Read Pahari, Kullu प्रकाशितवाक्य 13 Bible Online

प्रकाशितवाक्य 13 - Pahari, Kullu bible

प्रकाशितवाक्य 13

¹फिरी मैं समुन्द्रा न एक खतरनाक पशु बाहरै ऐन्दा हेरू, तेइरै दस शींग ती होर सौत मुँडी ती होर आपणै शींगा पैंधै तेइयै दस राज़शाही मुकट लाऐ ती। तेइरी मुँडी पैंधै परमेश्वरा री निन्दा रै नाँ लिखुऐदै ती।

²मैं ज़ो खतरनाक पशु हेरू ती सौ चीतै सांही ती। तेइरी ज़ोंघा भाल़ू सांही ती होर तेइरा मुँह शेर रै मुँहा सांही ती। तेई अजगरै आपणी शक्ति, सिंहासन होर सारा अधिकार तेइबै धिना।

³मैं हेरू कि तेइरी एक मुँडी पैंधै ऐण्ढै गैहरा ज़ख्म सा, ज़ैण्ढा कि सौ मौरनै पैंधै सा, फिरी तेइरा सौ गैहरा ज़ख्म भौरूआ, होर सारी दुनिया रै लोका हैरान होईया तेई पशु पिछ़ै-पिछ़ै च़लै।

⁴होर ते तेई अजगरा बै पूज़दै लागै किबैकि तेइयै आपणा अधिकार तेई पशु बै धिना ती, होर ऐ बोलिया पशु री पूजा केरी, “ऐई पशु सांही कुण सा? होर ऐण्ढा कुण सा ज़ो ऐई सैंघै लड़ी सकला?”

⁵तेइबै ऐ अधिकार धिना कि सौ घमण्ड होर निन्दा लाइया भौरूऐदै शब्द बोलणै बै आपणै मुँहा बै इस्तेमाल केरला। तेइबै ब्यालीस म्हीनै तैंईंयैं आपणी शक्ति रा प्रयोग केरनै रा अधिकार धिना।

⁶तेइयै परमेश्वरै री निन्दा केरनी शुरू केरी। सौ परमेश्वरै रै नाँ होर तेइरै मन्दिर होर ज़ो स्वर्गा न रौहा सी तिन्हरी निन्दा केरदा लागा।

⁷परमेश्वरै रै पवित्र लोका सैंघै लड़ाई केरनै होर तिन्हां बै हराणै रा होर हर वँश, हर ज़ाति, हर भाषा, होर हर देशा पैंधै तेइबै अधिकार धिना।

⁸धौरती न सैभ रौहणु आल़ै तिन्हां सैभी तेई पशु री पूजा केरनी, ज़ौसरै नाँ तेई मेमणै री ज़िन्दगी री कताबा न दुनिया रै शुरू न लेइया नी लिखैदै, मेमणा सौऐ सा ज़ो मकाऊ ती।

⁹सैभी बै ध्याना सैंघै शुणना चेहिऐ,

¹⁰“ज़ुणिबै कैद होंणा सा, तेई पक्का कैद होंणा, अगर कोई तलवारियै लाइया मारला, ता तेई भी तेसा तलवारियै लाइया मारिना।” पवित्र लोका रा धीरज होर बशाह एथा न सा।

¹¹एथा न बाद मैं एक होर खतरनाक पशु धौरती न निकलदा हेरू। तेइरै मेमणै सांही दूई शींग ती होर सौ अजगरा सांही बोला ती।

¹²होर ऐ तेई पैहलै पशु रा सारा अधिकार तेई सामनै कोमा न आंणा ती होर धौरती होर धौरती न रौहणु आल़ै न तेई पैहला पशु री ज़ौसरा ज़ख्म ठीक हुआ ती पूजा केरा ती।

¹³होर बड़ै-बड़ै नशाण रिहा ती, औखै तैंईंयैं कि मांहणु रै सामनै आसमाना न धौरती पैंधै औग बरसा ती।

¹⁴तिन्हां नशाणा री बजहा न ज़ुणिबै तेई पशु सामनै रिहाणै रा अधिकार तेइबै धिना ती, सौ धौरती न रौहणु आल़ै बै ऐण्ढै तैरहा बहका ती कि धौरती न रौहणु आल़ै बै बोला ती कि, ज़ुणी पशु रै तलवार लागी ती सौ ज़ीऊ सा, तेइरी मूरत बणा।

¹⁵होर तेइबै तेसा पशु री मूरता न प्राण पाणै रा अधिकार धिना कि, पशु री मूरत बोलदी लागली होर ज़ेतरै लोका तेसा पशु री मूरतै री पूजा नी केरलै तिन्हां बै मारला।

¹⁶तेइयै होछ़ै बड़ै, खास लोक होर आम लोक, आज़ाद होर गुलाम सैभी रै दैहिणै हौथा न या तिन्हरै मौथै न पैहलै पशु रै नाँ री एक-एक छाप लाई।

¹⁷ताकि तेई छ़ौड़िआ ज़ुणी पैंधै छाप मतलब तेई पशु रा नाँ या तेई रै नाँ रा अंक होला, कोई होर लेन-देण नी केरी सकला।

¹⁸ज्ञान एथा न सा, ज़ौस हागै बुद्धि सा सौ ऐई पशु रै अंका बै ज़ोड़ला, किबैकि मांहणु रा अंक सा, होर तेइरा अंक छ़ौह शौऊ छियासठ सा।