Read Pahari, Kullu प्रकाशितवाक्य 7 Bible Online

प्रकाशितवाक्य 7 - Pahari, Kullu bible

प्रकाशितवाक्य 7

¹एथा न बाद मैं धौरती रै च़ोहू कुणै पैंधै च़ार स्वर्गदूत खड़ै हेरै, तिन्हैं धौरती री च़ारै बागरी थामी ती ताकि धौरती या समुन्द्र या कौसी बूटै पैंधै बागर नी च़लली।

²तैबै मैं एक होर स्वर्गदूत ज़िन्दै परमेश्वरै री मोहर लेइया पूरबा धिरै न झाँऊ ऐन्दा हेरू तेइयै तिन्हां च़ार स्वर्गदूता बै ज़ुणिबै धौरती होर समुन्द्रा रा नुकसान केरनै रा अधिकार धिना ती, ज़ोरा सैंघै बोलू,

³ज़ैबै तैंईंयैं आसै आपणै परमेश्वरै रै दासा रै मौथै न मोहर नी लालै, तैबै तैंईंयैं धौरती, समुन्द्र होर बूटै रा नुकसान हेरीत् केरदै।

⁴होर ज़ुणी पैंधै मोहर लाई मैं तिन्हरी गिणती शुणी कि इस्राइलै री औलादै रै सैभी गोत्रा न एक लाख चौआलीस हज़ारा पैंधै मोहर धिनी।

⁵यहूदै रै गोत्रा न बारा हज़ारा पैंधै मोहर धिनी, रूबैनै रै गोत्रा न बारा हज़ारा पैंधै, गादै रै गोत्रा न बारा हज़ारा पैंधै,

⁶आशेरै रै गोत्रा न बारा हज़ारा पैंधै, नप्ताली रै गोत्रा न बारा हज़ारा पैंधै, मनश्शिहै रै गोत्रा न बारा हज़ारा पैंधै,

⁷शमौनै रै गोत्रा न बारा हज़ारा पैंधै, लेवी रै गोत्रा न बारा हज़ारा पैंधै, इस्साकारै रै गोत्रा न बारा हज़ारा पैंधै।

⁸ज़बूलूनै रै गोत्रा न बारा हज़ारा पैंधै, यूसुफै रै गोत्रा न बारा हज़ारा पैंधै, होर बिन्यामीनै रै गित्रा न बारा हज़ारा पैंधै मोहर धिनी।

⁹“एथा न बाद मैं नज़र पाई होर हेरा, हर एक ज़ाति होर कुल होर लोका होर भाषा न एक बड़ी भीड़ ज़ुणिबै कोई गिणी नी सकदा ती शेतै झिकड़ै लाइया होर आपणै हौथा न खजूरै री डाई लेइया सिंहासनै रै सामनै होर मेमणै रै सामनै खड़ी ती।

¹⁰होर ज़ोरा सैंघै पुकारिया बोला सा, “उद्धारै री तैंईंयैं आसरै परमेश्वरा रा ज़ो सिंहासना पैंधै बेठा सा, होर मेमणै री जय-जयकार हो।”

¹¹होर सारै स्वर्गदूत तेई सिंहासन, स्याणै होर च़ार प्राणी रै च़ोहू पासै खड़ै ती, तैबै ते सिंहासना सामनै टुँबड़ै पौड़ै होर परमेश्वरा बै प्रणाम केरिया बोलू, “आमीन

¹²आसरै परमेश्वरै री स्तुति होर महिमा होर ज्ञान होर धन्यवाद होर आदर होर सामर्थ होर शक्ति ज़ुग-ज़ुग बणिया लोड़ी रौही। आमीन।”

¹³एथा पैंधै स्याणै न एकियै मुँभै बोलू, “ऐ शेतै झिकड़ै लाइया कुणा सी? होर कौखै न आऐ सी?”

¹⁴मैं तेइबै बोलू, “हे‍ मालक, तूहै जाँणा सा।” तेइयै मुँभै बोलू, “ऐ ते सी ज़ो तेई बड़ै दु:खा न निकल़िया आऐ सी। इन्हैं आपणै-आपणै झिकड़ै मेमणै रै लोहू न धोइया शेतै केरै सी;

¹⁵एसा बजहा न “ते परमेश्वरै रै सिंहासना सामनै सी होर तेइरै मन्दिरा न रात-ध्याड़ तेइरी सेवा केरा सी; होर ज़ो सिंहासना पैंधै बेठा सा तेई तिन्हां पैंधै आपणा तोम्बू तानणा।

¹⁶तिन्हां फिरी भूखै होर शोखै नी होंणा होर तिन्हां पैंधै न धूपा होर न कोई तपन पौड़नी।

¹⁷किबैकि ज़ो मेमणा सिंहासना बिच़ै सा तेई तिन्हरी रखवाली केरनी; होर ते ज़िन्दगी रै सोता हागै नेहणै, होर परमेश्वरा तिन्हरै सैभ औछू टुशणै।”