Read Pahari, Mahasu मत्ती 28 Bible Online

मत्ती 28 - Pahari, Mahasu bible

मत्ती 28

¹आरामा रै दिना बासिऐ हौफ्तै रै पैहलै दिनै दोअती कांडै प्याशिदैं ई मरियम मगदलीनी और दुजी मरियम ओडाच़ी देखदै आशी।

²और देखौ, एक बौड़ौ भूइंच़ल़ आशौ, कैलैकि प्रभु रौ एक दूत सौरगा कु उतरौ और तिऐ आशीयौ सेऊ पात्थर तिदरा कु पोरु घिसराऔ, और तेथ माथै बोशी गौ।

³तेस दूतै रौ रूप बिज़ल़ी ज़िणौ और तेसरै जुड़कै च़ौमकिलै थै।

⁴तेसरै डौरा कु पैहरैदार कांबदै लागै, और धौनी लोटै ज़िणै मौरै औन्दै ई।

⁵सौरगदूतै तिऊं छ़ेउड़ी लै बोलौ, “नाईं डौरौ, हाऊं ज़ाणाऊ कि तुमै यीशु लोड़दै ई लागै औन्दै ज़ो क्रुसा माथै थौ च़ड़ाऔ औन्दौ।

⁶सेऊ इदै नाईं आ, पर तेसरै वचना रै मुताबिक ज़िउंदौ हुई ऐरौ आ। आशौ, इऐं ज़ागाह देखौ, ज़िऐ प्रभु थौ छ़ाड़ौ औन्दौ,

⁷और तुमै फेटी डैऔ यीशु रै च़ेलेउलै बोलौ कि यीशु मौरै औन्दै मांझ़िआ कु मानदौ हुई ऐरौ आ, और सेऊ तुमु कु पैहलै गलीला दी डेई ऐरौ सा, तिऐ तुमै तेस देखा ई! शुणौ, मुंइऐ तुमुलै बोली ऐरौ आ।”

⁸सै घबराइयौ और बौड़ी खुशी आइलै तिदरा कु फेटी डेइयौ तेसरै च़ेलेउलै एज़ी बुशै बोलणै लै दौड़ी गोई।

⁹तैबै यीशु तिउंकै मिलौ। और बोलौ, “ढाल”। तिंउऐ यीशु काऐ आशीयौ और तेसरै लात पाकड़ियौ ढाल की।

¹⁰तैबै यीशुऐ तिउंलै बोलौ, “नाईं डौरौ। मैरै च़ेलेऊ कै डेइयौ बोलौ कि गलीला परदेशा लै डैऔ, तिऐ मुं देखाल़ै”

¹¹सै छ़ेउड़ी डेउंदै ई थै लागी ऐन्दी कि पैहरैदार मांझ़िऊ कु कुछ़ इलाकै दी आशीयौ पुरौ हाल बौड़ै याजकै कै शुणाऔ।

¹²तैबै सै बौड़ै याजक स्याणै गुरु आइलै कौठै हुइयौ चौपड़ुऐ और सिपाईउ लै भौरी च़ांदी देइयौ बोलौ,

¹³“सारेऊ कै इणौ बोलणौ कि राची ज़ैबै आमै सुतै औन्दै थै, ता तेसरै च़ेलेउऐ सेऊ च़ोरिऐ नियौं।

¹⁴और अगर तुमारै सुतणै री बुशै पिलातुस आफसरा रै कौन्थु झ़ांऊ पौउंच़ाली, ता आमै तेस सौमझ़ाई और आमै तुमु मुश्कल़ा कु बौच़ाई।”

¹⁵तैबै तिंउऐ रुपाऐ देइयौ ज़िणौ तिउंकै शिखाऔ औन्दौ थौ, तिणी ई कियौ। एज़ी बुशै आज़ा झ़ांऊ यहुदिऊ दी मशूर आ।

¹⁶ग्यारह च़ेलै गलीला री तिंया टिरा माथै डेवै, ज़ो यीशुऐ तिउंकै बोलौ थौ।

¹⁷तिंउऐ यीशु देखीयौ तेसलै ढाल की, पर कोइयै तेस माथै विश्वास नाईं कियौ कि सेऊ ज़िउंदौ हुई गौ आ।

¹⁸यीशुऐ तिऊं काऐ आशीयौ बोलौ, “सौरग और धौतरी रौ सारौ हक्क मुकै आ दैऔ औन्दौ।

¹⁹एथीलै तुमै डैऔ, सारी ज़ाती रै लोगु च़ेलै चाणौ। और तिउंलै बाब, छ़ोहरु, और पवित्र आत्मा रै नावां कौरी बपतिस्मौ दैऔ,

²⁰और तिउंकै सारी बुशै ज़ो मुंइऐ तुमुलै हुकम दैऔ आ, मानणौ शिखाऔ और शुणौ, हाऊं धौतरी रै आखरी झ़ांऊ तुमु आइलै सौदा रौआऊ।”