Read Pahari, Kullu प्रकाशितवाक्य 9 Bible Online

प्रकाशितवाक्य 9 - Pahari, Kullu bible

प्रकाशितवाक्य 9

¹ज़ैबै पौंज़ुऐ स्वर्गदूतै तुरही फुकरी ता मैं स्वर्गा न एक तारा धौरती बै औल़दा हेरू होर तेइबै नरका रै कुण्डै री कुँज़ी धिनी,

²होर तेइयै नरका रा कुण्ड खोलू होर कुण्डा न बड़ी भट्ठी सांही धुआँ उठु होर कुण्डै रै धुऐं लाइया सूरज़ होर वायुमण्डल काल़ा हुआ।

³होर तेई धुऐं न धौरती पैंधै टिटड़ै निकतै होर तिन्हां बै धौरती रै बिच्च़ु सांही शक्ति धिनी।

⁴होर तिन्हां बै बोलू कि, न धौरती रै गाह बै, न कौसी हरियाली बै, न कौसी बूटै रा नुकसान केरदै, सिर्फ़ तिन्हां मांहणु बै ज़ौसरै मौथै पैंधै परमेश्वरै री मोहर नी ऑथि।

⁵तिन्हां टिटड़ै बै मांहणु बै मारनै रा ता नी, पर पौंज़ म्हीनै तैंईंयैं लोका बै पीड़ा देणै रा अधिकार धिना होर तिन्हरी पीड़ा ऐण्ढी ती ज़ैण्ढा कि बिच्च़ु रै डँक मारनै सैंघै मांहणु बै दाह होआ सा।

⁶तिन्हां पौंज़ म्हीनै न मांहणुआ मौऊत तोपणी, पर तिन्हां बै मौऊत नी मिलणी होर मौरनै री इच्छा रखणी, पर मौऊत तेईन भगणा।

⁷तिन्हां टिटड़ै रा आकार लड़ाई बै त्यार केरूऐदै घोड़ै सांही ती होर तिन्हरी मूँडी पैंधै मना सुनै रै मुकट ती होर तिन्हरै मुँह मांहणु सांही ती।

⁸होर तिन्हरा च़ोहढ़ा बेटड़ी सांही लोम्बा ती होर दोंद शेरा सांही ती।

⁹होर ते लोहै रा कवच लाइया ती होर तिन्हरै पँखै री छ़ेड़ रौथ होर लड़ाई न दौड़नू आल़ै बोहू घोड़ै सांही ती।

¹⁰होर तिन्हरी पूँछ बिच्च़ु सांही ती होर तिन्हां न डँक ती। तिन्हरी पूँछा न मांहणु बै पौंज़ म्हीनै तैंईंयैं दु:ख पजाणै री सामर्थ ती।

¹¹नरक कुण्डा रा दूत तिन्हां पैंधै राज़ा ती। तेइरा नाँ इब्रानी भाषा न अबद्दोन होर यूनानी भाषा न अपुल्लयोन सा ज़ुणिरी मतलब नाश केरनु आल़ा सा।

¹²पैहली मुसीबत बीती, ऐबै एथा बाद न दूई मुसीबता होर होणू आल़ी सी।

¹³होर ज़ैबै छ़ौऊऐ स्वर्गदूतै तुरही फुकरी ता ज़ो सुनै री वेदी परमेश्वरै रै सिंहासना सामनै सा तेइरै च़ार शींगा न मैं ऐण्ढा शब्द शुणू,

¹⁴मना कोई छ़ौऊऐ स्वर्गदूता बै ज़ौस हागै तुरही ती बोलदा लागा सा कि, “तिन्हां च़ार स्वर्गदूता बै खोल ज़ो फुरात नाँ री बड़ी नौई हागै बोनुऐ सी।”

¹⁵होर ते च़ारै दूत खोलै ज़ो तेसा घड़ी, ध्याड़, म्हीनै होर बौर्षै री तैंईंयैं मांहणु रा एक तिहाई हिस्सा मारनै री तैंईंयैं त्यार केरूऐदै ती।

¹⁶होर फोऊज़ी रै सवारै री गिणती बीह करोड़ ती। मैं तिन्हरी गिणती शुणी।

¹⁷होर मुँभै घोड़ै होर तिन्हरै सवार ऐण्ढै हेरुऐ ज़ौसरी कवच औगी सांही होर धूम्रकान्त होर गन्धका सांही ती। तिन्हां घोड़ै री मुँडी शेरै री मुँडी सांही ती होर तिन्हरै मुँहा न औग, धुँआ होर गन्धक निकल़ा ती।

¹⁸इन्हां त्रा महामारी मतलब, औग, धुँऐ होर गन्धक ज़ो तिन्हरै मुँहा न निकल़ा ती तेथै लाइया मांहणु रा एक तिहाई हिस्सा मारूआ।

¹⁹किबैकि तिन्हां घोड़ै री सामर्थ तिन्हरै मुँहा न होर पूँछा न ती किबैकि तिन्हरी पूँछ कीड़ै सांही ती होर तिन्हां पूँछै री मुँडी भी ती होर एथै लाइया ते लोका बै दु:ख देआ ती।

²⁰होर बाकि मांहणु ज़ो पैहलै तिन्हां महामारी सैंघै नी ती मूँऐ, तिन्हैं हाज़ी भी आपणै बुरै कोमा न मन नी बदलू। ते तिन्हरी हत्या, टूणा, व्यभिचार होर चोरी केरनै न मन नी बदलदै। तिन्हैं बुरी आत्मा होर आपणै हौथा न बणाईदी च़ीजा पूजा केरनी नी छ़ौड़ी, ज़ैण्ढै कि मूर्ति बै सुनै या च़ाँदी रै पीतल या लकड़ी सैंघै बणाईया सी। ते मूर्ति ज़ो न ता हेरी सकदी, न शुणी सकदी, न च़ली सकदी।