Read Pahari, Mahasu मत्ती 12 Bible Online

मत्ती 12 - Pahari, Mahasu bible

मत्ती 12

¹सेज़ै बौगतै यीशु आरामा रै दिना दी डोखरै दी थौ डेउंदै लागौ औन्दौ, और तेसरै च़ेलेऊ रै भूख लागी ता सै गीऊंआ रै सील चोड़ियौ खान्दै लागै।

²तैबै फरीसीउ मांझ़िऐ कु कुछ़ लोगुऐ बोलौ ज़ेज़ौ काम आरामा रै दिना दी नाईं जान्दौ कौरणौ, सेज़ौ काम तुमै और तुमारै च़ेलै कैलै कौरा ई?

³यीशुऐ तिउंलै ज़वाब दैऔ, “का तुमुऐ धौर्म शास्त्रा दी नाईं पौड़ौ, ज़ेबी राज़ौ दाऊद और तेसरै साथी भुखै थै, तिउंकै खाणा लै कुछ़ भी नाईं थौ, तैबै राज़ै दाऊदै का कियौ?

⁴सेऊ परमेश्‍वरा रै घौरा दी डैऔ, और तिऐ परमेश्‍वरा लै च़ौड़ाई औन्दी भोगा री रोटी खाई और आपणै साथीऊ लै भी देई, ज़ो सिरफ याजक ई खा थै?

⁵या का तुमुऐ नियमा दी नाईं पौड़ौ कि याजक आरामा रै दिना परमेश्‍वरा रै घौरा दी आरामा रै दिना री विधी चोड़णा दी भी बेकसूर ठहराई?

⁶पर हाऊं तुमुलै बोलाऊ कि इदै सेऊ आ ज़ो परमेश्‍वरा रै घौरा कु भी बौड़ौ आ।

⁷अगर तुमै एथरौ मतलब ज़ाणाई, ‘हाऊं दया कौरी खुश हुआ ऊ, बौल़ी कु नाईं,’ ता तुमै बेकसूरी लै आरोपी नाईं बोला थै।

⁸आदमी रौ छ़ोहरु ता आरामा रै दिना रौ भी प्रभु आ।”

⁹तिदरु कु डेइयौ यीशु तिउंरै आराधनालय दी आशौ।

¹⁰तिऐ एक आदमी थौ, ज़ासरौ हाथ शुकौ औन्दौ थौ। तैबै कुछ़ फरीसी और शास्त्री लोग यीशु माथै आरोप लाइणा लै बोलौ, “का आरामा वाल़ै दिना दी च़ांगौ कौरणौ ठीक आ?”

¹¹यीशुऐ तिउंलै बोलौ, “तुमु मांझ़िऊ इणौ कुण आ ज़ासरी एक ई भेरी आ, और सै आरामा रै दिनै खाल़ी दी पौड़ा ली, ता सेऊ तिंया पाकड़ियौ नाईं गाड़दौ?

¹²भौलै, आदमी री कीमत भेरी कु केती बौड़ियौ आ! एथीलै आरामा रै दिनै भौलाई कौरणी ठीक आ।”

¹³तैबै यीशुऐ तेस आदमी लै बोलौ, “आपणौ हाथ बौड़ाऊ।” तिणीऐ आपणौ हाथ औगांऊ कियौ, और सेऊ तैबै दुजै हाथा ज़िणौ ठीक हुई गौ।

¹⁴तैबै फरीसीउऐ बाइरै डेइयौ यीशु रै विरोधा दी गुणमुणादै लागै कि एस किणै कौरी झ़ांगी।

¹⁵इणौ ज़ाणियौ यीशु तिदरु कु डेई गौ। और भौरी लोग यीशु पिछ़ु हुई गौऐ, और यीशुऐ सौभी लोग च़ांगै कियै,

¹⁶और यीशुऐ सै च़ितल़ाऐ कि “तुमै मुं ना देखाऔ कि हाऊं कुण ऊ।”

¹⁷ताकी ज़ो वचन परमेश्‍वरै यशायाह भविष्यवक्तै रै ज़ौरिऐ बोलौ औन्दौ थौ, सेऊ पुरौ हुआ:

¹⁸“देखौ, एऊ मैरौ नुकुर आ, ज़ो मुंइऐ छ़ांटौ आ। मैरौ प्यारौ, ज़ासकु मैरौ मन खुश आ, हाऊं आपणी आत्मा एस माथै पा ऊ, और सेऊ दुजी ज़ाती लै फैसलै री खौबर शुणावा लौ।

¹⁹सेऊ ना झ़ौगड़ौ कौरालौ, और ना नाच़ा-गा लौ, और ना बज़ारा दी सेऊ ज़ोरै-ज़ोरै बोलीयौ शिक्षा दिया लौ।

²⁰सेऊ फेच़ै औन्दै शाऊंटै नाईं चोड़ालौ, और ना धुंऔ देणै वाल़ौ दियौ इशावालौ। ज़ेबी झ़ांऊ सेऊ फैसलै माथै ज़ीत नाईं दिलावा लौ।

²¹दुजी ज़ाती तेसरै नाऊं माथै आश छ़ाड़ा लै।”

²²तैबै लोगुऐ एक शेड़ौ और लाटौ आदमी यीशु काऐ आणौ ज़ासदी बुरी आत्मा थी। और यीशुऐ सेऊ ठीक कियौ, और सेऊ बोलदै और देखदै लागौ।

²³एथ माथै सारै लोग हैरान हुइयौ बोलदै लागै, “एऊ का दाऊदा री सन्तान आ!”

²⁴पर फरीसीउऐ इणौ शुणियौ बोलौ, “एऊ ता बुरी आत्मा रै मुख्यै शैताना री सहायता कौरी बुरी आत्मा गाड़ा आ।”

²⁵पर यीशुऐ तिंउरै मौना री बुशै ज़ाणियौ तिउंलै बोलौ, “ज़ेज़ै राज़्य दी आपु मांझ़िऐ फूट हुआ सा, सेऊ पोरु उझ़ड़ा सा। और ज़ेज़ै घौरा या इलाकै दी फूट हुआ सा, सेऊ घौर नाश हुआ सा।

²⁶और अगर शैतान ई शैतान गाड़ा, ता सेऊ आपणौ ई विरोधी हुई गौ आ। तैबै तेसरौ राज़ किणै कौरीऐ बौणी रौआ सा?

²⁷अगर हाऊं शैताना रै ज़ौरिऐ बुरी आत्मा गाड़ाऊ ता, तुमारी सन्तान कासरै ज़ौरिऐ बुरी आत्मा गाड़ाई? एथीलै सै ई तुमारौ फैसलौ कौरा ई।

²⁸अगर हाऊं परमेश्‍वरा री शक्ति कौरीऐ बुरी आत्मा गाड़ाऊ ता परमेश्‍वरा रौ राज़ तुमारै बिच़ा दी आशी गौ आ।

²⁹या किणै कौरी कोई आदमी कास शक्ति वाल़ै रै घौरा दी डेइयौ तेसरी धन-ज़यदाद लुटी सौका आ, ज़ेबी झ़ांऊ कि पैहलै सेऊ तेस शक्ति वाल़ौ आदमी नाईं बानालौ? तैबै सेऊ तेसरौ घौरा री धन-ज़यदाद लुटा सा।

³⁰ज़ो मैरै साथा दी नाईं आ सै मैरै विरोधा ई, और ज़ो मुं आइलै कौठै नाईं कौरदै सै ढाल़ा ई।

³¹एथीलै हाऊं तुमुलै बोलाऊ कि आदमी रै सारै रौंगा रै पाप और बुराई माफ हुआ, पर पवित्र आत्मा री बुराई माफ नाईं औली।

³²ज़ुण-कुण आदमी रै छ़ोहरु रै विरोधा दी कोई बूश बोलालौ, तेसरौ एऊ गुनाह माफ हुआ लौ, पर ज़ुण-कुण पवित्र आत्मा रै विरोधा दी कुछ़ बोलालै, तेसरौ गुनाह ना ता लोका दी और ना परलोका दी माफ हुआ लौ।”

³³“अगर पेड़ा लै आच़्छ़ौ बोलाई, ता तेसरै फल़ा लै भी आच़्छ़ौ बोलौ, या निकामौ बोलाई, ता तेसरै फल़ा लै भी निकामौ बोलौ। कैलैकि पेड़ आपणै फल़ा कौरी रवाइया आ।”

³⁴“ओ लोगुओ तुमै दुष्ट ई ज़ैहरिलै सापा ज़िणै। तुमै बुरै हुइयौ किणै कौरै आच़्छ़ी बुशै बोली सौका ई? कैलैकि ज़ो मौना दी भौरुऔ औन्दौ, सेऊ ई मुंआ दी आशा।”

³⁵“भौलौ आदमी आपणै भौलै ज़िवा रै खौज़ानै कु भौली बुशै ला सा, और बुरौ आदमी ला सा आपणै बुरै ज़िवा रै खौज़ानै कु बुरी बुशै। ज़ो तुमारै ज़िवा दी औलौ, सेऊ निकल़ा मुआं कौरी बाइरै।

³⁶और हाऊं तुमु कु बोलाऊ कि आदमी ज़ो-ज़ो निकामी बुशै बोलालै, फैसलै रै दिनै सै हर एक तिऊं बुशै रौ लेखौ दिआ लै।

³⁷कैलैकि तू आपणी बुशा री वज़ाह कु बेकसूर, और आपणी बुशु री वज़ाह कु दोषी ठहराइयाइ। ”

³⁸एथ माथै कुछ़ शास्त्रिउ और फरीसीउऐ यीशु लै बोलौ, “ओ गुरु, आमै ताऊं कौरी एक निशाणी देखणी च़ांई सा”

³⁹यीशुऐ तिउंलै ज़वाब दैऔ, “एज़ै पोस्तै रै बुरै और गलत लोग निशाणी लोड़ाई, पर योना भविष्यवक्ता री निशाणी छ़ाड़ियौ हाऊं केज़ी भी निशाणी नाईं देखाल़दौ।

⁴⁰योना चिया दिनै और राची झ़ांऊ पाणी दी बड़ी माच़्छ़ी रै पेटा दी रौऔ, तिणी ई हाऊं आदमी रौ छ़ोहरु चीन दिनै और राची धौतरी रै भितै रौआ लौ।

⁴¹निनवे देशा रै लोग भी एज़ै पोस्तै रै लोगु आइलै उठीयौ परमेश्‍वरा रै फैसलै रै दिना दी तिऊं माथै इलज़ाम ला ई, कैलैकि तिंउऐ योना भविष्यवक्ता रौ परचार शुणियौ आपणौ मन पापा कु बौदल़ौ आ और इदै ता योना भविष्यवक्ता रौ भी गुरु आ।

⁴²दक्षिणा रै तौरफा री राणी परमेश्‍वरा रै फैसलै रै दिना दी एज़ै पोस्तै रै लोगु आइलै उठीयौ तिऊं माथै इलज़ाम ला सा, कैलैकि इऐ राणी सुलेमान गुरु रै ज्ञान शुणना लै धौतरी रै धुरै कु आशी थी, सुलेमान राज़ै काऐ। और देखौ, इदै ता सुलेमान गुरु कु भी बौड़ौ गुरु आ।”

⁴³“ज़ैबै आदमी कु बुरी आत्मा निकल़ा सा तैबै सै बुरी आत्मा आपु कालै खाली ज़ागाह दी आरामा वाल़ी ज़ागाह लोड़ा आ, और ज़ैबै बुरी आत्मा कै किऐ भी ज़ागाह नाईं मिलदी।

⁴⁴तैबै सै आपुलै बोलाई, ‘हाऊं आबै आपणै सेज़ै आदमी दी डिआऊ ज़िदरु हाऊं निकल़ी ऊ।’ और ज़ैबै सै बुरी आत्मा वापिस तिऐ आशा ज़िदरु सै निकल़ी थी तिऐ तिआंकै सै ज़ागाह साफ-सुथरी और सज़ी औन्दी मिला आ।

⁴⁵और सै बुरी आत्मा डेइयौ आपु आइलै औज़ौ सात बुरी आत्माऐं आणा सा, ज़ो तियांकु भी बुरी हुआई। इणै कौरीऐ सै सारी बुरी आत्माऐं तेस शरीरा दी डेइयौ वास कौरा ई तेस आदमी री हालत ज़ासदी सै बुरी आत्माऐं हुआई पैहलै कु भी ज़ादी बुरी बौणा सा। एज़ै पोस्तै रै बुरै लोगु री हालत भी इणी ई हुणी आ।”

⁴⁶ज़ेबी यीशु भीड़ा आइलै बुशै लाइंदै लागौ औन्दौ थौ, तैबै यीशु री मां और भाई बाइरै खौड़ै थै और सै तेस आइलै बुशै लाइणौ च़हा थै।

⁴⁷तेस आइलै कुणौ एकीऐ बोलौ, “देख, तेरी मां और तैरौ भाई बाइरै खौड़ै आ, और ताऊं आइलै बुशै लाइणै च़हा ई।”

⁴⁸यीशुऐ तिउंलै ज़वाब दैऔ, “कुण आ मेरी मां? और कुण आ मैरौ भाई?”

⁴⁹और आपणै च़ेलै री तौरफा दी आपणौ हाथा बड़ाइयौ बोलौ, “देखौ, मेरी मां और मैरै भाई इऐ ई।

⁵⁰कैलैकि ज़ुण-कुण मैरै सौरगा रै बाबा री इच़्छ़ा माथै हांडा ई, सेई मैरै भाई, और मेरी बौइणी, और मेरी आमा सा।”