Read Pahari, Kullu प्रकाशितवाक्य 8 Bible Online

प्रकाशितवाक्य 8 - Pahari, Kullu bible

प्रकाशितवाक्य 8

¹होर ज़ैबै मेमणै सौतुई मोहर खोली ता स्वर्गा न औधी घण्टे तैंईंयैं सन्नाटा पौड़ू।

²होर मैं ते सौत स्वर्गदूत ज़ो परमेश्वरा सामनै खड़ै रौहा सी हेरै होर तिन्हां बै सौत तुरही धिनी।

³फिरी एक होर स्वर्गदूत सुनै रा धूपदान लेइया आऊ होर वेदी हागै खड़ा हुआ होर तेइबै बोहू धूप धिना कि सैभ पवित्र लोकै री प्रार्थना सैंघै सुनै री तेसा वेदी पैंधै ज़ो सिंहासना सामनै सा च़ढ़ाला।

⁴होर तेई धुपा रा धुँआ पवित्र लोकै री प्रार्थना समेत स्वर्गदूतै रै हौथै परमेश्वरा सामनै पजेरु।

⁵फिरी स्वर्गदूतै धूपदान लेइया तेथा न वेदी री औग भौरी होर धौरती पैंधै पाई होर, गृँज़णै की छ़ेड़, बज़ड़ाह होर ज़ौज़री होंदी लागी।

⁶होर ते सौत स्वर्गदूत ज़ुणी हागै सौत तुरही ती, ते फुकरनै री तैंईंयैं त्यार हुऐ।

⁷पैहलै स्वर्गदूतै तुरही फुकरी होर लोहू न मिलै दै शौऊरु होर औग पैदा हुई होर धौरती पैंधै पाई होर एक तिहाई धौरती फुकुई होर एक तिहाई बुटै फुकुऐ होर सारा हौरा गाह भी फुकुआ।

⁸दुज़ै स्वर्गदूतै तुरही फुकरी ता मना औगी सांही भौकदा एक बड़ा ढौग समुन्द्रा न पाऊ होर तेथा री बजहा न समुन्द्रा रा एक तिहाई हिस्सा लोहू बणू।

⁹होर समुद्रै री एक तिहाई बणाईदी च़ीज़ा ज़ो ज़िन्दी ती ते मूँई होर एक तिहाई जहाज़ नष्ट हुऐ।

¹⁰होर त्रीज़ै स्वर्गदूतै तुरही फुकरी होर एक बड़ा तारा ज़ो मशाला सांही भौका ती, स्वर्गा न चुटू होर तेइरी बजहा न नौई रै एक तिहाई हिस्सै पैंधै होर पाणी रै सोतै पैंधै एज़िया पौड़ू,

¹¹होर तेई तारै रा नाँ नागदोना[5] सा होर एक तिहाई पाणी नगदौनै सांही कड़वा हुआ होर बोहू सारै मांहणु तेई पाणी रै कड़वै होंणै सैंघै मूँऐ।

¹²च़ोऊथै स्वर्गदूतै तुरही फुकरी होर सूरज़ै री एक तिहाई, चाँदा री एक तिहाई होर तारै री एक तिहाई पैंधै मुसीबत आई, औखै तैंईंयैं कि तिन्हरा एक तिहाई औंग निहारा हुआ होर ध्याड़की एक तिहाई न प्याशा नी रौहू होर तैण्ढाऐ राती बै भी।

¹³ज़ैबै मैं फिरी हेरू ता आसमानै रै बिच़ा न एक इलणी उड़दी होर ऐण्ढी बोलदी शुणी कि, “तिन्हां त्रा स्वर्गदूतै री तुरही रै शब्दै री बजहा न ज़ौसरा फुकर न हाज़ी बाकि सा, धौरती न रौहणु आल़ै पैंधै हाय! हाय! हाय!”