Read Pahari, Kullu प्रकाशितवाक्य 11 Bible Online

प्रकाशितवाक्य 11 - Pahari, Kullu bible

प्रकाशितवाक्य 11

¹फिरी मुँभै नापणै री तैंईंयैं एक नगाल़ी रा एक डँडा धिना होर बोलू, “उठ परमेश्वरा रा मन्दिर, वेदी होर तेथा न आराधना न केरनु आल़ै बै नाप।

²होर मन्दिरा रा बाहरी आँगन छ़ौड़ी दै, तेइबै मत नापदा किबैकि सौ तिन्हां लोका बै धिना सा ज़ो परमेश्वरा बै नी ज़ाणदै होर तिन्हां पवित्र नगर ब्यालीस म्हीनै तैंईंयैं रौंदणा।”

³होर मूँ आपणै दूई गुआही बै अधिकार देणा कि ते टाट ओढ़िया एक हज़ार दूई शौऊ शौठ रोज़ा तैंईंयैं भविष्यवाणी केरलै।

⁴ऐ सौऐ “जैतूनै रै दूई बूटै होर दूई दीवट[6] सी ज़ो धौरती रै प्रभु सामनै खड़ै रौहा सी।”

⁵होर अगर कोई तिन्हां बै नुकसान पजाणा चाहा सा ता तिन्हरै मुँहा न औग निकल़िया तिन्हरै बैरी बै भस्म केरा सा, होर अगर तिन्हां बै नुकसान पजाणा चाहला ता पक्का ते एसा रीतियै मारिनै।

⁶इन्हां बै अधिकार सा कि आसमाना बै बन्द केरलै कि तिन्हरी भविष्यवाणी रै रोज़ा न गाश नी एला, होर तिन्हां बै अधिकार सा कि ते सारै पाणी बै लोहू बणालै होर ज़ैबै-ज़ैबै च़ाहलै तैबै-तैबै धौरती पैंधै मुसीबत आंणलै।

⁷ज़ैबै ते गुआही देलै ता तेई खतरनाक पशु ज़ो नरका रै कुण्डा न निकलणा, तेई तिन्हां सैंघै लड़िया ते ज़ीतणै होर ते मारनै।

⁸तिन्हरी लाश तेई बड़ै नगरै रै चौका न पौड़ी रौहणी ज़ो कि आत्मिक रीति न सदोम होर मिस्र कहलाइया सा, ज़ौखै तिन्हरा प्रभु भी क्रूसा पैंधै च़ढ़ाऊ ती।

⁹होर सैभी ज़ाति, कुल होर भाषै रै लोका साढ़ै त्रा रोज़ा तैंईंयैं तिन्हरी लाश हेरदै रौहणा पर कौसियै भी तिन्हरी लाश कब्रा न नी रखणै देणी।

¹⁰होर धौरती न रौहणु आल़ै तिन्हरै मौरनै सैंघै खुश होर मगन होंणा होर एकी दुज़ै बै भेंट भेज़णी किबैकि इन्हैं दूई भविष्यवक्तै धौरती न रौहणु आल़ै सताऐ ती।

¹¹पर साढ़ै त्रा रोज़ा बाद परमेश्वरै प्राण धिना होर ते आपणी ज़ोंघै रै बालै खड़ै हुऐ होर तिन्हां हेरणू आल़ै पैंधै बड़ी डौर पौई।

¹²होर तिन्हां न स्वर्गा न एक बड़ा शब्द शुणुआ कि, “औखै ऊझै एज़ा।” ऐण्ढा शुणिया ते बादलै री सवारी होईया आपणै बैरी रै हेरदै-हेरदै स्वर्गा पैंधै च़ढ़ै।

¹³तैबै तेसा घड़ी एक बड़ा भुँईडोल हुआ होर नगरा रा दसवाँ हिस्सा ढौऊ होर तेई भुँइडोला सैंघै सौत हज़ार मांहणु मूँऐ होर बच़ुऐदै ते मांहणु डौरै होर स्वर्गै रै परमेश्वरै री महिमा केरी।

¹⁴दुज़ी बिपति बीती हेरा त्रीजी विपति छेकै ऐणु आल़ी सा।

¹⁵ज़ैबै सौतुऐ स्वर्गदूतै तुरही फुकरी ता स्वर्गा न एथै रै बारै न बड़ै-बड़ै शब्द होंदै लागै “दुनिया रा राज्य आसरै प्रभु रा होर तेइरै मसीह रा हुआ, सौ हमेशा राज्य केरला।”

¹⁶होर तेई ज़ुगा-ज़ुगा तैंईंयैं राज़ केरना, होर ज़ो चौऊबी स्याणै परमेश्वरा सामनै आपणै-आपणै सिंहासन पैंधै बेठै ती टुँबड़ै पौड़िया परमेश्वरा बै प्रणाम केरिया,

¹⁷ऐण्ढा बोलदै लागै, “हे सर्वशक्तिमान परमेश्वर ज़ो सा, ज़ो ती आसै तेरा धन्यवाद केरा सी, कि तैं आपणी बड़ी सामर्थै रै कोमै लाइया राज़ केरू सा।

¹⁸होरी ज़ातियै झ़िक केरी होर तेरा प्रकोप एज़िया पौड़ू होर सौ बौगत आऊ सा कि मूँऐंदै रा न्याय केरिला होर तेरै दास भविष्यवाणी केरनु आल़ै होर पवित्र लोका बै होर तिन्हां हौछ़ै-बड़ै बै ज़ो तेरै नाँ न डौरा सी तिन्हां बै बदला देइला होर धौरती बै बिगाड़नू आल़ै नष्ट केरिलै।”

¹⁹होर परमेश्वरा रा मन्दिर ज़ो स्वर्गा न सा सौ खोलुआ होर तेइरै मन्दिरा न तेइरै वायदै रा सन्दूक हेरुआ होर बज़ड़ाह, शब्द, गर्जन होर भुँईडोल हुऐ होर बड़ै-बड़ै शौऊरु पौड़ै।