Read Pahari, Mahasu मरकुस 12 Bible Online

मरकुस 12 - Pahari, Mahasu bible

मरकुस 12

¹तैबै यीशुऐ तिऊं यहुदी शास्त्री, बौड़ै याजक और स्याणै लोगु लै बोलौ, “इऐं काआणी शुणौ। एक आदमीऐ अंगुरा रौ बौगिच़ौ लाऔ। तेस बौगिच़ै रै च़ारौ तौरफा दी तारबाड़ लाऔ। और तिऐ बौगिच़ै दी एकी भिलै अंगुरा रै रस गाड़नै री ज़ागाह भी चाणी। और छ़ानी भी चाणी और तिऐ कामा कौरणै वाल़ेऊ कै ठेकौ देइयौ आपु कुछ़ बौगता लै दूर देशा लै डैऔ।

²ज़ेबी अंगुरा री फौसला रौ बौगत आशौ, तैबै तिणीऐ आपणौ एक नुकुर इणै बोलीयौ भेज़ौ कि, ‘ठेकेदारु काऐ डेइयौ अंगुरा री फौसला मांझ़िऐ कु मैरौ हिस्सौ आणै ओरु।’

³ज़ेबी सेऊ नुकुर ठेकेदारु काऐ आशौ तैबै तिऊं ठेकेदारुऐ पिटौ और खाली हाथै वापिस भेज़ौ।

⁴तैबै मालिकै दुजौ नुकुर भेज़ौ पर तेस नुकरा री तिंउऐ बेइज़्ज़ती कौरीयौ तेसरौ मूंड भानौ।

⁵तैबै मालिकै औज़ौ एक नुकुर भेज़ौ, सेऊ झ़ांगौ तिऊं ठेकेदारुऐ ज़िउंदौ पोरु। तिणीऐ भौरी नुकुर भेज़ै पर तिऊं मांझ़िऐ कु कुछ़ ई पिटै, कुछ़ ई झ़ांगै।

⁶ऐबै रौआ मालिका कै एका भेज़णा लै, सेऊ थौ तेसरौ छ़ोहरु। मालिकै आपणौ छ़ोहरु भी भेज़ौ। तिणीऐ ज़ाणौ कि, ‘सै ठेकेदार मैरै छ़ोहरु री इज़्ज़त कौरालै।’

⁷पर ज़ेबी ठेकेदारुऐ सेऊ छ़ोहरु देखौ आशदै ता सै आपु मांझ़ी चौपड़िंदै लागै कि, ‘एऊ ता बा इऐं ज़मीना रौ वारीस। आशौ, आमै एस पोरु झ़ांगी तैबै हुआ सा इऐ ज़बीन आमारी।’

⁸तिंउऐ सेऊ छ़ोहरु पाकड़ौ और झ़ांगीयौ बौगिच़ै कु बाइरै शोटौ।”

⁹तैबै यीशुऐ तिऊं यहुदी नेतेउ कु पुछ़ौ कि, “ऐबै सेऊ बौगिच़ै रौ मालिक का कौरा आ? सेऊ मालिक बौगिच़ै दी आशीयौ तिऊं ठेकेदारु झ़ंगाईयौ बौगिच़ै रौ ठेकौ कास ओरी कै दिआ सा।

¹⁰का तुमुऐ पवित्रशास्त्रा दी इणौ नाईं पौड़ौ कि, ‘ज़ो पात्थर घौर चाणनै वाल़ै मिसत्रिउ ऐ बेकार ज़ाणियौ शोटी ऐरौ थौ, सेज़ौ पात्थर घौरा री दवाली रै कुणै दी लागणै वाल़ौ पात्थर बौणौ।

¹¹एज़ौ काम प्रभुऐ कियौ आ, और आमारी नौज़री दी नोखौ आ।’ ”

¹²तैबै सै यहुदी नेतै यीशु पाकुड़नौ च़ाहा थै, कैलैकि सै सौमझ़ी ऐरै थै कि, “यीशु आमारै बारै दी इऐं काआणी शुणावा आ।” पर सै नेते लोग डौरा थै ओरी लोगु कु ज़ो तिऐ थै। तैबै सै यीशु छ़ाड़ियौ तिदरु पोरु डेऐ।

¹³तैबै यहुदी नेतेउऐ कुछ़ फरीसी और कुछ़ हेरोदेसा रै राज़ै रै गुटा रै लोग यीशु काऐ भेज़ै। सै च़ाहा थै कि यीशु गलत बुशै बोला ताकी सै एस पाकड़ा लै।

¹⁴तैबै सै लोग यीशु काऐ आशै और यीशु लै बोलदै लागै, “ओ गुरु, आमै ज़ाणी कि तुमै इमानदार ई, तुमै बिल्कुल परवाह नाईं कौरदै कि लोग तुमारै बारै दी का सुंच़ाई। तुमै छ़ोटै-बौड़ै कासी री परवाह नाईं कौरदै। तुमै ता सिरफ परमेश्‍वरा रै बाटा री सौच़्च़ी शिक्षा दिआई। का आमुऐ रोमी बौड़ै राज़ै मामलौ दैणौ च़ांई या नाईं च़ांई दैणौ?

¹⁵आमै देउलै कि नाईं?” यीशुऐ तिऊंरौ कपट ज़ाणी ऐरौ थौ कि, “इऐ लोग मुं फौसाउणा लै लागै औन्दै पुछ़दै।” तिणीऐ बोलौ, “तुमै मुं कैलै पौरखा ई? तुमै मुकाऐ एक च़ांदी रौ सिक्कौ आणियौ देखाऔ।”

¹⁶तिंउऐ एक सिक्कौ आणियौ यीशु कै दैऔ। तैबै तिणी पुछ़ौ, “एस सिक्कै दी कासरौ नाऊं और फोटु आ छ़ौपौ औन्दौ?” तिंउऐ ज़वाब दैऔ, “कैसर बौड़ै राज़ै रौ।”

¹⁷तैबै यीशुऐ तिउंलै बोलौ, “ज़ो रोमी बौड़ै राज़ै रौ आ तेस रोमी राज़ै कै दैऔ, और ज़ो परमेश्‍वरा रौ आ तेस परमेश्‍वरा कै दैऔ।” यीशु री इणी बुशै शुणियौ सै लोग हैरान हुऐ कैलैकि तिऊं कै सेऊ नाईं फौसाइया थौ।

¹⁸तैबै कुछ़ सदुकी लोग यीशु काऐ आशै। सदुकी लोग एक यहुदी धार्मिक गुटा रै लोग थै ज़ो इणौ माना थै कि मौरणै बासिऐ ज़िन्दगी नाईं आ। इऐ लोग एज़ी बुशै कौरीऐ यीशु फौसाउणौ च़ाहा थै। तिंउऐ यीशु कु एक सवाल पुछ़ौ कि,

¹⁹“गुरुजी, परमेश्‍वरै आपणै सेवक मुसा रै ज़ौरिऐ आमुलै हुकम दैऔ कि, ‘अगर एक आदमी शादी कौरीयौ बिण सन्तानै मौरा सा, तैबै तेसरै भाईऐ तेसरी छ़ेउड़ी आइलै शादी कौरणी ज़ुरुरी आ, ताकी तेस मौरै औन्दै भाई रौ वंश बौणी रौआ।’

²⁰ऐबै काआणी शुणौ। एकी घौरा दी सात भाई थै। सारेऊ कु बौड़ै भाईऐ शादी कौरी, पर सेऊ मौरौ पोरु। तेसरी औलाद नाईं हुई।

²¹तैबै दुजै भाईऐ तिऐं छ़ेउड़ी आइलै शादी कौरी ताकी तेस भाई री औलाद बौणी रौआ। पर सेऊ भी मौरौ पोरु, तैबै तेसरी औलाद भी नाईं हुई। तैबै चिजै भाईऐ तिऐं छ़ेउड़ी आइलै शादी कौरी, तैबै सेऊ भी मौरौ तिणी पोरु।

²²तैबै साता रै साता भाईऐ तिऐं छ़ेउड़ी आइलै शादी कौरी, पर सै सारै बिण औलादी रै मौरै। तेथ बासिऐ सै छ़ेउड़ी भी मौरी पोरु।

²³ऐबै तुमै बोलौ, अगर मौरणै बासिऐ ज़िन्दगी आ, तैबै तिऐं ज़िन्दगी दी सै छ़ेउड़ी तिऊं साता भाईऊ मांझ़िऐ कु कासरी छ़ेउड़ी हुआ सा? कैलैकि सै सारेऊ री छ़ेउड़ी थी?”

²⁴तैबै यीशुऐ तिउंलै बोलौ, “तुमै का ई लागै औन्दै बोलदै? तुमु दी औकल नाईं आ? तुमै ना ता पवित्रशास्त्रा री बुशै सौमुझ़दै और ना ता परमेश्‍वरा री शक्ति मानदै। तुमारौ विश्वास गलत आ।

²⁵ज़ेबी लोग मौरै औन्दै मांझ़िऐ कु ज़िउंदै हुआ लै, तेबी शादी-ब्याह नाईं औन्दी, कैलैकि तेबी सै सौरगा रै सौरगदूता बाशी हुणै ई ज़ो शादी नाईं कौरदै।

²⁶और मौरणै बासिऐ ज़िउंदै हुणै रै बारै दी तुमुऐ इणौ पौड़ौ आ कि परमेश्‍वरै एक ज़ौल़दी झ़ाढ़ी भितै कु आपणै सेवक मुसा लै बोलौ आ कि, ‘हाऊं परमेश्‍वर ऊ। ज़ास तुमारै बुज़ुर्ग इब्राहिम, इसहाक, याकूब भी माना ई।’

²⁷मौरै औन्दै लोग नाईं बल्कि ज़िउंदै लोग परमेश्‍वर माना ई। इब्राहिम, इसहाक और याकूब इबी झ़ांऊ परमेश्‍वर माना ई ता सै ज़रूर इबी झ़ांऊ ज़िउंदै ई। ज़ैबै तुमै नाईं मानदै कि मौरणै बासिऐ भी ज़िन्दगी आ, तैबै ता तुमै सौच़्च़ाई कु भौरी दूर ई।”

²⁸एक यहुदी शास्त्री तिऊं लोगु री बुशै थौ लागौ औन्दौ शुणदै। तिणीऐ ज़ाणौ कि यीशु किणै आच़्छ़ै ढौंगा कौरीऐ सा स्वालु रै ज़वाबा दैंदै लागौ औन्दौ। तैबै सेऊ यीशु कु पुछ़दै लागौ कि, “आमुकै दैऔ औन्दै हुकमा मांझ़िऐ कु केज़ौ हुकम आ ज़ो सारेऊ कु ज़ुरुरी जा मानणौ?”

²⁹यीशुऐ ज़वाब दैऔ कि, “सारेऊ कु ज़ुरुरी हुकम एज़ौ आ कि, ‘ओ इस्राइला रै लोगुओ! शुणौ, आमारौ परमेश्‍वर प्रभु एका सा।

³⁰आपणै पुरै ज़िवा कौरीऐ परमेश्‍वरा कु प्यार कर, और आपणै पुरै प्राण, पुरै दिमाग, सारी तागता कौरीऐ परमेश्‍वरा री सेवा कर।’

³¹दुजौ ज़ुरुरी हुकम इऐ आ कि, ‘ज़िणौ प्यार तू आपु आइलै कौरा ई तिणौ प्यार तुमै आपणै आस-पड़ोसा रै लोगु आइलै भी कौरौ।’ इऊं दुई हुकमा कु बौड़ौ केज़ौ भी हुकम नाईं आ।”

³²तैबै तिणी यहुदी शास्त्री ऐ यीशु लै बोलौ, “गुरुजी, तुमुऐ बिल्कुल सौच़्च़ौ बोलौ आ कि परमेश्‍वर एका सा। तेस छ़ाड़ियौ दुजौ कोई भी ईश्वर नाईं आ।

³³आमुऐ परमेश्‍वरा कु आपणै सारै ज़िऊ, सारै दिमाग, और सारी तागता कौरी च़ांई प्यार कौरणौ, और आपु ज़िणौ आपणै आस-पड़ोसा रै लोगु आइलै भी च़ांई प्यार कौरणौ। भैंटा च़ौड़ाउणै कु और बौल़ी दैणै कु आच़्छ़ौ आ इणौ कौरणौ।”

³⁴ज़ैबै यीशुऐ देखौ कि एऊ आदमी सौमझ़दारी कौरी ज़वाब दिआ आ तैबै यीशुऐ बोलौ कि, “तू परमेश्‍वरा रै राज़्या कु दूर नाईं आसतौ।” तेथ बासिऐ यहुदी नेतेउ रै लोगु कै यीशु पौरखणा लै केज़ै भी स्वाल पुछ़णै री हिम्मत नाईं पौड़ी।

³⁵यीशुऐ परमेश्‍वरा रै घौरा दी, शिक्षा दैंदी बारै बोलौ, “यहुदी शास्त्री लोग कैलै बोलाई कि मसीह सिरफ दाऊदा रौ छ़ोहरु आ?

³⁶दाऊद राज़ै ता पवित्र आत्मा री अगुवाई कौरी बोलौ थौ कि, ‘परमेश्‍वरै मैरै प्रभु कु बोलौ, “मेरी सुल़टी भिलै बोश ज़ेबी झ़ांऊ हाऊं तैरै दुश्मना ना हौराई सौकु।” ’

³⁷ज़ेबी दाऊद राज़ै मसीहा लै मैरौ प्रभु कौरीऐ बोलौ थौ, तैबै मसीह ता दाऊदा राज़ै कु बौड़ौ आ!” तैबै तिऐ ज़ो भौरी बौड़ी भीड़ थी, सै लोग यीशु री शिक्षा बौड़ी खुशी कौरीऐ थै लागै औन्दै शुणदै।

³⁸लोगु लै शिक्षा दैंदी बारै यीशुऐ बोलौ, “यहुदी शास्त्री लोगु रै विच़ारु कु और तिउंरी शिक्षा कु बौच़ियौ रौएऊ। सै आपणै लाम्बै कोटा भिड़ीयौ घमण्डा कौरीऐ घुमणौ पसन्द कौरा ई। और सै च़ाहा ई कि लोग बज़ारु दी तिउंरी इज़्ज़त कौरा।

³⁹और सै आराधनालय दी सारेऊ कु आगु बोशणौ च़ाहा ई। अगर तिऊं कुण आपणै घौरै औटावा लै, सै शास्त्री लोग तिऐ भी आच़्छ़ी ज़ागाह दी बोशणै च़ाहा ई।

⁴⁰और इऐ शास्त्री लोग गरीब विधवा री सारी धन-ज़यदाद, घौर लुटा ई। तैबै सै लोगा कै देखाल़णा लै लाम्बी-लाम्बी प्राथना कौरा ई। इणै लोगु लै परमेश्‍वर भौरी बौड़ी सौज़ा दिआ आ।”

⁴¹यीशु परमेश्‍वरा रै घौरा री कोठड़ी रै सामनै बोशियौ देखदै लागौ कि लोग परमेश्‍वरा लै भैंटा दैंदै ई लागै औन्दै। कई सेठ लोग परमेश्‍वरा लै भौरी भेंट लागै दैंदै।

⁴²तैबै तिऐ एक गरीब विधवा आशी और तिऐं कोठड़ी दी दुई दामड़ी पाई।

⁴³यीशुऐ इणै देखीयौ आपणै च़ेलै आपु काऐ औटाइयौ तिउंलै बोलौ, “हाऊं तुमुलै सौच़्च़ौ बोलाऊ कि इंऐ विधवा छ़ेउड़ीऐ इऊं सारै लोगु मांझ़िआ कु ज़ादौ दाण दैऔ आ।

⁴⁴सारै लोगुऐ ता आपणै भौरी धना मांझ़िऐ कु कामत्ती धन दैऔ आ परमेश्‍वरा लै पर इंऐ गरीब विधवा छ़ेउड़ीऐ ता आपणी सारी कौमाई परमेश्‍वरा लै देई एरी आ। इंऐ आपु कालै कुछ़ ना बौच़ाऔ।”