Read Pahari, Mahasu मत्ती 19 Bible Online

मत्ती 19 - Pahari, Mahasu bible

मत्ती 19

¹ज़ैबै यीशुऐ एज़ी बुशै बोली गोई, ता यीशु गलीला कु डेई गौ। और तैबै यीशु और तेसरै च़ेलै यरदन नौईं पारा रै परदेशा दी डेवे।

²तिऐ भी यीशु काऐ एक भौरी बौड़ी भीड़ कौठै हुई। और यीशुऐ तिऐ सै च़ांगै कियै।

³तैबै कुछ़ फरीसी लोग यीशु काऐ आशै और तेस परखुणा लै पुछ़दै लागै, “एक आदमी लै आपणी छ़ेउड़ी रौ फैसलौ कौरणौ ठीक आ या नाईं?”

⁴यीशुऐ ज़वाब दैऔ, “पवित्रशास्त्रा दी इणौ आ लिखौ औन्दौ कि, परमेश्‍वरै धौतरी चाणने री शुरुआता दी छ़ेउड़ी और मर्द चाणै ई।

⁵‘इणौ भी आ लिखौ औन्दौ कि मर्द आपणै मां-बाबा छ़ाड़ियौ आपणी छ़ेउड़ी आइलै मिली रौआ और सै एक ज़िसम बौणी रौआ।?’

⁶और सै दुई नाईं, बल्कि एक ज़िसम बौणा ई। परमेश्‍वर एक मर्द और एक छ़ेउड़ी शादी दी ज़ोड़ा आ तैबै आदमीउऐ सै दुई नाईं च़ांई अलग कौरणै।

⁷तैबै तिऊं लोगुऐ बोलौ, ‘मुसा रै नियमा दी इणौ आ लिखौ औन्दौ, ज़ो आदमी आपणी छ़ेउड़ी रौ फैसलौ कौरणौ च़ाहा सा, सेऊ आदमी राज़ीनांउ देइयौ तिऐं पोरु गाड़ी सौका सा।’ ”

⁸यीशुऐ तिउंलै बोलौ, “मुसै तुमारै मन काठौ हुणा री वज़ाह कु तुमुलै आपणी-आपणी छ़ेउड़ी पोरु छ़ाड़णै रौ हुकम दैऔ, पर पैहलै कु इणौ नाईं थौ।

⁹और हाऊं तुमुलै बोलाऊ, कि ज़ुण-कुण गान्दै काम छ़ाड़ियौ, और केज़ै कारणा कु आपणी छ़ेउड़ी लै राज़ीनांउ देइयौ दुजी छ़ेउड़ी आइलै शादी कौरा सा, सेऊ आपणी पैहली छ़ेउड़ी रै विरोधा दी गान्दै काम कौरा सा। और ज़ेज़ी छ़ेउड़ी आपणै बोउटे लै राज़ीनांउ देइयौ दुजै आदमी आइलै शादी कौरा सा, सै छ़ेउड़ी भी आपणै बोउटे रै विरोधा दी गान्दै काम कौरा आ।”

¹⁰च़ेलेउऐ यीशु लै बोलौ, “अगर मर्दू रौ छ़ेउड़ी आइलै इणौ रिश्तौ आ, ता शादी कौरणी आच़्छ़ी नाईं।”

¹¹यीशुऐ तिउंलै बोलौ, “सौभी एज़ौ वचन नाईं मानदै, सिरफ सै ज़ासलै परमेश्‍वरा री तौरफा कु एज़ौ वरदान आ दैऔ औन्दौ।

¹²कैलैकि कुछ़ नामौरद इणै ई, ज़ो मां री कुखी ई कु इणै ज़न्मै। कुछ़ नपुंसक इणै ई, ज़ो आदमीऐ नपुंसक चाणै। और कुछ़ नपुंसक इणै ई, ज़ुणिऐ सौरगा रै राज़्या लै आपु ऊ नपुंसक बौणै ई। ज़ो इऊं मानी सौका ई, सै माना लै।”

¹³तैबै लोग लोल़डेऊ यीशु काऐ आणदै लागै ताकी यीशु तिऊं माथै हाथ छ़ाड़ा और प्राथना कौरा, च़ेलेउऐ सै लोल़डै धौमकाऐ।

¹⁴यीशुऐ बोलौ, “लोल़डेऊ मुं काऐ आशणै दैऔ, और इऊं नाईं रोकौ, कैलैकि सौरगा रौ राज़ इऊं ज़िणेउरौ आ।”

¹⁵और यीशुऐ तिऊं माथै हाथ छ़ाड़ियौ तिदरा कु डेई गौ।

¹⁶एक आदमी यीशु काऐ आशौ और तेसलै बोलौ, “ओ गुरु सौदा री ज़िन्दगी पाइणा लै हाऊं केज़ौ भौलौ काम कौरु?”

¹⁷यीशुऐ तेसलै बोलौ, “तू मुकै आच़्छ़ै कामा रै बारै दी कैलै पुछ़ा ई? भौलौ ता एक ई आ, पर अगर तू ज़िन्दगी दी डेउणौ च़ाहा ई, ता हुकम मानदै थाक लागी।”

¹⁸तिणीऐ यीशु लै बोलौ, “केज़ौ हुकम?” यीशुऐ तेसलै बोलौ, “एज़ौ हुकम आ कि खून ना कौरणौ, गान्दै काम ना कौरणै, च़ोरी ना कौरणी, झ़ुठी गवाही ना दैणी,।

¹⁹आपणै मां और बाबा री इज़्ज़त कौरणी, और आपणै पड़ोसी आइलै आपु ज़िणौ प्यार छ़ाड़णौ।”

²⁰तिणी आदमीऐ यीशु लै बोलौ, “इऊं सारी ता हाऊं माना ऊ। आबै मुंदी केज़ी बुशै री कामी आ?”

²¹यीशुऐ तेसलै बोलौ, “अगर तू ठीक औणौ च़ाआई ता डेऊ, धन-ज़यदाद बेच़ीयौ गरीबु लै दै, और ताउंलै सौरगा दी धन मिला सा। और आशीयौ मुं पिछ़ु हांड।”

²²पर सेऊ आदमी इणी बुशै शुणियौ उदास हुइयौ डेई गौ, कैलैकि सेऊ भौरी सेठ थौ।

²³तैबै यीशुऐ आपणै च़ेलेऊ लै बोलौ, “हाऊं तुमुलै सौच़्च़ौ-सौच़्च़ौ बोलाऊ कि सेठ लोगु कै आपणै ज़िवा दी परमेश्‍वर राज़ कौरणै री ज़ाज़त देणी केती मुश्कल़ आ।”

²⁴“तुमुलै औज़ौ बोलाऊ कि ऊंटा रै सिउणी री पाशी बाटीऐ डेउणौ आसान आ। तेथकु भी कठिण आ सेठ लोगु लै आपणै ज़िवा दी राज़ कौरणै दैणौ।”

²⁵इणौ शुणियौ च़ेलेउऐ भौरी हैरान हुइयौ बोलौ, “तैबै कासरौ छ़ुटकारौ हुई बौल़ा सा?”

²⁶यीशुऐ तेस आदमी भिलै देखीयौ तेसलै बोलौ, “लोगु कौरी ता इणौ नाईं हुई बौल़दौ, पर परमेश्‍वरा कौरी सारौ कुछ़ हुई बौल़ा आ।”

²⁷एथ माथै पतरसै यीशु लै बोलौ, “देख, आमै ता आपणौ सारौ कुछ़ छ़ाड़ियौ ताऊं पिछ़ु हुई गौऐ आ: ता आमुलै का मिला सा?”

²⁸यीशुऐ तिउंलै बोलौ, “हाऊं तुमुलै सौच़्च़ौ बोलाऊ कि नौईं सृष्टी दी ज़ेबी आदमी रौ छ़ोहरु आपणी महिमा रै राज़गादी माथै बोशा लौ, ता तुमै भी ज़ो मुं पिछ़ु आ, बाराह राज़गादी माथै बोशियौ इस्राइला रै बाराह गोत्रा रौ फैसलौ कौरालै।

²⁹और ज़ुणी कुणिऐ घौर, भाई, बौइणी, या मां, आपणै लोल़डै, धुरै डोखरै मैरै नाऊं कालै छ़ाड़ी गौऐ आ, तेसलै शौ गुणा मिला सा, और सेऊ सौदा री ज़िन्दगी रौ हक्कदार हुआ।

³⁰भौरी लोग इणै ई ज़ुण आपुलै बौड़ै बौणा ई। ज़ेबी हाऊं राज़ौ बौणीयौ आशु लै तेबी सै लोग छ़ोटै हुआई। ज़ुण आपुलै छ़ोटै सौमझ़ा ई सै हुआई बौड़ै।”