Read Pahari, Kullu यहूदा 1 Bible Online

यहूदा 1 - Pahari, Kullu bible

यहूदा 1

¹हांऊँ यहूदा ऐ चिट्ठी तुसाबै लिखदा लागा सा। हांऊँ यीशु मसीह रा एक दास होर याकूबा रा होछ़ा भाई सा। हांऊँ तिन्हां बै लिखदा लागा सा, ज़ुण परमेश्वर पिते शाधै सी ज़ो तुसा सैंघै झ़ुरी केरा सी होर यीशु मसीह री रखवाली न तुसाबै सुरक्षा देआ सी।

²हांऊँ प्रार्थना केरा सा कि परमेश्वर तुसाबै दया शान्ति होर झ़ुरी बहुतायता न दै।

³हे मेरै प्यारे लोको, ज़ैबै हांऊँ तुसाबै तेई उद्धारा रै बारै न बड़ी मेहनता सैंघै लिखणै री कोशिश केरदा लागा ती, ज़ुणीन आसै सैभ सहभागी होंणा; ता मैं तुसाबै ऐ समझाणा ज़रूरी समझू कि तेई बशाह री तैंईंयैं पूरी कोशिश केरा ज़ो पवित्र लोका बै एकै बार सौंपू ती।

⁴हे मेरै प्यारे लोको, हांऊँ तुसाबै लिखदा लागा सा किबैकि किछ़ अधर्मी लोक ज़ो यीशु मसीह पैंधै बशाह केरनै रा दिखावा केरा सी होर तुसा सैंघै जुड़िया सी। ते परमेश्वरा रा आदर नी केरदै होर ते झ़ूठी शिक्षा देआ सी कि परमेश्वर आसरै पाप माफ केरा सा, तैबै आसै पापी ज़िन्दगी ज़ी सका सी। ते यीशु मसीह रा नाँह केरा सी ज़ो आसरा एक सहारा सा होर आसरा मालक सा। बोहू पैहलै शास्त्र बोला सा कि परमेश्वरा ऐण्ढै लोका बै सज़ा देणी।

⁵पर अगर तुसै सैभै गैला एकै बार ज़ाणी सी ता तैबै भी हांऊँ तुसाबै याद दिलाणा चाहा सा कि प्रभुऐ इस्राइली लोका बै मिस्र देशा न छुड़ाणै न बाद बशाह नी केरनु आल़ै नाश केरै।

⁶फिरी ज़ैबै ज़ुणी स्वर्गदूतै आपणा औह्दा स्थिर नी रैखू, तेइयै ते भी भयानक रोज़ै रै न्याय री तैंईंयैं निहारै न ज़ो हमेशा री तैंईंयैं बन्धना न रखै सी।

⁷होर भी याद केरा ज़ुणी रीतियै सदोम होर अमोरा होर तिन्हां औरलै-पौरलै नगर ज़ुणा इन्हां सांही व्यभिचारी हुऐ ती, होरी शरीरा रै पिछ़ै लागै ती, हमेशा री सज़ा न पौड़िया दृष्टाँत ठहरै सी।

⁸तैण्ढी तैरहा ऐ अधर्मी लोक दावा केरा सी कि परमेश्वरै दर्शना न ऐ प्रगट केरू कि ते आपणै शरीरा बै पापी ज़िन्दगी न गन्दा केरी सका सी, कौसी बै तिन्हां पैंधै अधिकार केरनै रा हुक्म नी देणा होर ते महिमामय स्वर्गदूता रै बारै न बुरा बोला सी।

⁹पर प्रधान स्वर्गदूत मीकाइलै ज़ैबै शैताना सैंघै मूसा भविष्यवक्तै री लाशा रै बारै न बैंहस केरी ता तेइबै बुरा भला बोलिया दोष लाणै री हिम्मत नी केरी बल्कि ऐ बोलू, प्रभु तौभै डाँटला।

¹⁰पर ऐ अधर्मी लोका ज़ुणी गैला बै नी ज़ाणदै, तिन्हां बै बुरा भला बोला सी, पर ज़ुणी गैला बै नासमझ पशु सांही स्वभावा न ही जाँणा सी, तेथा न आपणै-आपु बै नाश केरा सी।

¹¹हाय सा तिन्हां लोका पैंधै किबैकि ते कैना सांही दुष्टता री ज़िन्दगी ज़ीआ सी ज़ुणियै आपणै भाई री हत्या केरी किबैकि सौ जलस केरा ती। ते बिलामा सांही सा ज़ुणियै परमेश्वरा रै लोका बै पापा री तैंईंयैं प्रेरित केरनै री कोशिश केरी ताकि ते तिन्हां ढैबुऐ बै पाई सकै ज़ो तेइबै च़ढ़ाऐ ती। तिन्हां करोह सांही नाश होंणा ज़ुणियै तेई अधिकरा रै खिलाफ़ विद्रोह केरू ती ज़ो परमेश्वरै मूसा बै धिना ती।

¹²ऐ लोक तुसा सैंघै प्रेम-भोजा बै प्रभु बै याद केरिया खा सी ता ते खतरनाक टोहली सांही होआ सी ज़ो समुन्द्रा हेठै गोज़ुऐदै होआ सी, ज़ो तुसाबै डूबणै री बजहा बणाई सका सी। ते बेशर्म फुआला सांही सी ज़ो सिर्फ़ आपणी हेर-शुण केरा सी। ते बगैर गाशा रै धौरती पैंधलै छाऐदै बादला सांही सी। ते पतझड़ा न बूटै सांही होआ सी ज़ो दुई बार मूँऐंदै होआ सी किबैकि ते कोई फ़ौल़ नी आंणदै जलाड़ै सैंघै खिंच़िया सी।

¹³ज़ैण्ढै समुन्द्रा री मजबूत लैहरा ज़ो गन्दे फेना बै बाहरै खोला सी, तैण्ढै ऐ लोक शर्मनाक कोम केरा सी। बस किछ़ सितारे सांही ज़ो सीधी बौता न नी च़लदै, ते सही बौत नी रिहांदे, तैबै तुसाबै तिन्हां लोका पिछ़ै नी च़लणा चेहिऐ। तैबै परमेश्वरै तिन्हां री तैंईंयैं निहारै न एक ज़ैगा हमेशा री तैंईंयैं अलग रखी सा ज़ौखै कोई प्याशा नी ऑथि।

¹⁴होर हनोकै भी ज़ो आदमै री सौतुई पीढ़ी न ती, इन्हरै बारै न ऐ भविष्यवाणी केरी कि, “हेरा, प्रभु आपणै लाखों पवित्र स्वर्गदूता सैंघै आऊ,

¹⁵कि सैभी रा न्याय केरला, होर सैभी भक्तिहीना बै तिन्हरै अभक्ति रै सैभ कोमा रै बारै न ज़ो तिन्हैं भक्तिहीन होईया केरै, होर तिन्हां सैभ कठोर गैला रै बारै न ज़ो भक्तिहीन पापियै तेइरै खिलाफ़ बोली सी, दोषी ठहराला।”

¹⁶ऐ अधर्मी लोका ता असंतुष्ट, कुड़कुड़ाणु आल़ै होर आपणी इच्छै रै मुताबक च़ला सी होर आपणै मुँहै घमण्डै री गैला बोला सी होर ते फायदै री तैंईंयैं मुँह हेरी सराउथी केरा सी।

¹⁷पर हे प्यारो, तुसै तिन्हां गैला बै याद रखा, ज़ो आसरै प्रभु यीशु मसीहै रै प्रेरितै बोहू पैहलै बोली सी।

¹⁸ते तुसाबै बोला ती, “आसरै प्रभु यीशु रै वापस ऐणै न पैहलै ऐण्ढा मज़ाक केरनु आल़ै होंणै, ज़ुणी आपणी अभक्ति री इच्छै रै मुताबक च़लणा।”

¹⁹ऐ ता ते सी, ज़ो फूट पा सी, ऐ शारीरिक लोका सी, ज़ुणीन परमेश्वरा री आत्मा नी ऑथि।

²⁰पर हे प्यारो, परमेश्वरै ज़ो सन्देश तुसाबै धिना सा तेथा न बढ़नै री तैंईंयैं एकी दुज़ै री मज़त केरनी चेहिऐ। तुसाबै पवित्र आत्मा री अगुवाई न प्रार्थना केरनी चेहिऐ।

²¹तुसाबै लगातार ऐ जाणिया ज़ीणा चेहिऐ कि परमेश्वर तुसा सैंघै झ़ुरी केरा सा होर ज़ैण्ढा कि तुसै तेई रोज़ा रा इंतज़ार केरा सी ज़ैबै आसरै प्रभु यीशु तुसाबै आपणी दया न हमेशा री ज़िन्दगी देणी।

²²होर तिन्हां लोका पैंधै दया केरा ज़ो ऐ नी जाणदै की कि बशाह केरना।

²³होर दुज़ै बै न्याय री औगी न झपटिया बच़ात्। होर ऐण्ढै दुज़ै लोका सी ज़ुणी रै प्रति तुसाबै दयालु होंणा चेहिऐ पर सैंघै-सैंघै बोहू होशियार रौहणा चेहिऐ। तुसाबै तिन्हरै झिकड़ै सैंघै नफरत केरनी चेहिऐ ज़ो पापा न भौरूऐदै कोमा न गन्दै हुऐ सी।

²⁴सिर्फ़ एकै परमेश्वर सा ज़ो तुसाबै झौड़नै न बच़ाई सका सा, होर ज़ैबै सौ तुसाबै आपणी महिमा न तेइरै सामनै खड़ा होंणै री तैंईंयैं आंणा सी, ता तुसाबै निर्दोष होर खुश केरनै लायक सा। तेइयै आसै आपणै प्रभु यीशु मसीह रै ज़रियै बच़ाऊ सा। महिमा, गौरव होर अधिकार बौगत शुरू होंणै न पैहलै तेइरै ती, ऐबै भी तेइरै सी होर हमेशा तेइरै होंणा। आमीन।