़ुरी आसा न सिद्ध हुई सा कि न्याय रै रोज़ आसाबै हौंसला हो; ज़ैण्ढा सौ सा तैण्ढै ही दुनिया न आसै भी सी।

¹⁸झ़ुरी न डौर नैंई होन्दी, बल्कि सच़ी झ़ुरी डौरा बै दूर केरा सा; किबैकि डौरा रा नाता सज़ा सैंघै होआ सा, पर ज़ो डौरा सा सौ झ़ुरी न सिद्ध नैंई बणु।

¹⁹आसै ऊँईरी तैंईंयैं झ़ुरी केरा सी, कि पैहलै परमेश्वरै आसा सैंघै झ़ुरी केरी।

²⁰अगर कोई बोले, “हांऊँ परमेश्वरा सैंघै झ़ुरी डाह सा” पर आपणै विश्वासी भाई सैंघै दुश्मनी डाह सा सौ झूठा सा; किबैकि ज़ो आपणै विश्वासी भाई सैंघै ज़ुणियै सौ हेरू सा, झ़ुरी नैंई केरदा, ता सौ परमेश्वरा सैंघै भी ज़ुणियै सौ हेरूदा नैंई झ़ुरी नैंई डाही सकदा।

²¹ज़ुणीन आसाबै ऐ हुक्म मिलीदी सा कि ज़ो कोई परमेश्वरा सैंघै झ़ुरी डाह सा सौ आपणै विश्वासी भाई सैंघै भी झ़ुरी डाहै।