Read Pahari, Kullu प्रकाशितवाक्य 3 Bible Online

प्रकाशितवाक्य 3 - Pahari, Kullu bible

प्रकाशितवाक्य 3

¹सरदीस शैहरा री मण्डली रै स्वर्गदूता बै ऐ सन्देश लिख; हांऊँ सौऐ सा ज़ुणी हागै परमेश्वरा री सौत आत्मा होर सौत तारै सी, ऐ बोला सा कि हांऊँ तेरै कोमा बै जाँणा सा, कि तू ज़िन्दा ता सा, पर सा मूँआदा।

²तैबै बिऊदै हो, होर ज़ो च़ीज़ा बाकि रौही सी होर ज़ो मिटणू आल़ी सा तिन्हां बै पक्की केर, किबैकि मैं तेरै कोई भी कोम आपणै परमेश्वरा सामनै पूरै नी हेरै।

³ऐबै ध्यान केर कि तैं कौस रीतियै शिक्षा प्राप्त केरी होर शुणी ती, तेसा शिक्षा रै मुताबक च़ल होर आपणै मना बै बुरै कोमा न बदल। अगर तू बिऊदा नी रौहला ता मूँ च़ोरा सांही ऐणा होर तौ कैधी भी नी ज़ाणना कि मूँ कौस घड़ी सज़ा देणै री तैंईंयैं तौ पैंधै ऐणा।

⁴पर हाँ, सरदीस शैहरा न तुसा हागै ऐण्ढै किछ़ लोका सी, ज़ुणियै आपणै-आपणै टौलै छ़ौतलै नी केरै, तिन्हां शेतै टौलै लाइया मूँ सैंघै घूमणा, किबैकि तै ऐई लायक सी।

⁵ज़ुण जय पाला तेइरै एसा रीतियै शेतै झिकड़ै लाणै होर मूँ तेइरा नाँ ज़िन्दगी री कताबा न कौसी भी रीतियै नी काटणा, बल्कि तेइरा नाँ आपणै पिता होर तेइरै स्वर्गदूता सामनै मनणा।

⁶ज़ो किछ़ पवित्र आत्मा मण्डली बै बोला सा सौ सैभ लोका बै ध्याना सैंघै शुणना चेहिऐ।

⁷फिल्दिलफिया शैहरा री मण्डली रै स्वर्गदूता बै ऐ सन्देश लिख; हांऊँ सौऐ सा ज़ो पवित्र होर सच़ा सा होर ज़ुण दाऊदा री कुँज़ी रखा सा, ज़ौसरै खोलुऐदै बै कोई बन्द नी केरी सकदा होर बन्द केरूऐदै बै खोली नी सकदा, ऐ बोला सा,

⁸हांऊँ जाँणा सा कि तू बोहू मजबूत नी ऑथि पर तैं मेरी गैल मनी ज़ो मैं तौभै बोली। तैं मूँ पैंधै लगातार बशाह केरू सा, तैबै मैं तेरी तैंईंयैं एक दुआर खोलू सा ज़ुणिबै कोई बन्द नी केरी सकदा।

⁹मूँ शैताना री आराधना केरनु आल़ै तेरै वशा न केरनै। ज़ो यहूदी बणिया बेठै सी पर ऑथि नी, पर झ़ूठ बोला सी, हेर, मूँ ऐण्ढा केरना कि तिन्हां एज़िया तौभै दण्डवत केरना होर ऐ ज़ाणना कि मैं तौ सैंघै झ़ुरी रखी सा।

¹⁰तैं मेरै वचना रा पालन केरू होर दुःख सौहू। तैबै मूँ भी तू परीक्षा रै तेई बौगत बच़ाइया रखणा ज़ो धौरती पैंधै रौहणु आल़ै बै परखणै री तैंईंयैं सारै दुनिया पैंधै ऐणु आल़ा सा।

¹¹हांऊँ छेकै ऐणु आल़ा सा। ज़ो किछ़ तौ हागै सा तेइबै थामिया रख कि कोई तेरै मुकटा बै नी च़टेरला।

¹²ज़ुण जय पाला, तिन्हां परमेश्वरा रै मन्दिरा न थोम्बै सांही होंणा ज़ुणिरी सेवा हांऊँ केरा सा। होर तिन्हां बै सौ कैधी नी छ़ौड़ना पौड़ना; होर मूँ आपणै परमेश्वरा रा नाँ, आपणै परमेश्वरै रै नगर, मतलव नोंऊँऐं यरूश्लेम, ज़ो मेरै परमेश्वरा हागै न स्वर्गा पैंधै न उतरनु आल़ा सा होर आपणा नाँ तेई पैंधै लिखणा।

¹³ज़ो किछ़ पवित्र आत्मा मण्डली बै बोला सा सौ सैभ लोका बै ध्याना सैंघै शुणना चेहिऐ।

¹⁴लौदीकिया शैहरा री मण्डली रै स्वर्गदूता बै ऐ सन्देश लिख, “हांऊँ सौऐ सा ज़ो आमीन सा होर विश्वासयोग्य होर सच़ा गुआह सा होर परमेश्वरा री सृष्टि री मूल बजहा सा, ऐ बोला सा,

¹⁵हांऊँ तेरै कोमा बै जाँणा सा कि तू न ता ठँडा सा होर न गर्म; भला होंदा कि तू ठँडा या गर्म होंदा।

¹⁶तू गुनगुना सा, होर न ठँडा, न गर्म, हांऊँ तौभै छ़ौड़नू आल़ा सा।

¹⁷तू ज़ो बोला सा कि हांऊँ सेठ सा होर धनी हुआ सा होर मुँभै कौसी च़ीज़ै री कमी नी ऑथि पर ऐ नी ज़ाणदा कि तू अभागा, तुच्छ, कांणा होर नाँगा सा।

¹⁸तैबै हांऊँ तौभै सलाह देआ सा कि औगी न तपाउआ दा सूना मूँ न मोल ले कि सेठ बणला होर शेतै झिकड़ै ले कि तिन्हां लाइया तौभै नाँगै होंणै री शर्म नी होली होर आपणी औछ़ी न मौल़णै बै काज़ल़ ले कि तू हेरदा लागला।

¹⁹“हांऊँ ज़ुणी-ज़ुणी सैंघै झ़ुरी रखा सा तिन्हां सैभी बै झिड़का सा होर ताड़ना देआ सा। तैबै सही केरनै री तैंईंयैं उत्साहित हो होर मना बै बदल।

²⁰शुणा, हांऊँ दुआरा पैंधै खड़ै होईया खटखटा सा अगर कोई मेरै शब्द शुणिया दुआर खोलला ता मूँ तेई हागै भीतरै एज़िया तेई सैंघै रोटी खाँणी होर तेई मूँ सैंघै।

²¹जुण जय पाला मूँ सौ आपु सैंघै आपणै सिंहासना पैंधै बशाणा, ज़ैण्ढा कि हांऊँ भी जय पाईआ आपणै पिता सैंघै तेइरै सिंहासना पैंधै बेठा।

²²ज़ो किछ़ पवित्र आत्मा मण्डली बै बोला सा सौ सैभ लोका बै ध्याना सैंघै शुणना चेहिऐ।”