Read Pahari, Mahasu मत्ती 21 Bible Online

मत्ती 21 - Pahari, Mahasu bible

मत्ती 21

¹ज़ैबै यीशु और तेसरै च़ेलै यरुशलेमा रै नज़दीक पौउंच़ै और जैतूना री पहाड़ी माथै बैतफगे काऐ आशै, ता यीशुऐ दुई च़ेलै इणै बोलीयौ भेज़ै,

²“सामनै वाल़ै गांवा दी डैऔ। तिऐ पौउंच़िऔ ई तुमुकै एक गादी मिला खुंटी दी बानी औन्दी, और तिंया आइलै तियांरौ गौधेटु मिला। तिऊं खोलियौ मुं काऐ आणौ।

³अगर तुमु आइलै कोई कुछ़ बोलालै, ता तुमै बोलेऊ प्रभु कै एसरी ज़ुरत आ, तैबै सेऊ तेबी भेज़ा”

⁴इणौ एथलै हुऔ कि ज़ो वचन पुराणै ज़मानै रै गुरु रै तौरफा कु बोलौ औन्दौ थौ सेऊ पुरौ हुआ:

⁵“सिय्योना री छ़ोटुड़ी कु बोलौ, ‘देख, तैरौ राज़ौ ताऊं काऐ आशौ आ: सेऊ नीउलौ आ, और गौधेटु माथै बोशौ औन्दौ आ: पर गादी रै मांऊ माथै।’ ”

⁶च़ेलेउऐ डेइऔ, ज़िणौ यीशुऐ तिउंलै बोलौ थौ, तिणी ई किऔ।

⁷और गादी और तिंयारौ गौधेटु आणौ, तिऊं माथै आपणै जुड़कै छ़ाड़ै, और यीशु तेस माथै बोशी गौ।

⁸तैबै भौरी लोगुऐ आपणै जुड़कै बाटा दी बिछ़ाऊंदै लागै, और कुछ़ लोगुऐ पेड़ा रै शाऊंटै काटियौ बाटा दी बिछ़ाऐ।

⁹ज़ो भीड़ औगाड़िऐ और पिछ़ाड़िऐ आण्डदै थै लागै औन्दै, सै औटाइयौ बोलदै थै लागै औन्दै, “दाऊदा रै संताना री बौड़ाई हो होसाना, आशीष वाल़ौ ई तुमै ज़ो प्रभु रै नावां कौरीऐ आशै ई, सौरगा दी परमेश्‍वरा री बड़ाई हो होसाना।”

¹⁰ज़ैबै यीशु यरुशलेमा दी डैऔ, ता सारै शहरा दी हलचल माच़ी गोई, और लोग बोलदै लागै, “एऊ कुण आ?”

¹¹लोगुऐ बोलौ, “एऊ गलीला रै नासरता रौ गुरु यीशु आ।”

¹²यीशुऐ परमेश्‍वरा रै घौरा दी डेइयौ सै सौभी, ज़ो परमेश्‍वरा रै घौरा दी लेण-देण थै कौरदै लागै औन्दै, गाड़ी गौऐ, सर्राफो रै पीढ़ै और कबुतर बेच़णै वाल़ेऊ री रेढ़ी पौल्टी।

¹³और यीशुऐ बोलौ, “लिखौ औन्दौ आ, ‘मैरौ घौर प्राथना रौ घौर आ।’ पर तुमुऐ एऊ लुटणै वाल़ेऊ रौ आड्डौ चाणी गौ आ।”

¹⁴तैबै शेड़ै और लौंगड़ै, परमेश्‍वरा रै घौरा दी यीशु काऐ आशै, और यीशुऐ सै ठीक कियै।

¹⁵पर ज़ैबै बौड़ै याजकु और शास्त्रिउऐ एज़ै हैरान कौरणै वाल़ै काम, ज़ो यीशुऐ कियै, और छ़ोहरुऐ परमेश्‍वरा रै घौरा दी दाऊदा री संताना लै “होसाना” औटाउंदै बारै देखै, ता तिंउरै रोश आशी गोऐ,

¹⁶और यीशु लै बोलदै लागै, “का तू शुणाई कि इऐ का बोलाई?” यीशुऐ तिउंलै बोलौ, “ओ। का तुमुऐ इणौ केबी नाईं पौड़ौ, ‘लोल़ड़ै और दूध पिणै वाल़ै मांऊ कु ताइंऐ अपार स्तुति कौरा ई।’ ”

¹⁷तैबै यीशु तिऊं छ़ाड़ियौ तेस इलाकै कु बाइरै बैतनिय्याह लै डेवै और ब्याल़ी रौऔ तिदै ई।

¹⁸दोअती ज़ैबै यीशु इलाकै कु डेउंदै थौ लागौ औन्दौ ता यीशु रै भूख लागी।

¹⁹बाटा दी यीशुऐ एकी भिलै फेड़ु रौ एक पेड़ देखौ और सेऊ तेस पेड़ा काऐ डैऔ, और पेड़ा दी पाचा छ़ाड़ियौ और कुछ़ नाईं थौ और तेसलै बोलौ, “आज़ा कु पोरु ताऊं दी केबी फल़ नाईं लागदै।” और फेड़ु रौ पेड़ खरकच़ार शुकी गौ।

²⁰इणौ देखीयौ च़ेलै हैरान हुऐ और तिंउऐ बोलौ, “एऊ फेड़ु रौ पेड़ खरकच़ार किणौ शुकी गौ?”

²¹यीशुऐ तिउंलै ज़वाब दैऔ, “हाऊं तुमुलै सौच़्च़ौ बोलाऊ, अगर तुमै विश्वास छ़ाड़ा और शौक नाईं कौरालै, ता ना सिरफ इणौ कौरालै ज़ो एस फेड़ु रै पेड़ा लै किऔ आ, पर अगर एस पहाड़ी लै बोलालै, ‘तू उठ, और समुन्दरा दी डेऊ,’ ता इणौ हुआई।

²²और ज़ो तुमै प्राथना दी विश्वासा कौरी मांगा ई सेऊ सौभी तुमुलै मिला सा।”

²³यीशु परमेश्‍वरा रै घौरा दी शिक्षा दैंदै थौ लागौ औन्दौ, ता बौड़ै याजक और स्याणै लोग यीशु काऐ आशै और बोलदै लागै, “तू इणै काम केज़ै हक्‍का कौरी कौरा ई? और ताउंकै एज़ौ हक्क कुणिऐ दैऔ आ?”

²⁴यीशुऐ तिउंलै ज़वाब दैऔ, “हाऊं भी तुमु कु एक सवाल पुछ़ाऊ। अगर तुमै मुकै ज़वाब दिआ लै, ता हाऊं भी तुमुकै बोलाऊ कि इणै काम कासरै हक्क कौरीऐ कौराऊ।

²⁵यहुन्ना रौ बपतिस्मौ किदरु कु थौ? सौरगा री तौरफा कु या आदमी री तौरफा कु?” तैबै सै आपु माझ़ियै चौपड़ीदैं लागै, “अगर आमै बोलु लै ‘सौरगा री तौरफा कु,’ ता एऊ आमुकु बोला, ‘तैबै तुमुऐ तेस माथै विश्वास कैलै ना कियौ?’

²⁶और अगर आमै बोलु लै ‘आदमी री तौरफा कु,’ ता आमुलै भीड़ा रौ डौर आ, कैलैकि इऐ सौभी यहुन्ना भविष्यवक्ता माना ई।”

²⁷तैबै इउंऐ यीशु लै ज़वाब दैऔ, “आमै नाईं ज़ाणदै।” यीशुऐ भी तिउंलै बोलौ, “ता हाऊं भी नाईं बोलदौ कि एज़ौ काम केज़ै हक्‍का कौरीऐ कौराऊ।”

²⁸“तुमै का सौमझ़ा ई? कास आदमी रै दुई छ़ोहरु थै। तिणीऐ पैहलै छ़ोहरु लै बोलौ, ‘ओ छ़ोहरु, आज़ अंगुरा रै बौगिच़ै दी काम कर।’

²⁹तिणी छ़ोहरुऐ ज़वाब दैऔ, ‘हाऊं नाईं डेउंदौ,’ पर बासिऐ पछ़ताइऔ डैऔ।

³⁰तैबै सेऊ दुजै छ़ोहरु काऐ डेइयौ तिणौ ई बोलौ, तिणी दुजै छ़ोहरुऐ बोलौ, ‘ओ हाऊं डिआऊ,’ पर नाईं डैऔ।

³¹इऊं दुई मांझ़िऐ कु कुणिऐ बाबा री इच़्छ़ा पुरी की? तिंउऐ बोलौ, ‘पैहलै।’ ” यीशुऐ तिउंलै बोलौ, “हाऊं तुमुलै सौच़्च़ौ बोलाऊ कि मामलै निणै वाल़ै और गान्दै काम कौरणै वाल़ै तुमु कु पैहलै परमेश्‍वरा रै राज़ा दी डिआई।

³²कैलैकि यहुन्ना भौलाई री बाटा देखाउंदै तुमु काऐ आशौ, और तुमुऐ तेस माथै विश्वास ना कियौ। पर मामलै निणै वाल़ेउऐ और गान्दै कामा कौरणै वाल़ेउऐ तेसरी बुशु माथै विश्वास कियौ और तुमै इणौ देखीयौ बासिऐ भी नाईं पछ़ताऐ कि तेसरौ विश्वास कौरा थै।

³³“एक औज़ौ औनैणौ शुणौ: एक घौरा रौ मालिक थौ तिणीऐ अंगुरा रौ बौगिच़ौ लाऔ, तेसरै च़ारौ तौरफा दी तारबाड़ लाऔ, तेस बौगिच़ै दी एकी भिलै अंगुरा रै रस गाड़ने री ज़ागाह भी चाणी और छ़ोटी ज़ेई छ़ानी भी चाणी, और तेसरौ ठेकौ ज़िमदारु कै देइयौ आपु डैऔ परदेशा लै।

³⁴ज़ैबै अंगुरा चोड़णै रौ बौगत आशौ, ता तिणी मालिकै आपणै नुकुरा लै फल़ आणना लै ज़िमदारु काऐ भेज़ै।

³⁵पर ज़िमदारुऐ तेसरै नुकुर पाकड़ियौ, केज़ै पिटै, और केज़ै झ़ांगै पोरु, और केज़ै ढोल़ियाऐ।

³⁶तैबै तिणी मालिकै पैहलै कु भौरी औज़ौ नुकुर भेज़ै, और तिंउऐ तिऊं आइलै भी तिणौ ई कियौ।

³⁷बासिऐ तिणी मालिकै आपणौ छ़ोहरु तिऊं काऐ इणौ सुंच़ीयौ भेज़ौ कि सै मैरै छ़ोहरु री इज़्ज़त कौरालै।

³⁸पर ज़िमदारुऐ सेऊ छ़ोहरु देखीयौ आपु मांझ़िऐ चौपड़िंदै लागै, ‘एऊ ता एस बौगिच़ै रौ मालिक आ, आशौ, आमै एस पोरु झ़ांगी, ताकी एऊ बौगिच़ौ आमारौ हुआ।’

³⁹तैबै तिंउऐ सेऊ छ़ोहरु पाकड़ौ और सेऊ अंगुरा रै बौगिच़ै कु बाइरै गाड़ीयौ पोरु झ़ांगौ।

⁴⁰एथीलै ज़ेबी बौगिच़ै रौ मालिक आशा लौ, ता तिऊं ज़मीदारु आइलै का कौरा?”

⁴¹तिंउऐ तेसलै बोलौ, “सेऊ तिऊं लोग पोरु झ़ांगा और अंगुरा रौ बौगिच़ौ ओरी लोगु कै सौंभाल़ा, ज़ो बौगतै माथै तेसलै फल़ दिआ कौरा।”

⁴²यीशुऐ तिउंलै बोलौ, “का तुमुऐ केबी पवित्रशास्त्रा दी इणौ नाईं पौढ़ौ कि: ‘ज़ेज़ौ पात्थर मिस्त्रिऐ बेकार ज़ाणौ थौ, सेज़ौ पात्थर कुणे दी लागणै वाल़ौ बौणौ? एज़ौ काम परमेश्‍वरा री तौरफा कु हुऔ, और एज़ौ आमारी नौज़री दी नोखौ आ।’

⁴³एथीलै हाऊं तुमुलै बोलाऊ कि परमेश्‍वरा रौ राज़ तुमु कु नींई बौल़िया आ और इणी ज़ाती लै ज़ो तेसरौ फल़ आणा, देई आ।

⁴⁴ज़ो एस पात्थरा माथै पौड़ालौ, सेऊ च़ूर-च़ूर हुआ। और ज़ास माथै सेऊ पात्थर पौड़ालौ, सेऊ पिशीया पोरु पा।”

⁴⁵बौड़ै याजकु और फरीसी लोग यीशु रै औनैणौ शुणिऐ सौमझ़ी गौऐ कि सेऊ तिंउरै बारा दी बोला आ।

⁴⁶और तिंउऐ यीशु पाकुड़नौ च़ाऔ, पर सै लोगु कु डौरी गौऐ कैलैकि सै यीशु भविष्यवक्ता माना थै।