Read Pahari, Mahasu मत्ती 8 Bible Online

मत्ती 8 - Pahari, Mahasu bible

मत्ती 8

¹ज़ेबी सेऊ तेस पहाड़ा कु तौल़ै उतरौ, ता एक बौड़ी भीड़ तेस पिछ़ु हुई गोई।

²और देखौ, एक कोढ़ीऐ नज़दीक आशीयौ यीशु रै बांगणै बौंधियौ औरज़ कौरदै लागौ कि, “ओ प्रभु अगर तू च़ाहा लौ ता मुं च़ांगौ कौरी बौल़ा ई।”

³यीशुऐ तेस कोढ़ी भिलै आपणै हाथा बड़ाइयौ सेऊ छ़ुंऔ और तेसलै बोलौ, “हाऊं च़ाहा ऊ कि तू च़ांगौ च़ांई हुऔ।” और तेबी ई तेसरौ कोढ़ ठीक हुऔ।

⁴यीशुऐ तेसलै बोलौ, “देख, कासी कै नाईं बोलै, पर डेऊ याजका काऐ देखाल़ और ज़ो परमेश्‍वरा रै आपणै सेवक मुसा रै ज़ौरिऐ ज़ेज़ै नियम ई दैऔ औन्दै तिऊं अपणाइयौ बौल़ी च़ौड़ाऊ ताकी सै तैरै बारै दी लोगु काऐ बोला कि च़ांगौ और शुद्ध हुई गौ आ।”

⁵ज़ेबी यीशु कफरनहूम गांवा दी आशौ ता एकी रोमी आफसर ज़ुण शौ फौज़ीऊ रौ मुख्यौ थौ, यीशु काऐ आशीयौ तेसकु औरज़ की,

⁶“ओ प्रभु, मैरौ नुकुर घौरा दी भौरी बिमार पौड़ौ औन्दौ आ ज़ासकै आपणै ज़िस्मा रौ केज़ौ भी आंग नाईं हिलाइंदौ।”

⁷यीशुऐ तेसलै बोलौ, “हाऊं आशीयौ तेस ठीक कौराऊ।”

⁸रोमी आफसरै ज़वाब दैऔ, “ओ प्रभु, हाऊं इणै लायक नाईं कि तू मैरै घौरा कै आश कैलैकि हाऊं यहुदी नाईं ऊ, पर सिरफ आपणै मुंआ कु बोल ता मैरौ नुकुर ठीक हुआ सा।

⁹हाऊं ज़ाणाऊ कैलैकि हाऊं भी एक आफसर ऊ, मुकै हक्क आ और कई सिपाही मैरै हाथा दी ई ज़ेबी हाऊं एकी लै, बोलाऊ ‘आश!’ तैबै सेऊ आशा सा। और दुजै लै बोलु लौ कि, ‘डेऊ!’ तैबै डेवा सा, अगर आपणै कास नुकरा लै बोलु लै कि ‘इणौ कर!’ तैबै सेऊ तिणी कौरा सा।”

¹⁰इणौ शुणियौ यीशु कै हैरानी हुई, और ज़ो यीशु पिछ़ु थै आशदै लागै औन्दै तिऊं लै बोलौ, “हाऊं तुमुलै सौच़्च़ौ बोलाऊ कि मुंइऐ इस्राइला रै लोगु मांझ़िऐ इणौ विश्वास नाईं देखौ।

¹¹और हाऊं तुमुलै बोलाऊ पुरी दुनिया कु दुजी ज़ाती रै लोग आशीयौ अब्राहम और इसहाक और याकुबा आइलै सौरगा रै राज़्य दी बोशाल़ै।

¹²पर इस्राइली लोग बाइरै न्यारै दी पाइणै ई तिऐ लेरणौ और दांदा रौ चाकणौ औलौ।”

¹³तैबै यीशुऐ आफसरा लै बोलौ, “घौरै डेऊ, ज़िणौ तैरौ विश्वास आ, तिणी ई ताउंलै औआ।” और तेसरौ नुकुर तेबी ई ठीक हुई गौ।

¹⁴ज़ेबी यीशु पतरसा रै घौरै आशौ, ता यीशुऐ तेसरी शाशु बुखारा कौरी बिमार पौड़ी औन्दी देखी।

¹⁵यीशुऐ तियांरौ हाथ छुंऔ और तियांरौ बुखार उतरी गौ, और सै उठीयौ यीशु री सेवा कौरदै लागी।

¹⁶ज़ेबी ब्याल़ हुई तैबै सै यीशु काऐ भौरी लोगु आणदै लागै ज़ासदी बुरी आत्मा थी और यीशुऐ सै आत्मा आपणै वचना कौरै गाड़ी गोई। और सारै बिमार लोग च़ांगै किऐ।

¹⁷ताकी ज़ो वचन यशायाह भविष्यवक्ता रै ज़ौरिऐ बोलौ औन्दौ थौ सेऊ पुरौ हुआ, “तिणीऐ आपु ई आमारी कमज़ोरी नींई गोई और आमारी बिमारी उठाई गोई।”

¹⁸यीशुऐ ज़ेबी आपणै च़ारौ तौरफा दी एक बौड़ी भीड़ देखी ता आपणै च़ेलेऊ लै बोलौ कि च़ालौ आमै झ़िला पारभिलै डेई।

¹⁹तैबै एकी शास्त्रिऐ यीशु काऐ आशीयौ बोलौ, “ओ गुरु, तुमै च़ाऊ ज़ियै भी डेवा लै हाऊं तुमु पिछ़ु आशाऊ।”

²⁰यीशुऐ तेसलै बोलौ, “शालटा, रै रौइणा लै डौई हुआई और च़िड़ु-च़िटकेरु रै रौइणा लै कोल़ै हुआई। पर आदमी रौ छ़ोहरु हुइयौ भी मुकै सुतणा लै आपणौ घौर नाईं आसतौ।”

²¹एकी औज़ौ च़ेलै बोलौ, “ओ प्रभु, मुं पैहलै डेउणै दै ताकी हाऊं ज़ेबी मैरौ बाब मौरा लौ ता तेसरौ किरया करम कौरु तैबै आशाऊ तुमु पिछ़ु।”

²²यीशुऐ तेसलै बोलौ, “तू मुं पिछ़ु आश, और ज़ुण आत्मा दी मौरै औन्दै ई तिऊं आपणै मुर्देऊ रै किरया करम कौरणै दैऔ।”

²³ज़ेबी यीशु किश्ती दी च़ौड़ौ, ता तेसरै च़ेलै तेस पिछ़ु आशी गौऐ।

²⁴और देखौ, झ़िला दी एक इणौ बौड़ौ तुफान आशौ कि किश्ती पाणी कु भौरिंदै लागी, और यीशु सुतौ औन्दौ थौ।

²⁵तैबै च़ेलेउऐ नज़दीक डेइयौ यीशु उज़ीयाऔ और बोलौ, “ओ प्रभु, आमु बौच़ाऊ आमै नाश ई औन्दै लागै औन्दै।”

²⁶तिणीऐ तिउंलै बोलौ, “ओ अविश्वासी लोगुऔ, कैलै डौराई?” तैबै यीशुऐ उठीयौ बागुर और पाणी डांटै, और सब शान्त हुई गौ।

²⁷और सै हैरान हुईऔ बोलदै लागै, “एऊ किणौ आदमी आ कि बागुर और पाणी भी एसरौ हुकम माना ई।”

²⁸ज़ेबी यीशु पाराभिलै गदरैनियों रै देशा दी पौउंच़ौ, ता दुई आदमी ज़ासदी बुरी आत्मा थी कब्रा कु निकल़ै और यीशु कै मिलै। सै एती रोशा वाल़ै थै कि कोई भी सेज़ी बाटा दी नाईं डेई सौका थै।

²⁹तिंउऐ हाकै मारीयौ बोलौ, “ओ परमेश्‍वरा रै छ़ोहरु, आमारौ ताऊं कै का काम आ? का तू बौगता कु पैहलै ई आमुलै दुःख दैंदै आशौ ई?”

³⁰यीशु कु कुछ़ दूर भौरी का सुंगरा रौ एक शाल़ च़ौरदै लागौ औन्दौ थौ।

³¹बुरी आत्माऐं यीशु कु औरज़ कियै, “अगर तू आमु गाड़ाई, ता सुंगरा रै शाल़ा दी भेज़।

³²यीशुऐ तिउंलै बोलौ, ‘डैऔ!’ और सै निकल़ियौ सुंगरा दी डेई गौऐ और देखौ, सारौ गोल़ मातौल़ै दुड़ियौ झ़िला दी पौड़ै और डुबियौ पोरु मौरै।

³³तिऊं सुंगरु च़ारणै वाल़ै इणौ देखीयौ तिदरु पोरु भागै, और इलाकै दी डेइऔ इऐ सारी बुशै और ज़ासदी बुरी आत्मा थी तेसरौ सारौ हाल शुणाऔ।

³⁴तैबै सारै लोग यीशु काऐ मिलदै डेई गौऐ, और यीशु कु औरज़ कौरदै लागै कि आमारै इलाकै कु बाइरै डेऊ।”