Read Pahari, Mahasu मत्ती 4 Bible Online

मत्ती 4 - Pahari, Mahasu bible

मत्ती 4

¹तैबै पवित्र आत्मै यीशु शुनशान ज़ागाह दी नियौं ताकी शैताना तेस पौरखा।

²यीशु चालिस दीन और चालिस राची भुखौ रौ, तैबै तेसकै भूख लागी।

³तैबै शैतानै नज़दीक आशीयौ तेसलै बोलौ, “अगर तू परमेश्‍वरा रौ छ़ोहरु ई, ता बोल, की इऐ पात्थर रोटी बौणा।”

⁴यीशुऐ ज़वाब दैऔ, “पवित्रशास्त्रा दी आ लिखौ औन्दौ, ‘आदमी सिरफ रोटी ई कौरी नाईं, पर परमेश्‍वरा रै बोलै औन्दै हर एकी वचन मानियौ, ज़िउंदौ रौआ लौ।’ ”

⁵तैबै शैतानै यीशु पवित्र शहर यरुशलेमा दी निऔं और तिऐ परमेश्‍वरा रै घौरा रै छ़ापरा माथै खौड़ौ कियौ

⁶और तेसलै बोलौ, “अगर तू परमेश्‍वरा रौ छ़ोहरु ई ता इदरु तौल़ै फाल़ दै। कैलैकि पवित्रशास्त्रा दी इणौ आ लिखौ औन्दौ तैरै बारै दी, ‘कि परमेश्‍वर आपणै दूता लै हुकम दिया कि सै ताऊं हाथा-हाथा दी च़ुंगा ई ताकी तैरै बांगणै दी पात्थरा कु ठोकर ना लागा।’ ”

⁷यीशुऐ तेसलै बोलौ, “पवित्रशास्त्रा दी इणौ भी आ लिखौ औन्दौ, ‘तू प्रभु आपणौ प्रभु परमेश्‍वर नाईं पौरखै।’ ”

⁸तैबै शैतानै यीशु एक भौरी उंच़ै पहाड़ा माथै निऔं और धौतरी रौ सारौ राज़ और तेथरौ ठाठ-बाठ देखाल़ियौ,

⁹तेसलै बोलौ, “अगर तू मुकै झुकियौ ढाल कौरालौ, ता हाऊं एस सारौ कुछ़ ताउंकै दिआऊ।”

¹⁰तैबै यीशुऐ तेसलै बोलौ, “ओ शैतान दूर डेऊ, कैलैकि पवित्रशास्त्रा दी आ लिखौ औन्दौ कि, ‘तू प्रभु आपणै परमेश्‍वरा कै झुकियौ ढाल कर, और सिरफ तेसी री भौक्ती कर।’ ”

¹¹तैबै शैतान तेस काऐ कु डेई गौ, सौरगदूत तेस काऐ आशीयौ यीशु री सेवा कौरदै लागै।

¹²ज़ेबी यीशुऐ इणौ शुणौ की यहुन्ना कैदा दी पाई गौ, ता सेऊ यहुदिया परदेशा छ़ाड़ियौ गलील परदेशा रै नासरता गांवा दी आशौ।

¹³और तैबै नासरत गांवा छ़ाड़ियौ कफरनहूम गांवा दी डेइऔ रौउंदै लागौ, ज़ो झ़िला रै डिका काऐ जबूलून और नप्ताली रै इलाकै दी सा।

¹⁴ताकी ज़ो यशायाह भविष्यवक्ता रै ज़ौरिऐ बोलौ औन्दौ थौ, सेऊ पुरौ हुआ।

¹⁵“जबूलून और नप्ताली रै इलाकै, झ़िला री बाटा कु यरदना नौईं पार, दुजी ज़ाती रौ गलील

¹⁶ज़ो लोग न्यारै दी बोशै औन्दै थै, तिंउऐ बौड़ौ प्याशौ देखौ। और ज़ुण लोग मौउती रै डौरा दी थै ज़िउंदै लागै औन्दै, तिऊं माथै प्याशौ च़ौमकौ।”

¹⁷सेज़ै बौगता कु यीशुऐ परचार कौरणौ और इणौ बोलणौ शुरु कौरी गौ कि, “सारै लोग आपणै-आपणै पापा कु माफी पाइणा लै बुरै कामा कु मन बौदल़ौ। कैलैकि सौरगा रौ राज़ नज़दीक आशी गौ आ।”

¹⁸यीशुऐ गलीला री झ़िला रै डिका काऐ घुमदै दुई भाई देखै ज़ासरै नाऊं शमौन ज़ासलै पतरस बोलाई, और तेसरौ भाई आन्द्रियास झ़िला दी ज़ाल़ पाइंदै देखै। कैलैकि सै झ़ींवर थै।

¹⁹यीशुऐ तिउंलै बोलौ, “मुं पिछ़ु आशौ, ता हाऊं तुमु लोगु मुं काऐ आणनै वाल़ै चाणाऊ।”

²⁰सै खरकच़ार ज़ाल़ा छ़ाड़ियौ यीशु पिछ़ु हुई गौऐ।

²¹तिदरु आगुड़ै डेइयौ, यीशुऐ तौंइऐ दुई भाई जबदी रै छ़ोहरु याकूब और तेसरौ भाई यहुन्ना देखौ। सै आपणै बाब जबदी आइलै किश्ती दी आपणै ज़ाल़ ठीक कौरदै थै लागै औन्दै। यीशुऐ सै भी औटाऐ।

²²सै खरकच़ार किश्ती और आपणौ बाब छ़ाड़ियौ तेस पिछ़ु हुई गौऐ।

²³यीशु सारै गलील परदेशा दी डेइयौ तिउंरी आराधनालय दी शिक्षा दैंदै, और राज़्य रौ परचार कौरदै, और लोगु री हर बिमारी और लाच़ारी दूर कौरदै लागौ।

²⁴और सारै सीरिया परदेशा दी यीशु री महिमा फैअली गोई। और लोग सारी बिमारी, ज़ो कई रौंगा री बिमारी और दुखा दी पौड़ै औन्दै थै, और ज़ासदी बुरी आत्मा थी, और मिर्गीवाल़ै और इणै आदमी ज़ासरै ज़िसमा रौ केज़ौ भी आंग नाईं हिला थौ, यीशु काऐ आणै और यीशुऐ सै ठीक किऐ।

²⁵गलील परदेश और दिकापुलिस इलाकै, यरुशलेम शहर, यहुदिया परदेश और यरदन नौईं रै पारा कु भीड़ा री भीड़ यीशु पिछ़ु हुई गोई।