Read Pahari, Mahasu मत्ती 20 Bible Online

मत्ती 20 - Pahari, Mahasu bible

मत्ती 20

¹“सौरगा रौ राज़ एक घौरा रै मालिका ज़िणौ आ, ज़ो दोअती निकल़ौ और आपणै अंगुरा रै बौगिच़ै दी मज़दूर लाऐ।

²तिणीऐ मज़दुरा कै एक दिना री दिहाड़ी देइयौ कामा माथै लाऐ और सै आपणी अंगुरा रै बौगिच़ै दी भेज़ै।

³तैबै तिणी मालिकै कौलियारी कु पैहलै कुछ़ लोग बज़ारा दी बेलै खौड़ै देखै,

⁴और तिणी मालिकै बोलौ, ‘तुमै भी अंगुरा रै बौगिच़ै दी डैऔ, और ज़ो कुछ़ ठीक आ, तुमुलै दिआऊ।’ तैबै सै भी कामा कौरदै डेवै।

⁵तैबै तिणी मालिकै कौलियारी टौल़ियौ दुजै और च़िज़ै पहरा रै नज़दीका दी निकल़ियौ तिणौ ई कियौ।

⁶दिना रौ एक घंटौं रौइयौ तिणीऐ औज़ौ डेइयौ दुजै आदमी खौड़ै देखै, और तिणीऐ तिउंलै बोलौ, ‘तुमै कैलै इदै पुरै दिना दी बेलै खौड़ै रौऐ औन्दै? तिंउऐ तेसलै बोलौ, एथलै कि कोइऐ भी आमै कामा कौरदै नाईं निऐं।’

⁷तिणी मालिकै तिउंलै बोलौ, ‘तुमै भी अंगुरा रै बौगिच़ै दी डैऔ और तिऐ काम कौरौ।’

⁸‘ब्याल़ी अंगुरा रै बौगिच़ै रै मालिकै आपणै खज़ानच़ी लै बोलौ, मज़दुरा लै औटाइयौ पिछ़लै कु और पैहलै झ़ांऊ तिउंलै मज़दुरी दै।’

⁹ज़ैबै सै आशै ज़ुणिऐ एकी दिना दी एका घंटौ लाऔ थौ, ता तिउंलै पुरै दिना री दिहाड़ी मिली।

¹⁰ज़ो पैहलै आशै औन्दै थै तिंउऐ सौमझ़ौ कि आमुलै भौरी मिला सा, पर तिउंलै भी पुरै दिना री दिहाड़ी मिली।

¹¹ज़ेबी मिलौ ता सै घौरा रै मालिका लै कुड़कुड़ाइयौ बोलदै लागै,

¹²‘इऊं पिछ़लै ता एक ई घंटै दी काम किऔ, ताइंऐ तिउंकै आमारै बराबर ई दिहाड़ी देई, आमुऐ पुरै दिनै रौ भार च़ुंगौ और ताती रूड़ सैहन की?’

¹³मालिकै तिऊं मांझ़िऐ कु एकी लै ज़वाब दैऔ, ‘ओ गोश्टण, हाऊं ताऊं आइलै कुछ़ अन्याय नाईं कौरदौ। का ताइंऐ मुकु एक दिना री दिहाड़ी नाईं मांगी थी?

¹⁴ज़ो तेरी दिहाड़ी आ, तेस च़ुंग और डेऊ। मेरी मौरज़ी आ कि ज़ेती ताउंलै दैऔ तेती ई इऊं पिछ़लै लै भी दैऔ।

¹⁵का इणौ ठीक नाईं कि हाऊं आपणै रुपाऐ-पैसै आइलै ज़िणौ च़ाऊ तिणौ कौरु? का मैरै भौलै हुणा री वज़ाह कु तू बुरी नौज़री कौरी देखा ई?’

¹⁶एज़ी रीती कु ज़ो पिछ़लै ई, सै पैहलै हुआई। और ज़ो पैहलै ई, सै पिछ़लै हुआई।”

¹⁷यीशु यरुशलेमा लै डेउंदी बारै आपणै बाराह च़ेलै एखुलै दी निऐं, और बाटा दी तिउंलै बोलदै लागौ,

¹⁸“शुणौ, आमै यरुशलेमा लै ई डेउंदै लागै औन्दै। और आदमी रौ छ़ोहरु बौड़ै याजकु और शास्त्रिउ रै हाथा दी पकड़वाइआ, और सै तेस च़ोरिऐ पाकड़ाई।

¹⁹और तेस दुजी ज़ाती रै हाथा दी दिआई कि सै तेसरौ मज़ाक उड़ावा, और तेसदी कोड़ै ला, और तेस क्रुसा माथै च़ड़ावा ई, और सेऊ चिजै दिनै ज़िउंदौ हुआ सा।”

²⁰तैबै जबदी रै छ़ोहरु री मांऐ, आपणै छ़ोहरु आइलै यीशु काऐ आशीयौ तेसकै ढाल की, और तेसकु कुछ़ मांगदै लागी।

²¹यीशुऐ तिंया लै बोलौ, “तू का च़ाहा ई? तिऐं यीशु लै बोलौ, ‘एस वचन दै कि मैरै इऐ दुई छ़ोहरु तैरै राज़ा दी एक तेरी सुल़टी भिलै दुजौ तेरी उल़टी भिलै बोशा।’ ”

²²यीशुऐ तिंआलै ज़वाब दैऔ, “तू नाईं ज़ाणदी कि तू का मांगा ई। ज़ो दु:ख हाऊं सहन कौरणै वाल़ौ ऊ, का तुमै भी सहन कौरी बौल़ा ई?” तिंउऐ यीशु लै बोलौ, “सौही बौल़ी ई।”

²³यीशुऐ तिउंलै बोलौ, “तुमैं मुं ज़िणै दु:ख ता उठावा लै, पर आपणै सुल़टी और उल़टी भिलै कासी बोशाल़नौ मैरौ काम नाईं, पर ज़ास कालै मैरै बाबा री तौरफा कु तैयार किऔ औन्दौ आ, तिऊं ई कालै आ।”

²⁴इणौ शुणियौ दस च़ेलै रै तिऊं दुई भाई माथै रोश आशै।

²⁵यीशुऐ सै आपु काऐ औटाऐ और तिउंलै बोलौ, “तुमै ज़ाणाई कि दुजी ज़ाती रै आफसर तिऊं माथै हक्क कौरा ई। और ज़ो बौड़ै ई, सै तिऊं माथै हक्क च़लावा ई।

²⁶पर तुमु मांझ़िऐ इणौ नाईं औलौ। पर ज़ुण-कुण तुमु मांझ़िऐ बौड़ौ हुणौ च़ाहा, सेऊ तुमारौ नुकुर बौणा।

²⁷और ज़ो तुमु मांझ़िऐ परधान हुणौ च़ा सा, सेऊ तुमारौ नुकुर बौणा।

²⁸ज़िणौ कि आदमी रौ छ़ोहरु। सेऊ एथीलै नाईं आशौ कि तेसरी सेवा टहल कौरौ, पर एथीलै आशौ आ कि आपु ई सेवा टहल कौरा, और सौभी रौ छ़ुटकारौ कौरना लै आपणै प्राण दिआ।”

²⁹ज़ेबी सै यरीहो कु निकुल़दै थै लागै औन्दै, ता एक भौरी भीड़ यीशु पिछ़ु हुई गोई।

³⁰और दुई शेड़ै ज़ो बाटा दी एकी भिलै थै बोशै औन्दै, इणौ शुणियौ कि यीशु इदरा बाटी डेउंदै लागौ औन्दौ, हाकै मारीयौ औटाइंदै लागै, “ओ यीशु, राज़ै दाऊदा री खानदानी रौ, आमु माथै दया कर।”

³¹लोगुऐ सै धौमकाऐ कि च़ुटुक थाकौ, पर सै औज़ौ भी ज़ोरै हाकै मारीयौ बोलदै लागै, “ओ प्रभु, दाऊदा रौ छ़ोहरु आमु माथै दया कर।”

³²तैबै यीशुऐ टेकियौ, सै औटाऐ और बोलौ, “तुमै का च़ाहा ई कि हाऊं तुमुलै कौरु?”

³³तिंउऐ यीशु लै बोलौ, “ओ प्रभु, इणौ कि आमारी आखी खुला ली।”

³⁴यीशु रै तिऊं शेड़ै माथै दया आशी और तिऊं री आखी छ़ुईं, और सै शेड़ै तेबी देखदै लागै। और तेथ बासिऐ सै यीशु पिछ़ु आण्डदै लागै।