Read Pahari, Kullu प्रकाशितवाक्य 1 Bible Online

प्रकाशितवाक्य 1 - Pahari, Kullu bible

प्रकाशितवाक्य 1

¹यीशु मसीह रा प्रकाशितवाक्य, ज़ो परमेश्वरै तेइबै एथै री तैंईंयैं धिना कि सौ आपणै दासा बै तिन्हां गैला बै रिहाला ज़ुणिरा होंणा ज़रूरी सा होर तेइयै आपणै स्वर्गदूत भेज़िआ आपणै दास यूहन्ना बै दसू।

²ज़ुणियै परमेश्वरै रै वचन, यीशु मसीह री गुआही होर ज़ो किछ़ तेइयै हेरू ती तेथै री गुआही धिनी।

³परमेश्वरा तिन्हां सैभी बै आशीष देणी ज़ो एसा भविष्यवाणी बै होरी बै पौढ़िया शुणा सी, होर तेई तिन्हां सैभी बै आशीष देणी ज़ो शुणा सी होर तेइरा पालन केरा सी। किबैकि ऐ गैला छ़ेकै होंणी।

⁴हांऊँ यूहन्ना ऐ चिट्ठी तुसा सौत मण्डली रै विश्वासी बै लिखदा लागा सा ज़ो आसियै प्रदेशा न रौहा सी। हांऊँ प्रार्थना केरा सा की परमेश्वर तुसाबै आपणी झ़ुरी होर शान्ति दै, ज़ो सा, ज़ो ती होर ज़ुण ऐणु आल़ा सा, होर तिन्हां सौत आत्मै री तरफा न ज़ो परमेश्वरा री सिंहासना रै सामनै सी,

⁵होर यीशु मसीह री तरफा न ज़ो विश्वासयोग्य सा होर मूँऐंदै न ज़िन्दै होणू आल़ै न पैहला सा, होर धौरती रै राज़ै रा हाकिम सा, तुसाबै अनुग्रह होर शान्ति मिलदी रौहली, ज़ुण आसा सैंघै झ़ुरी रखा सा होर ज़ुणियै आसै आपणै लोहू लाइया पापा न छ़ुड़ाऐ सी,

⁶होर आसै एक राज्य होर आपणै पिता परमेश्वरै री तैंईंयैं पुरोहित भी बणाऐ, तेइरी महिमा होर पराक्रम जुगा-जुगा तैंईंयैं लोड़ी रौहू। आमीन।

⁷“हेरा, सौ बादला सैंघै ऐणु आल़ा सा,” होर “हर एकी औछ़ी सौ हेरणा, बल्कि ज़ुणियै सौ बिन्हू ती तिन्हां भी सौ हेरना” होर धौरती रै सैभी खानदानै रै लोका तेइरी बजहा न छ़ाती पिटणी। हाँ। आमीन।

⁸प्रभु परमेश्वर बोला सा, “हांऊँ अल्फा होर ओमेगा सा[1] ज़ो सा, ज़ुण ती होर ज़ुण ऐणु आल़ा सा, ज़ो सर्वशक्तिमान सा।”

⁹हांऊँ यूहन्ना ज़ो तुसरा सैंघी विश्वासी सा, होर यीशु रै दु:ख, राज्य होर धीरजा न तुसरा सहभागी सा, परमेश्वरै रै वचन होर यीशु री गुआही री बजहा न पतमुस[2] नाँ रै टापू न ती

¹⁰हांऊँ प्रभु रै रोज़ पवित्र आत्मा न भौरुआ होर मैं आपु पिछ़ै तुरही री आवाज़ा सांही एक बड़ा शब्द बोलदै शुणू,

¹¹कि “ज़ो किछ़ तू हेरा सा तेई कताबा न लिखिया इफिसुस, स्मुरना, पिरगमुन, थुआतीरा, सरदीस, फिलेदिलफिया होर लौदीकिया रै शैहरा री सौत मण्डली बै भेज़।”

¹²तैबै मैं ज़ो मूँ सैंघै बोलदा लागा ती; मैं तेई हेरनै री तैंईंयैं आपणा मुँह फेरू; होर पिछ़ै घूमिया मैं सुनै री सौत दीवटा हेरी।

¹³तिन्हां दीवटा बिच़ै मैं मांहणु सांही एक मर्द हेरू ज़ुणियै ज़ोंघा तैंईंयैं झिकड़ै लाऐ ती होर छ़ाती पैंधै सुनहरा पटा बोनू ती।

¹⁴तेइरी मुँडी रै बाल़ ऊना सांही शेतै या हिंऊँआ सांही शेतै ती होर तेइरी औछ़ी औगी री झ़ाई सांही ती।

¹⁵तेइरी ज़ोंघा च़मकदी लागी ती ज़ैण्ढै भट्ठी न पीतल तौता होंदा लागा सा होर ज़ैबै सौ बोलदा लागा ती ता तेइरी आवाज़ बोहू तेज़ ती ज़ैण्ढै कई नौई री छ़ेड़ होआ सा।

¹⁶सौ आपणै दैहिणै हौथा न सौत तारै लेइया ती, होर तेइरै मुँहा न च़ोखी दुधारी तलवार निकल़ा ती, होर तेइरा मुँह ऐण्ढा च़मकदा लागा ती ज़ैण्ढा कड़कदै धुपै न सूरज़ च़मका सा।

¹⁷ज़ैबै मैं सौ हेरू, ता हांऊँ मुर्दै सांही तेइरी ज़ोंघा पैंधै पौड़ू। पर तेइयै मूँ पैंधै आपणा दैहिणै हौथ रखिया ऐ बोलू, “डौरदा मत, हांऊँ पैहला होर आखरी होर हांऊँ सौऐ सा ज़ो ज़िन्दगी रा स्रोत सा।

¹⁸हांऊँ मूँआ ती। पर ऐबै हांऊँ ज़िन्दा सा, होर हेर हांऊँ जुगा-जुगा तैंईंयैं ज़िन्दा सा, होर मौऊत होर अधोलोका पैंधै, मूँऐंदै री ज़ैगा पैंधै मेरा अधिकार सा।

¹⁹“तैबै ज़ो गैला तैं हेरी सी, होर ज़ो गैला होंदी लागी सी, होर ज़ो गैला एथा न बाद होणू आल़ी सी तिन्हां सैभी बै कताबा न लिख।”

²⁰ऐबै मूँ दसणै कि मेरै दैहिणै हौथा न सौत तारै रा मतलब कि सा, होर सौत सुनै रै दीवटा रा कि मतलब सा ज़ो पैहलै नी जाणु। ऐ मतलब सा सौत दीवट सौत मण्डली सी होर सौत सितारे सौत मण्डली रै स्वर्गदूत सी।