Read Pahari, Mahasu मत्ती 14 Bible Online

मत्ती 14 - Pahari, Mahasu bible

मत्ती 14

¹सेज़ै बौगता दी राज़ै हेरोदेसै यीशु रै हैरानी वाल़ै कामा रै बारै दी शुणौ,

²और आपणै नुकुरा लै बोलौ, “यीशु यहुन्ना बपतिस्मौ दैणै वाल़ौ आ, ज़ो मुर्दे मांझ़िआ कु ज़िउंदौ हुई गौ आ। एज़ै कारण यीशु कै शक्ति वाल़ै काम ई लागै औन्दै हुंदै।

³हेरोदेसै इणौ एथीलै सुंच़ौ थौ, कैलैकि हेरोदेसै आपणै भाई फिलिप्पुसा री छ़ेउड़ी हेरोदियासा आइलै शादी की थी और यहुन्नै हेरोदेसा लै बोलौ थौ कि ताऐं गलत कियौ आ, आपणै भाई री छ़ेउड़ी आपुलै छ़ाड़णी, ताउंलै ठीक नाईं आ। एथीरी वज़ाह कु यहुन्ना, पाकड़ियौ बानौ और ज़ेला दी पाई गौ थौ।

⁵एथीलै सेऊ तेस झ़ांगणौ च़ाहा थौ, पर लोगु कु डौरा थौ कैलैकि सै तेस गुरु माना थै।

⁶पर ज़ेबी हेरोदेसा रौ ज़नम दीन आशौ, ता हेरोदियासा री छ़ोटीऐ पार्टी दी नाच़ियौ हेरोदेस खुश कियौ।

⁷एथ माथै तिणीऐ कसम खाइयौ वचन दैऔ, ‘ज़ो कुछ़ तू मांगा ली, हाऊं ताउंलै दिआऊ।’ ”

⁸सै आपणी मां रै उकसाणै माथै बोली, “यहुन्ना बपतिस्मौ दैणै वाल़ै रौ मूंड थाल़ी दी इऐ मुं काऐ आणौ!

⁹राज़ौ दुखी हुऔ, पर आपणी कसमा का, और साथा दी बोशणै वाल़ै री वज़ाह कु, हुकम दैणै कि पोरु दैऔ।

¹⁰और तिणीऐ ज़ेला दी लोग भेज़ीयौ यहुन्ना रौ मूंड काटौ।

¹¹और तेसरौ मूंड थाल़ी दी आणौ और छ़ोटी कै दैणै, और तिऐं सेऊ मूंड आपणी मां काऐ नियौं।

¹²तैबै यहुन्ना रै च़ेलै आशै और तेसरौ मौड़ौ नीईंयौ दाबी गौ, और डेइयौ यीशु कै खौबर देई।”

¹³ज़ेबी यीशुऐ इणौ शुणौ, ता सेऊ किश्ती माथै च़ौड़ियौ तिदरा कु केज़ी एखुली ज़ागाह दी, एखुलै दी डेई गौ। लोग इणौ शुणियौ इलाकै-इलाकै कु पैदल ई तेस पिछ़ु हुई गौऐ।

¹⁴तिणीऐ निकल़ियौ एक बौड़ी भीड़ देखी और तिऊं माथै दया की, और यीशुऐ तिंउरै बिमार लोग ठीक किऐ।

¹⁵ज़ेबी ब्याल़ हुई ता यीशु रै च़ेलेउऐ तेस काऐ आशीयौ बोलौ, “एज़ी ज़ागाह शुनशान आ और बेर औन्दी लागी गोई। इऊं लोगु नीज़ुका रै बस्ती और गांव दी छ़ाड़ौ ताकी इऐ लोग आपकालै रौइणै रौ और रोटी (खाणै) रौ इन्तज़ाम कौरा।”

¹⁶पर यीशुऐ तिउंलै बोलौ, “तिऊंरौ डेउणौ ज़ुरुरी नाईं! तुमै ई इऊं लै खाणा लै दैऔ।”

¹⁷तिंउऐ यीशु लै बोलौ, “इऐ आमुकै पांज़ रोटी और दुई माच़्छ़ी छ़ाड़ियौ कुछ़ा ना आसतौ।”

¹⁸यीशुऐ बोलौ, “तिऊं इदै मुं काऐ आणौ।”

¹⁹तैबै यीशुऐ लोगु लै घासा माथै बोशणै लै बोलौ, और तैबै यीशुऐ सै पांज़ रोटी और दुई माच़्छ़ी आपणै हाथा दी की और सौरगा भिलै देखीयौ परमेश्‍वरा रौ धन्यबाद देइयौ आशीष मांगी और रोटी च़ेलेऊ कै देई और च़ेलै लागै लोगु कै बांटदै।

²⁰तैबै सारै लोगुऐ पेटा भौरीऔ रोटी खाई। तेती माथै भी च़ेलेउऐ बौच़ै औन्दै रोटी और माच़्छ़ी रै बारह छ़ाबड़ै भौरै।

²¹और खाणा वाल़ै छ़ेउड़ीऊ और लोल़डेऊ छ़ाड़ियौ, पांज़ हज़ार ता मौरद थै।

²²तैबै यीशुऐ खरकच़ार आपणै च़ेलै किश्ती दी डेउणा लै मज़बूर कियै कि सै तेसकु पैहलै पारै डिआलै, ज़ेबी झ़ांऊ सेऊ लोगु छ़ाड़ा लौ।

²³यीशु लोगु छ़ाड़ियौ, प्राथना कौरना लै अलग पाहाड़ा दी डेई गौ। और ब्याल़ी यीशु तिऐ एखुली थौ।

²⁴सेज़ै बौगतै किश्ती झ़िला रै बिच़ा दी बागुरा कौरी हिलदै-ढ़ुलदै थी लागी औन्दी, कैलैकि बागुर सामनै ओउलै थौ लागौ औन्दौ।

²⁵और यीशु राचकै च़ार बाज़ै झ़िला माथै हाण्डदी बारै तिऊं काऐ आशौ।

²⁶च़ेलै यीशु झ़िला दी पाणी माथै आण्डदी बारै रै देखीयौ घबराई गौऐ। और बोलदै लागै, “एऊ भूत आ!” और डौरा रै मारै सै हाकै मारदै लागै।

²⁷तैबै यीशुऐ खरकच़ार तिऊं आइलै बुशै लाई और बोलौ, “हिम्मत कौरौ! हाऊं आ, नाईं डौरौ!”

²⁸पतरसै यीशु लै ज़वाब दैऔ, “ओ प्रभु, अगर तू आ, ता मुं आपु काऐ पाणी माथै हाण्डीयौ आशणा रौ हुकम दैऔ।”

²⁹यीशुऐ बोलौ, “आश!” तैबै पतरस किश्ती कु उतरियौ यीशु काऐ डेउणा लै पाणी माथै हाण्डदै लागौ।

³⁰पर बागुर च़ौगरुइयौ डौरी गौ, और ज़ेबी डुबदै लागौ ता हाकै मारीयौ बोलौ, “ओ प्रभु, मुं बौच़ाऊ!”

³¹यीशुऐ खरकच़ार हाथ बड़ाइयौ सेऊ पाकड़ी गौ और तेसलै बोलौ, “ओ अविश्वासी, ताइंऐ कैलै शक कियौ?”

³²ज़ेबी सै किश्ती दी डेई गौऐ, ता बागुर रुकी गौ।

³³एथ माथै तिंउऐ ज़ो किश्ती दी थै, यीशु लै ढाला कौरीऐ बोलौ, “सौच़्च़ी ई, तू परमेश्‍वरा रौ छ़ोहरु आ।”

³⁴तेत बासिऐ सै गन्नेसरत गांवा दी पौउंच़ै।

³⁵तिदलै लोगुऐ यीशु रवाई गौ और तिदलै लोगुऐ सारै परदेशा दी खुशी री खौबर पउंच़ाई और सारै बिमार लोगु यीशु काऐ आणै,

³⁶और सै यीशु कु औरज़ कौरदै लागै कि सै तिऊं आपणै जुड़कै ई छ़ुंइणै दै। और ज़ेती लोगुऐ भी यीशु छ़ुंऔं, सै ठीक हुई गौऐ।