Read Pahari, Mahasu मत्ती 11 Bible Online

मत्ती 11 - Pahari, Mahasu bible

मत्ती 11

¹ज़ेबी यीशुऐ आपणै बारह च़ेलेऊ लै हुकम देई ऐरौ, ता सेऊ तिंउरै इलाकै दी शिक्षा दैणा लै और परचार कौरना लै तिदरा कु डेई गौ।

²यहुन्नै कैदा दी मसीह रै कामा रौ संदेश शुणौ और आपणै च़ेलै यीशु काऐ इणै पुछ़णा लै भेज़ै,

³कि “का आशणै वाल़ौ मसीह तू ई आ (ज़ास पौखदै आमै लागै औन्दै थै), या आमै कास ओरी पौखुलै?”

⁴यीशुऐ तिउंलै ज़वाब दैऔ, “ज़ो कुछ़ तुमुऐ देखौ और शुणौ, डेइऔ तेस यहुन्ना कै बोलौ,

⁵कि शेड़ै देखा ई, लौंगड़ै ई आण्डाई, कोढ़ी हुआई ठीक, टौणै ई शुणा, मौरै औन्दै हुआई ज़िउंदै, और गरीब लोगु लै शुणावा खुशी री खौबर।

⁶आशीष वाल़ै ई सै, ज़ुण मुं माथै शक ना कौरदै।”

⁷ज़ेबी सै तिदरु डेई गौऐ, ता यीशु यहुन्ना रै बारै दी लोगु आइलै बोलदै लागौ, “तुमै ज़ांगल़ा दी का देखदै थै डैऔ औन्दै? का बागुरा कौरी हिलणै वाल़ै शाऊंटै देखदै?

⁸तैबै तुमै का देखदै डैऔ औन्दै थै? का च़ोगै-बागै भिड़ै औन्दै लोगु देखदै डेवै थै? नाईं कैलैकि ज़ो आदमी च़ोगै-बागै बिड़ाई सै ठाठ-बाठा कौरी आपणै मैहला दी रौआ ई।

⁹ता तैबै तुमै का देखदै थै डैऔ औन्दै? का कास गुरु देखदै? ओ, हाऊं तुमुलै बोलाऊ कि सेऊ यहुन्ना भविष्यवक्ता कु भी बौड़ौ आ।

¹⁰यहुन्ना ई सा सेऊ आदमी ज़ासरै बारै दी पवित्रशास्त्रा दी इणौ लिखौ औन्दौ, ‘कि देखौ, हाऊं आपणौ सौरगदूत ताऊं कु औगाड़िऐ भेज़ाऊ, सेऊ ताऊं कु औगाड़िऐ डेइयौ ताऊं कालै बाट तैयार कौरा।’

¹¹तैबै यीशुऐ बोलौ, ‘हाऊं तुमुलै सौच़्च़ौ बोलाऊ कि इबी झ़ांऊ ज़ेती भी आदमी धौतरी माथै रौऐ ई तिऊं मांझ़िया कु यहुन्ना बपतिस्मौ देणै वाल़ै कु बौड़ौ कोई भी नाईं आसतौ। पर परमेश्‍वरा रै राज़ा दी ज़ुण छ़ोटै कु छ़ोटौ आ सेऊ यहुन्ना कु भी बौड़ौ आ।’

¹²यहुन्ना बपतिस्मा दैणै वाल़ै रै बौगता कु इबी झ़ांऊ, शक्तिशाल़ी लोगुऐ तिऊं लोगु माथै हामलौ कियौ ज़ुणिऐ परमेश्‍वर आपणै ज़िवा दी राज़ कौरणै दैऔ आ और तिंउऐ भौरी कौष्ट झ़ेले ई।

¹³यहुन्ना झ़ांऊ सारै भविष्यवक्ता और मुसा रै नियम परमेश्‍वरा रै राज़ा रै बारै दी भविष्यवाणी कौरदै रौऐ।

¹⁴और च़ाऊ मानौ कि एलियाह ज़ो आशणै वाल़ौ थौ, सेऊ एऊ आ ज़ासरै बारै दी भविष्यवाणी थी हुई ऐन्दी।

¹⁵अगर तुमै सौमुझ़णै च़ाहा ई ता ज़ो हाऊं बोलाऊ तेस माथै ध्यान दैऔ।

¹⁶हाऊं एज़ी पीड़ी री मसाल कास आइलै देऊ? सै तिऊं मांऊ ज़िणे ई, ज़ो बज़ारा दी बोशै औन्दै एकी-दुजै लै औटाइयौ बोलाई

¹⁷‘आमुऐ तुमुलै बांइशी बाज़ी, पर तुमै नाच़ै नाईं। आमुऐ दुःख किऔ, और तुमै नाईं लेरै।’

¹⁸कैलैकि यहुन्नै केबी भी आच़्छ़ौ खाणौ नाईं खाऔ पिऔ, और सै बोलाई, ‘तेस भितै बुरी आत्मा आ।’

¹⁹पर ज़ेबी हाऊं आदमी रौ छ़ोहरु, खा-पिआ ऊ, ता तुमै बोलाई इणौ कि हाऊं पेटु और सुरी पिणै वाल़ौ, मामलै निणै वाल़ौ और पापी लोगु रौ गोश्टण ऊ, पर ज़ुण परमेश्‍वरा री शिक्षा मानियौ च़ाला सा तिउंरी ज़िन्दगी कु परमेश्‍वरा रौ ज्ञान सौच़्च़ौ साबित हुआ आ।”

²⁰तैबै यीशु तिऊं इलाकै रै लोगु फिटकारदै लागौ, ज़ासदी तिणीऐ भौरी च़मतकार किऐ थै, कैलैकि तिंउऐ आपणौ मन नाईं बौदल़ौ थौ।

²¹“फिटकार, खुराजीन शहरा रै लोगु लै! फिटकार, बैतसैदा शहरा रै लोगु लै! ज़ो नोखै काम और आच़्छ़ै काम मुंइऐ तुमु मांझ़िऐ किएई अगर तिऊं काम हाऊं दुजै इलाकै सूर और सैदा दी कौरा थौ ता सै तिंउरै बौणै औन्दै बोरी रै जुड़कै भिड़ीयौ और आपणै शरीरा दी छ़ारा मांडियौ केबकै आपणौ मन पापा कु बौदल़ा थै।

²²पर हाऊं तुमुलै बोलाऊ कि फैसलै रै दिना दी तुमारी हालत तिऊं सूर-सैदा इलाकै कु भी ज़ादी बुरी हुणी आ।

²³ओ कफरनहूमा रै लोगुओ, का तुमु सौरगा झ़ांऊ उंच़ौ कौरा ई? ताऊं ता तौल़ै उतारा ई पैताल़ा लै! ज़ो च़मतकार काम तुमु मांझ़िऐ कौरै ई, अगर सदोम इलाकै दी कौरै थै, ता सेऊ आज़ा झ़ांऊ बौणी रौआ थौ।

²⁴पर हाऊं तुमुलै बोलाऊ कि फैसलै रै दिनै तेरी हालत सदोमा री हालता कु ज़ादी बुरी हुणी आ।”

²⁵सेज़ै बौगतै यीशुऐ बोलौ, “ओ बाब, सौरगा और धौतरी रै मालिक हाऊं तैरौ धन्यबाद कौराऊ कि तू इऐं बुशै ज्ञानी और सौमझ़दारु लोगु कु च़ोरी छ़ाड़ी पर अनपड़ और सिधै-साधै लोगु माथै पौगड़ौ की आ।

²⁶ओ, बाब ताउंकै इणौ ई आच़्छ़ौ लागौ।”

²⁷“मैरै बाबै मुकै सब कुछ़ देई गौ आ। कोई ना ज़ाणदौ कि छ़ोहरु कुण आ, सिरफ बाब ज़ाणा सा, और बाब कुण आ इणौ भी कोई ना ज़ाणदौ सिरफ छ़ोहरु या ज़ास माथै छ़ोहरु तेस पौगड़ौ कौरणै च़ाहा लौ।”

²⁸“ओ सब मैहनत कौरणै वाल़ेउओ और गौरकै थाली दाबुऐ औन्दै लोगुओ, मुं काऐ आशौ। हाऊं तुमुलै आराम दिआऊ।

²⁹मैरौ शमाई आपु माथै च़ुंगौ, और मुकु शिखौ। कैलैकि हाऊं शांत और ज़िवा कु भौलौ आ: और तुमै आपणै ज़िवा दी आराम पा लै।

³⁰कैलैकि मैरौ शमाई आसान और मैरौ भार हौल़कौ आ।”