Read Pahari, Mahasu मत्ती 1 Bible Online

मत्ती 1 - Pahari, Mahasu bible

मत्ती 1

¹यीशु मसीह रै पोस्तै रै बारै दी, ज़ुण दाऊद राज़ै री खानदानी कु थौ राज़ौ दाऊद अब्राहमा री खानदानी कु थौ।

²अब्राहमा रौ छ़ोहरु इसहाक, इसहाका रौ याकूब, याकुबा रै छ़ोहरु यहुदा और तेसरै भाई,

³यहुदा और तामारा रै फिरिस और जोरह, फिरिसा रौ हिस्त्रोन, और हिस्त्रोना रौ एराम थौ।

⁴एरामा रौ अम्मीनादाब, अम्मीनादाबा रौ नहशोन, और नहशोना रौ सुलेमान,

⁵सुलेमाना और राहाब, राहबा रौ बोअज़, बोअज़ा और रुत, रुता रौ ओबेद, और ओबेदा रौ यिशै,

⁶और यिशै रौ छ़ोहरु दाऊद राज़ौ थौ। और दाऊदा रौ सुलेमान तिंया छ़ेउड़ी कु पैदौ हुऔ ज़ुण पैहलै उरिय्याह री छ़ेउड़ी थी।

⁷सुलेमाना रौ रहबाम, रहबामा रौ अबिय्याह, और अबिय्याहा रौ आसा,

⁸आसा रौ यहोशाफात, यहोशाफाता रौ योराम, और योरामा रौ कौनाल़डु थौ उज्जियाह,

⁹उज्जियाहा रौ छ़ोहरु योताम, योतामा रौ आहाज, और आहाजा रौ हिजकिय्याह,

¹⁰हिजकिय्याहा रौ मनश्शिह, मनश्शिहा रौ आमोन, और आमोना रौ थौ योशिय्याह।

¹¹इस्राइली लोगु रै बेबीलौना री कैदा दी पौड़णै कु पैहलै योशिय्याह, यकुन्याह और तेसरै भाई रौ नान बौणौ

¹²कैदी चाणीऔ सै बेबीलौना दी निणै बासिऐ यकुन्याह कु शालतिएल हुऔ, और शालतिएला रौ छ़ोहरु जरुब्बाबिल,

¹³जरुब्बाबिला रौ अबीहूद, अबीहूदा रौ इल्याकीम, और इल्याकीमा रौ अजोर,

¹⁴अजोरा रौ छ़ोहरु थौ सदोम, सदोमा रौ अकीम, अकीमा रौ इलीहूद,

¹⁵इलीहूदा रौ इलियाजार, इलियाजारा रौ मतान, मताना रौ याकूब,

¹⁶याकुबा रौ छ़ोहरु युसुफ, ज़ुण मरियमा रौ बोउटौ थौ, और मरियमा कु यीशु ज़ासलै मसीह भी बोलाई, पैदौ हुऔ।

¹⁷इणै कौरी अब्राहमा कु दाऊदा झ़ांऊ चौदहा पीड़ी हुई, और दाऊदा कु बेबीलौना रै गुलाम हुईऔ पौउंच़णै झ़ांऊ चौदहा पीड़ी, गुलाम हुइयौ बेबीलौना लै पौउंच़णै झ़ांऊ रै बौगता कु मसीह झ़ांऊ चौदहा पीड़ी हुई।

¹⁸इऐ सारी बुशै यीशु रै ज़ौनमा कु पैहलै हुई ई। यीशु मसीह रौ जनम इणै कौरी हुऔ, कि ज़ेबी तेसरी मां मरियमा री मांगणी युसुफा आइलै हुई गोई, ता तिउंरी शादी हुणै कु पैहलै ई मरियम पवित्र आत्मा री तौरफा कु गौरकड़ी हुई।

¹⁹तैबै तियांरौ हुणै वाल़ौ बोउटौ युसुफ ज़ुण धौर्मी थौ और तिऐं बदनाम कौरणौ नाईं च़ाहा थौ, तिऐं च़ुटुकच़ार पोरु छ़ाड़णै रै बारै दी सुंच़दै लागौ।

²⁰ज़ेबी सेऊ इऊं बुशै सुंच़दै थौ लागौ औन्दौ ता सौरगदूत तेसरै सुइणै दी दिशियौ बोलदै लागौ, “ओ युसुफ! दाऊदा री खानदानी रौ, तू तिऐं मरियम ज़ुण तेरी छ़ेउड़ी हुणै वाल़ी आ। तिऐं आपणै रै काऐ आणना लै नाईं डौर, कैलैकि ज़ो तिंआरै गर्भा दी आ, सेऊ पवित्र आत्मा री तौरफा कु आ।

²¹तिंआरौ एक मांऊ हुआ आ और तू तेसरौ नाऊं यीशु छ़ाड़ै, कैलैकि सेऊ आपणै लोगु रौ तिंउरै पापा कु छ़ुटकारौ कौरालौ।”

²²एऊ सब एथीलै हुऔ कि ज़ो वचन प्रभुऐ यशायाह भविष्यवक्ता रै ज़ौरिऐ यीशु रै ज़नमा रै बारै दी बोलौ औन्दौ थौ, सेऊ पुरौ हुआ।

²³“देखौ, एक बिण ब्याई गौरकड़ी हुआ और तिंआरौ एक मांऊ हुआ, और तेसरौ नाऊं इम्मानुएल छ़ाड़ाई, ज़ेथरौ मतलब आ परमेश्‍वर आमु आइलै आ।”

²⁴तैबै युसुफ निजा कु बीउज़ुऔ परमेश्‍वरा रै दूता रौ हुकमा कौरी आपणी हुणै वाल़ी छ़ेउड़ी आपणै घौरै आणी।

²⁵और ज़ेबी झ़ांऊ तिंआरौ छ़ोहरु नाईं हुआ लौ तेबी झ़ांऊ सेऊ तिंया काऐ नाईं डैऔ और ज़ैबै मरियमा रै मांऊ हुऔ युसुफै तेस मांऊ रौ नाऊं यीशु छ़ाड़ौ!