Read Pahari, Kullu 1 यूहन्ना 5 Bible Online

1 यूहन्ना 5 - Pahari, Kullu bible

1 यूहन्ना 5

¹ज़ुणिरा ऐ बशाह सा कि यीशु ही मसीह सा, ज़ो परमेश्वर बापू री औलाद सा; होर ज़ो कोई बापू परमेश्वरा सैंघै झ़ुरी डाह सा, सौ तेइरी औलादा सैंघै बी झ़ुरी डाहा सा।

²ज़ैबै आसै परमेश्वरा सैंघै झ़ुरी डाह सी, हौर परमेश्वरा रै हुक्मा बै मना सी, ता ऊँई न बुझा सी कि आसै परमेश्वरा रै औलादा सैंघै झ़ुरी डाह सी।

³परमेश्वरा सैंघै झ़ुरी डाहणा ऐ सा कि आसै तेइरी हुक्म बै मनलै; होर तेइरा हुक्म मुश्किल नैंई ऑथि।

⁴किबैकि ज़ो कोई परमेश्वरा री औलाद सा, सौ दुनिया पैंधै जीत पा सा; होर बशाह रै ज़रियै आसै दुनिया पैंधै जीत पा सी।

⁵दुनिया न जीत पाणु आल़ा कुण सा? मतलब सौ ज़ुणिरा ऐ बशाह सा कि यीशु, परमेश्वरा रा बेटा सा।

⁶यीशु मसीह रै बारै न सोच़ा, ज़ो परमेश्वरा री तरफा न आऊ; परमेश्वरै ऐ प्रगट केरु कि परमेश्वरै यीशु मसीह सच़ीऐ भेजु, ज़ैबै यीशुऐ पाणी न बपतिस्मा लेऊ; बल्कि ज़ैबै यीशु मसीह क्रूसा पैंधै मूँआ ता तेइरै शरीरा न लोहू निकता, होर परमेश्वरा री आत्मा गुआही देआ सा कि सच़ीऐ यीशु मसीह परमेश्वरा री तरफा न आऊ ती।

⁷ऐ गुआही देणु आल़ै त्राई सी,

⁸आत्मा, पाणी होर लोहू; त्राऐ गैला सा ज़ुणी सैंघै ऐ पता लागा सा कि मसीहा परमेश्वरा न आऊ सा।

⁹ज़ैबै आसै मांहणु री गुआही मना सी, ता परमेश्वरा री गुआही ता तेईन बड़ी सा; होर परमेश्वरा री गुआही ऐसा कि तेइयै आपणै बेटै रै बारै न गुआही धिनी सा।

¹⁰ज़ो परमेश्वर रै बेटै पैंधै बशाह केरा सी सौ आपु न गुआही डाह सा। ज़ुणियै परमेश्वरा पैंधै बशाह नैंई केरू तेइयै सौ झूठा ठहराऊ, किबैकि तेइयै तेसा गुआही पैंधै बशाह नैंई केरू ज़ो परमेश्वरै आपणै बेटै रै बारै न धिनीदी सा।

¹¹होर सौ गुआही ऐसा कि परमेश्वरै आसाबै हमेशा री ज़िन्दगी धिनी सा, होर ऐ ज़िन्दगी तेई रै बेटै न सा।

¹²ज़ुणी हागै बेटा सा, तेई हागै हमेशा री ज़िन्दगी सा, होर ज़ुणी हागै परमेश्वरा रा बेटा नैंई ऑथि, तेई हागै हमेशा री ज़िन्दगी भी नैंई ऑथि।

¹³यूहन्ना बोला सा, मैं तुसाबै, ज़ो परमेश्वरा रै बेटै रै नाँ पैंधै बशाह केरा सी, ऊँईरी तैंईंयैं लिखा सा कि तुसै बुझा कि हमेशा री ज़िन्दगी तुसरी सा।

¹⁴होर परमेश्वरा रै सामनै आसाबै ऐ हौंसला होआ सा, सौ ऐ सा; कि अगर आसै तेइरी इच्छा रै मुताबक किछ़ मौंगा सी, सौ आसरी शुणा सा

¹⁵ज़ैबै आसै बुझा सी कि ज़ो किछ़ आसै परमेश्वरा न मूँगा सी सौ आसरी शुणा सा, ता ऐ भी बुझा सी कि ज़ो किछ़ आसै तेईन मुँगु, सौ पाऊ सा।

¹⁶अगर कोई आपणै विश्वासी भाई बै ऐण्ढा पाप केरदा हेरू ज़ुणिरा नतीज़ा मौऊत नी ऑथि, ता अर्ज़ा केरलै, होर परमेश्वर तेइबै तिन्हरी तैंईंयैं, ज़ुणियै ऐण्ढा पाप केरू सा ज़ुणिरा नतीज़ा मौऊत नी ऑथि, ज़िन्दगी देला। पाप ऐण्ढा भी होआ सा ज़ुणिरा नतीज़ा मौऊत सा; ऊँई रै बारै न हांऊँ अर्ज़ा केरनै री तैंईंयैं नैंई बोलदा।

¹⁷सैभी तैरहै रा अधर्म ता पाप सा पर ऐण्ढा पाप भी सा ज़ुणिरा नतीज़ा मौऊत नैंई ऑथि।

¹⁸आसै जाँणा सी कि ज़ो कोई परमेश्वरा री औलाद सा, सौ पाप नैंई केरदा; तेइबै प्रभु यीशु बच्चाईया डाह सा, होर शैतान तेइबै छुई नैंई सकदा।

¹⁹आसै बूझा सी कि आसै परमेश्वरा री तरफा न सी, होर सारी दुनिया तेई शैताना रै वशा न सा

²⁰आसै ऐ जाँणा सी कि परमेश्वरा रा बेटा यीशु मसीह ऐसा दुनिया न आऊ सा होर तेइयै आसाबै समझ धिनी सा कि आसै तेई सच़ाई बै पहचाणे; होर आसै तेईन ज़ो सच़ सा, मतलब तेई रै बेटै यीशु मसीह न रौहा सी। सच़ा परमेश्वर होर हमेशा री ज़िन्दगी ऐ सा।

²¹हे शोहरूओ, आपणै आपा बै तिन्हां मूर्ति न बचाईया डाहत्, ज़ो तुसरै दिला न परमेश्वरा री ज़ैगा लेआ सा।