Read Pahari, Kullu प्रकाशितवाक्य 22 Bible Online

प्रकाशितवाक्य 22 - Pahari, Kullu bible

प्रकाशितवाक्य 22

¹फिरी तेइयै मुँभै शीशे सांही झलकदी ज़िन्दगी रै पाणी रा एक स्रोत रिहाऊ ज़ो परमेश्वर होर मेमणै रै सिंहासना न निकल़िया तेई नगरै रै बिच़ा न बौहा ती।

²नौई वारै होर पारै ज़िन्दगी रा बूटा ती। तेथा न बारा किस्मै रै फ़ौल़ लागा ती होर सौ हर म्हीनै फ़ौआ ती होर तेई बूटै रै पौचै लाइया ज़ाति-ज़ाति रै लोका ठीक होआ ती।

³फिरी श्राप नी होंणा होर परमेश्वर होर मेमणै रा सिंहासन तेई नगरा न होंणा होर तेइरै भक्ता तेइरी आराधना केरनी।

⁴तिन्हां सौ आमनै-सामनै हेरना होर तेइरा नाँ तिन्हरै मौथै पैंधै लिखुआँदा होंणा।

⁵होर फिरी रात नी होंणी होर तिन्हां बै दीऐ होर सूरज़ै रै प्याशै री ज़रूरत नी होंणी, किबैकि प्रभु परमेश्वरा तिन्हां बै प्याशा देणा होर तिन्हां ज़ुगा-ज़ुगा तैंईंयैं राज़ केरना।

⁶फिरी तेइयै मुँभै बोलू, “ऐ गैला विश्वासयोग्य होर सच़ी सी होर प्रभुऐ ज़ो भविष्यवाणी केरनु आल़ै री आत्मा रा परमेश्वर सा, आपणा स्वर्गदूत एथै री तैंईंयैं भेज़ू कि आपणै दासा बै ते गैला ज़ुणिरा छ़ेकै पूरी होंणा ज़रूरी सा रिहाऐ।”

⁷शुणा, “हांऊँ छ़ेकै ऐणु आल़ा सा, धन्य सा सौ ज़ुण एसा कताबै री भविष्यवाणी री गैला बै मैना सा।”

⁸हांऊँ सौऐ यूहन्ना सा, ज़ो इन्हां गैला बै शुणा होर हेरा ती होर ज़ैबै मैं शुणू होर हेरू, ता ज़ो स्वर्गदूत मुँभै इन्हां गैला बै रिहा ती, हांऊँ तेइबै प्रणाम केरनै री तैंईंयैं तेइरी ज़ोंघा पैंधै पौड़ू।

⁹तेइयै मुँभै बोलू, “हेर, ऐण्ढा मत केरदा किबैकि हांऊँ तेरा होर तेरै भाई भविष्यवाणी केरनु आल़ा होर एसा कताबै री गैला मनणु आल़ा सैंघी दास सा, परमेश्वरा बै प्रणाम केर।”

¹⁰फिरी तेइयै मुँभै बोलू, “एसा कताबै री भविष्यवाणी री गैला बै बन्द मत केरदा किबैकि बौगत नेड़ सा।

¹¹ज़ो अन्याय केरा सा सौ अन्याय केरदा रौहला होर ज़ो मलीन सा सौ मलीन बणी रौहला, ज़ो धर्मी सा सौ धर्मी बणी रौहला होर ज़ो पवित्र सा सौ पवित्र बणी रौहला।”

¹²फिरी प्रभु यीशुऐ बोलू, हेर, हांऊँ छ़ेकै ऐणु आल़ा सा होर हर एकी रै कोमै रै मुताबक बदला देणै री तैंईंयैं प्रतिफल मूँ हागै सा।

¹³हांऊँ अल्फा होर ओमेगा, पैहला होर आखरी, शुरू होर अंत सा।

¹⁴धन्य सी ते, ज़ुणा आपणै झिकड़ै धोआ सी, किबैकि तिन्हां बै ज़िन्दगी रै बूटै हागै ऐणै रा अधिकार मिलणा होर तिन्हां फाटक होईया नगरा न प्रवेश होंणा।

¹⁵पर कुतै टोणै, व्यभिचारी, खूनी, मूर्ति पूज़ा केरनु आल़ै होर झ़ूठा बै च़ाहणू आल़ै होर गलत केरनु आल़ै बाहरै रौहणा।

¹⁶मैं यीशुऐ आपणा स्वर्गदूत एथै री तैंईंयैं भेज़ू कि तुसरै हागै मण्डली रै बारै न इन्हां गैला री गुआही देला; हांऊँ दाऊदा रा मूल, वँश होर च़मकदा भ्याणु तारा सा।

¹⁷आत्मा होर दुल्हन दुहियै बोला सी, “एज़!” होर शुणनू आल़ा भी बोले “एज़!” होर ज़ुण शोखुआ सा सौ एला होर ज़ुण कोई चाहला सौ ज़िन्दगी रा पाणी मुफ्ती न ले।

¹⁸हांऊँ हर एकी बै ज़ुण एसा कताबै री भविष्यवाणी री गैला शुणा सा, चेताऊणी देआ सा कि, अगर कोई मांहणु इन्हां गैला न किछ़ बढ़ाला ता परमेश्वरा ते विपदा ज़ो एसा कताबा न लिखी सी तेई पैंधै बढ़ाणी।

¹⁹होर अगर कोई एसा कताबै री भविष्यवाणी गैला न किछ़ खोलला ता परमेश्वरा ज़िन्दगी रै तेई बूटै होर पवित्र नगरा न ज़ुणी री चर्चा एसा कताबा न सा, तेइरा हिस्सा खोलणा।

²⁰ज़ुण इन्हां गैलै री गुआही देआ सा, सौ ऐ बोला सा, “हाँ, छ़ेकै ऐणु आल़ा सा।” आमीन। ओ प्रभु यीशु आ!

²¹हांऊँ प्रार्थना केरा सा कि प्रभु यीशु रा अनुग्रह पवित्र लोका सैंघै लोड़ी रौहू। आमीन।